Тутқундики борталалиқ яш қуддус абдувәлиниң қумулда сотланғанлиқи вә 5 йил 4 айлиқ кесилгәнлики дәлилләнди

Вашингтондин мухбиримиз шөһрәт һошур тәйярлиди
2024.05.14
quddus-abduweli-5-1024 Қуддус абдувәли
Sehibe Sayramoghli

Нөвәттә америкада яшаватқан сәһибә сайрамоғлиниң тивиттирда хәвәр қилишичә, униң қумулда тутуп турулуватқан борталалиқ иниси қуддус абдувәли 10‏-май йәни җүмә күни қумулда сотланған. Мухбиримизниң бу һәқтики ениқлашлири давамида қуддус абдувәлиниң қумул оттура сот мәһкимисидә йерим йепиқ һалда сотланғанлиқи вә 5 йил 4 айлиқ кесилгәнлики дәлилләнди.

10 Айдин бери қумулда тутқундики иниси қуддус абдувәлиниң ақивитидин әндишә қилип турған сәһибә сайрамоғли өткән һәптә, ата-анисиниң юрти борталадин қумулға кәлгәнликидин хәвәр тапқан. Иниси һәққидә бирәр яхши хәвәргә еришиш үчүн ата-аниси билән изчил алақилишип турған сәһибә, ата-анисидики еһтиятчанлиқ сәвәбидин иниси һәққидә ениқ бир учурға еришәлмигән. У ата-анисиниң 10-май йәни җүмә күни иниси билән учришидиғанлиқини билип, униң шу күни сотлинидиғанлиқини пәрәз қилған. У ата-анисиниң җүмә күнидики учришиштин кейин борталаға иниси алмай қайтқанлиқини уқуп инисиниң сотта кесилгәнликидин хәвәр тапқан. Әмма йәнила йил кесимидин хәвәрсиз қалған.

Биз бу сот һәққидә мәлумат елиш үчүн, қумулниң ивирғул районлуқ хәлқ сот мәһкимисигә телефон қилдуқ. Телефонимизни қобул қилған хадим, бизниң бу дело һәққидә учур игиләш һоқуқимиз йоқ икәнликини билдүрди.

Сәһибәниң дейишичә, иниси бир путбол һәвәскари болуп, вақтини асасән путбол ойнаш вә путбол хәвәрлирини көрүш билән өткүзүп кәлгән, җәмийәттики җиддий вә назук мәсилиләрдин өзини узақ тутуп кәлгән бири икән. Шуңа у вә аилиси қуддусниң бир уқушмаслиқ сәвәбидин тутулғанлиқини пәрәз қилип, тез арида қоюп берилишини тәқәззалиқ билән күткән. Әмма нәтиҗә улар күткәндәк болмиған.

Телефонимизни қобул қилған қумул оттура сот мәһкимисиниң бир хадими, қолидики архипларға қарап чиққандин кейин, қуддус абдувәли үстидин җүмә күни сот ечилғанлиқини дәлиллиди. Әмма қуддусниң қанчә йил кесилгәнлики һәққидә мәлумат бәрмиди. Телефонимизни иккинчи қетим қобул қилған евирғол районлуқ сот хадими, қуддусниң сотлиниш җәряни һәққидики соалимизға җавабән, бу сотниң оттура сотта ечилғанлиқини дәлиллиди.

Сәһибәниң пәрәз қилишичә, сотта адвокат болмиған. Аниси сот ахирида қуддус билән 1-2 минутчила сөзлишиш пурситигә еришәлигән, дадисиға бу пурсәт берилмигән.

Қумул оттура сотниң бир хадими, қуддус абдувәли үстидики бу сотниң йепиқ шәкилдә өткүзүлгәнлики, шуңа қуддус абдувәлиниң кесилиш сәвәби вә кесим муддити һәққидә мәлумат берәлмәйдиғанлиқини тилға алди.

Сәһибә ата-анисиниң рәңги-роһийдики аламәтләргә қарап инисиниң кесим муддитини пәрәз қилишқа тиришқан, пәқәт ениқ учурға еришәлмигән.

Қумул шәһәрлик қамақханиниң бир хадими қуддус абдувәлиниң 6 йиллиқ кесилгәнлики, униңдин аввал сотланған қәйсәр исимлик бир достиниң болса, 5 йиллиқ кесилгәнликини ашкарилиди.

Өткән йили ахирқи ениқлашлиримизда, қуддус абдувәлиниң қумул вилайәтлик педагогика алий техникомидики бир түркүм оқуғучилар садир қилған бир сирлиқ “чоң дело” ға четилғанлиқи, делоға четишлиқ яшларниң 50-60 чә барлиқи мәлум болған.

Мәлум болушичә бу делоға четилғанлар, бортала, қаримай, үрүмчи қатарлиқ шәһәр вә вилайәтләрдин болуп, буларниң көпинчиси сотсиз яки йепиқ шәкилдики сот һөкүмлири билән түрмиләргә ташланған. Буларниң ичидин пәқәт қуддус билән қәйсәр исимлик бир достиниң сотила йерим йепиқ шәкилдә, йәни ата-анисиниң қатнишиши биләнла өткүзүлгән. Булардин борталалиқ яш интизарниң сотиниң мушу чаршәнбә яки пәйшәнбә күни ечилидиғанлиқи мәлум болмақта.

Илгирики ениқлашлиримизда йәнә бу делоға четишлиқ яшларниң бир қисминиң интернетта тамдин атлаш вә қанунсиз материялларни көрүш сәвәблик тутқун қилинғанлиқи мәлум болған, әмма делодики көпинчә яшларниң, болупму ғоллуқ гумандарларниң немә сәвәбтин тутулғанлиқи та һазирғичә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.