Turpan chatqalda talla baziri sahibi qudret möminning 3 yildin buyan ghayib ikenliki ashkarilandi

Muxbirimiz shöhret hoshur
2020-06-11
Share
lager-turpan-xalmurat-uyghur.jpg Turpan'gha sélin'ghan melum "Qayta terbiyelesh merkizi".
Social Media

Yéqinda turpanliq muhajirlardin biri radiyomizgha uchur yollap, turpanning chatqal yézisida talla baziri achqan qudret möminning 2017-yili etiyazda lagérgha ekétilgendin béri a'ilisige héchqandaq uchur bérilmigenliki, bu a'ile tawabi'atining, turpandiki weziyetning jiddiyliki seweblik qudret mömin heqqide ehwal sürüshte qilishqimu jür'et qilalmaywatqanliqini inkas qilghanidi. Muxbirimizning éniqlashliri dawamida 35 yashlardiki qudret möminning 3 yildin buyan iz-dériki yoqluqi kent kadirliri teripidin delillendi.

Turpanliq muhajirning radiyomizgha inkas qilishiche, chatqal yézisida melum bir mehellidin lagérgha ekétilgen kishilerdin köpinchisining késiwétilgenliki we bir qismining téxiche lagérlarda tutup turuluwatqanliqi ularning a'ile tawabi'atigha her xil yollar bilen uqturulghan bolsimu, emma 35 yashliq qudret mömin heqqide a'ilisige héchqandaq uchur bérilmigen. Téléfonimizni qobul qilghan chatqal yéziliq bir saqchixana xadimi chatqal yézisida talla baziri achqan qudret mömin isimlik biri barliqi we "Kent zomigiri" dégen eyiblime bilen 3 yilning aldida lagérgha ekétilgenlikini ashkarilidi.

Inkasta déyilishiche, eslide bir talla bazirining sahibi bolghan qudret möminning inisi we ayali qudret mömin heqqide köp qétim kent kadirliridin melumat sorighan؛ emma, uning tirikliki we nediliki heqqide uchur alalmighan. Qudret möminning ayali yéziliq saqchixanidin melumat sorighinida tehditke uchrighan yeni saqchilar uninggha qudret mömin heqqide peqetla öyide olturup uchur saqlashni buyrughan. Saqchilar yene eger qayta sürüshte qilsa aqiwitining éridin perqliq bolmaydighanliqini éytqan. Mezkur xadim qudret möminning bu tehditke uchrighan ayalining nöwette bir doxturxanida ishlewatqanliqini tilgha aldi.

Inkasta bayan qilinishiche, nöwette talla bazirini mangduruwatqan inisi dukanning étilip qalmasliqi üchün, akisi heqqide ehwal sürüshte qilip kent derijiliktin yuqiri héchqandaq bir organ'gha baralmighan. Mezkur saqchi xadimi qudret möminning a'ilide üch qérindash ikenliki we talla bazirining inisi teripidin mangduruluwatqanliqini tilgha aldi.

Turpanliq muhajirning inkasida, chatqal yéza teweside lagérgha ekétilgenlerdin iz-dériki élinmaywatqanlarning yalghuz qudret mömin emesliki, bundaq aqiwettikilerning her bir kent we mehellide mewjutluqi eskertilgen. Inkasta yene chatqal yézisidin lagérgha ekétilgenlerdin 3 yil ichide yérimigha yéqinining késilip ketkenliki, bir qismining téxiche lagérda ikenliki, emma yene bir qisimidin héchqandaq uchur yoqluqi qeyt qilin'ghan. Chatqaldin téléfonimizni qobul qilghan xadimlar, bu uchurlarning toghra-xataliqi heqqide melumat bérelmidi.

Chatqal yézisidiki bir kent amanliq mudiri qudret mömin bilen birlikte hesen ablimit qatarliq üch kishini lagérgha ewetilish üchün özi qoli bilen saqchixanigha tapshurup bergenlikini ashkarilidi. Emma u qudret möminning aqiwiti heqqide özining héchqandaq melumati yoqluqini tekitlidi.

Turpanliq muhajirning inkasida qudret möminning lagérda késiwétilip xitay ölkilirige yötkep kétilgenlik we yaki lagérda jan üzgenlik éhtimalliqi ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet