Ministir sulayman soylu: “Öz yurtlirida héyt ötküzelmigen sherqiy türksitanliq qérindashlirimizning qurban héytini tebrikleymiz!”

Ixtiyariy muxbirimiz arslan
2022.07.11
Share on WhatsApp
Share on WhatsApp
Ministir sulayman soylu: “Öz yurtlirida héyt ötküzelmigen sherqiy türksitanliq qérindashlirimizning qurban héytini tebrikleymiz!” Qurban héytliq héytlishish pa'aliyitide türkiye ichki ishlar ministirliqining ministiri solayman soylu ependi. 2022-Yili 10-iyul, türkiye.
Photo: RFA

Bu yilliq qurban héyt yétip kélishi bilen dunyaning her qaysi jayliridiki musulmanlar, jümlidin Uyghurlar qurban héyt bayrimini tebriklimekte. Türkiyediki Uyghur jama'itimu 9-iyul shenbe küni qurban héytini kütiwaldi.

Qurban héyt munasiwiti bilen héytning ikkinchi küni, yeni 10-iyul küni türkiye küchmenler ishliri idarisining uyushturushi bilen istanbulda héytlishish pa'aliyiti ötküzüldi.

Héytlishish pa'aliyitige türkiye ichkiy ishlar ministirliqining ministiri solayman soylu, mu'awin ministiri isma'il chatakli, istanbul waliyliqining mu'awin waliysi mehmet ali özyigit, istanbul saqchi idarisining bashliqi zafer aqtash, türkiye köchmenler ishliri idarisining bashliqi sawash ünlü, istanbul köchmenler ishliri idarisining bashliqi bayram yalinsu we shundaqla Uyghur, qazaq, özbék, türkmen, tatar qatarliq türk dunyasi ijtima'iy teshkilatlirining rehberliri, wekilliri we bir qisim ezaliri qatnashqan. Teklipke bina'en Uyghurlardin 100 ge yéqin kishi bu héytlishish pa'aliyitige ishtirak qilghan.

Qurban héytliq héytlishish pa'aliyitidin körünüsh. 2022-Yili 10-iyul, türkiye.
Qurban héytliq héytlishish pa'aliyitidin körünüsh. 2022-Yili 10-iyul, türkiye.
RFA/Arslan

Pa'aliyette xelq'ara sherqiy türksitan teshkilatlar birlikining re'isi hidayetullah oghuzxan teklip boyiche söz qilip, Uyghurlarning öz wetinide héyitlishish imkaniyiting yoqluqini bildürdi. U mundaq dédi: “Biz besh yildin buyan wetendiki uruq-tughqanlirimiz bilen alaqe qilalmaywatimiz, héytlishalmaywatimiz, sherqiy türkistanda insanlar héytlishish pursitige ige bolalmidi, xelqimiz héyt-bayrmlarni, qurbanliq ibadetlirini ada qilishtin mehrum qilindi. Mushundaq bir weziyette türkiyede héytlishish programmisi orunlashturup bizni dewet qilghan hörmetlik ichkiy ishlar ministirigha rehmet éytimiz, bizge türkiyede meyli xelq bolsun, meyli dölet bolsun, qérindashliq mu'amilisi qiliwatidu, biz buning üchün minnetdarliq bildürimiz.”

Héytlishish pa'aliyitide söz qilghan türkiye ichkiy ishlar ministirliqining ministiri sulayman soylu, pütkül musulmanlar bilen birlikte Uyghurlarningmu qurban héytini tebriklidi we mundaq dédi: “Öz yurtlirida héyt-bayramlirini tebrikliyelmeywatqan, héyt-bayram tentensi qilalmaywatqan sherqiy türksitanliq qérindashlirimizdin tartip iraqtiki türkmen qérindashlirimizghiche, pütün musulman qérindashlirimizning qurban héytini ayrim-ayrim tebrikleymiz!” dédi.

Ministir sulayman soyluning tiwittér hésabida 6 milyon 200 ming, féysbuk sehipiside 1 milyon 300 ming egeshküchsi bar bolup, ministir sulayman soylu yoquriqi héyt tebriklirini Uyghurlar bilen chüshken xatire resimliri bilen qoshup, özining ijtima'iy taratqu sehipiside tarqatqan. Nurghun kishiler uning héytliq tebrikini hembehlep, ijabiy pikir-inkaslarni qayturghan.

Qurban héytliq héytlishish pa'aliyitidin körünüsh. 2022-Yili 10-iyul, türkiye.

Ministir sulayman soylu sözide yene türkiyege köchüp kelgen musapirlargha wijdan we shepqet bilen mu'amile qilish mes'uliyiti barliqini ipadilep mundaq dédi: “Türkiye köchmenler ishlirini bir terep qiliwatidu, türkiye qanunsiz we qachaq köchmenlerning aldini élish siyasitini yürgüziwatidu, shuning bilen bir waqitta uni wijdan we küyümchanliq bilen élip bériwatidu. Bu mesilide türkiyening üstide éghir mes'uliyet we yük bar, milyonlighan insan köchmen bolup insaniy heq-hoquqidin mehrum boldi, ular öz yurtlirini, uruq-tughqanlirini, baliliq dewrini, ejdadlirining topraqlirini séghinip yürekliri hesretke toldi.”

Ministir solayman soylu köpchilikke yene türkiye jumhuriyitining re'isi rejep tayyip erdoghanning yollighan héytliq tebrik we tileklirini yetküzdi.

Hidayetullah oghuzxan, türkiye ichkiy ishlar ministiri sulayman soylu bilen élip barghan héytlishish pa'aliyiti toghrisida pikir bayan qilip, mundaq dédi: “Bu héytilishish pa'aliyiti köngüllük boldi, türkiyede, bolupmu bizdek muhajirette ghéribliq ichide yashawatqan bir xelqqe nisbeten dölet rehberlirining héyt-bayramlarda bizni yoqlishi, bizge méhr-shepqitini körsitishi, meniwiy jehettin könglimizni kötürdi.”

Hidayetullah oghuzxan bu qétimliq héytliq uchrishish pursitidin paydilinip, türkiye ichkiy ishlar ministiri we köchmenler ishliri idarisining mudirigha türkiyediki Uyghurlar duch kéliwatqan emeliy qiyinchiliqlarni yetküzgenlikini bildürdi.

Biz yene bu heqte pikir qarashlirini élish üchün bu héyitlishish pa'aliyitige qatnashqan sherqiy türkistan ölimalar birlikining re'isi doktur atawullah shahyar bilen söhbet élip barduq. Doktur atawullah shahyar bu heqte pikir bayan qilip, Uyghurlar özliri yashawatqan döletlerde shu döletning muhim siyasiy erbabliri bilen yéqin munasiwet ornitishining sherqiy türkistan dewasi we Uyghurlar mesilisige paydiliq bolidighanliqini tekitlidi. U yene türkiyedin ibaret Uyghur muhajirliri köprek olturaqlashqan döletning ichkiy ishlar ministirining mexsus Uyghurlarning qurban héytini tebriklishining muhim ehmiyetke ige ikenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.