Мутәхәссисләр хитайниң "2021-йиллиқ қурбан һейтлиқ ахбарат йиғини" ға инкас қайтурди

Мухбиримиз меһрибан
2021-07-21
Share
Мутәхәссисләр хитайниң Хитай мәркизи телевизийә истансиси нәқ мәйдандин тарқатқан, қарғилиқ наһийәсидә өткүзүлгән қурбан һейтлиқ паалийәт көриниши
Social Media

 Бу йиллиқ қурбан һейт мәзгилидә, хитай һөкүмәт таратқулири вә иҗтимаий алақә мунбәрлиридә уйғур дияридики мусулманларниң аталмиш "милләтләр иттипақлиқи асасида қурбан һейт тәбрикләнгәнлики", "һәр милләт хәлқиниң хошал-хорам кәйпиятта қурбан һейтни күтүвалғанлиқи" кәң тәшвиқ қилинди. 

Бирнәччә күндин буян хитай хәвәрлири билән иҗтимаий таратқуларда кәң тарқалған син филимлиридә уйғурларниң қәшқәр, үрүмчи, ғулҗа қатарлиқ шәһәрләрдики мәсчит вә мәйданларда қурбан һейтлиқ "сама усули" ойнаватқан көрүнүшлири, шундақла "райондики һәр милләт хәлқиниң өзара һейтлишип, һәммә җайниң һейт кәйпиятиға толғанлиқ" көрүнүшлири қайта-қайта тәшвиқ қилинди. 

20-Июл күни йәнә уйғур аптонум районлуқ һөкүмәт даирилири мәхсус ахбарат елан қилиш йиғини өткүзгән. Йиғинда аталмиш "уйғур гуваһчи" лар сөзгә чиқирилип, "уйғурларниң диний етиқад әркинлики толуқ капаләткә игә", "ислам диниға етиқад қилидиған һәр милләт хәлқи қурбан һейтни диний қаидә- йосунлар бойичә әркин вә хошал өткүзмәктә" дегән мәзмундики сөзләрни қилип, хитай һөкүмитиниң сияситини мәдһиләшкә селинған. 

Қәлбинур сидиқ ханим 2019-йилиниң ахири голландийәгә кәлгәндин буян,  өзи оқутқучилиқ қилған лагерда көргән әһвалларни дуняға ашкарилиған лагер шаһитлириниң биридур. 

Қәлбинур сидиқ ханим бүгүн зияритимизни қобул қилип,хитай һөкүмитиниң бу хил тәшвиқатлирини "пүтүнләй ялғанчилиқ" дәп әйиблиди. 

У 2017-2018-йиллири вә 2019-йилларда уйғурларниң роза һейт вә қурбан һейт  қатарлиқ диний байрамларни өткүзүштин пүтүнләй чәкләнгәнликини билдүрди. 

Униң тәкитлишичә, әнәнивий диний байрамларни өткүзүштин чәкләнгән уйғурлар охшаш мәзгилләргә тоғра кәлгән хитайниң зоңза байрими қатарлиқ байрамларни  өткүзүшкә мәҗбурланған. 

Дуня уйғур қурултийи хитай ишлири комитетиниң мудири илшат һәсән әпәндиму зияритимизни қобул қилип, хитай һөкүмитиниң бу йиллиқ қурбан һейтлиқ тәшвиқати вә ахбарат йиғининиң маһийити һәққидә тохталди  

Униң қаришичә, йиллардин буян уйғурларниң диний етиқади вә миллий байрамлириға чәклимә қоюп келиватқан, һәтта йеқинқи 3 йилда уйғурларниң бу хил байрамларни өткүзүшини қаттиқ чәклигән хитай һөкүмитиниң бу йиллиқ қурбан һейт мәзгилидә тәшвиқатни күчәйтип, һәтта ахбарат елан қилиш йиғинлирини уюштуруши, хәлқарадин келиватқан бесим сәвәбидин болған икән. 

Илшат һәсән әпәндиниң билдүрүшичә, хитай һөкүмитиниң бу хил сахта тәшвиқат хәвәрлирини базарға селиши, өзиниң уйғурларға йүргүзиватқан "ирқий қирғинчилиқ" сияситини ақлаш үчүн икән. 

Илшат һәсән әпәнди сөзидә йәнә хитай һөкүмитиниң тиятер шәклини алған бу хил тәшвиқатлириниң ялғанчилиқ маһийитини ечип көрсәтти. 

Елшат һәсән әпәндиниң тәкитлишичә, хитай һөкүмити бу хил сахта тәшвиқатларни мәйли қандақ шәкилдә елип беришидин қәтийнәзәр, дуняни һәргизму алдиялмайдикин. Әмма хитай һөкүмити билән болған иқтисадий мунасивәтләрдин ваз кечәлмәйдиған бир түркүм дөләтләр, болупму мусулман әллири йәнила хитай һөкүмитиниң уйғурларни бастурушиға көз юмуп, хитайниң бу хил ялған тәшвиқатлириға мәйдан һазирлимақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт