Д у қ дуняниң һәр қайси җайлирида қурбанлиқ қилалмиған уйғурларни унтумиди

Ихтиярий мухбиримиз әркин тарим
2022.07.12
Share on WhatsApp
Share on WhatsApp
Д у қ дуняниң һәр қайси җайлирида қурбанлиқ қилалмиған уйғурларни унтумиди Д у қ қурбанлиқ ианиләрни пакистандики уйғурларға әвәтти. 2022-Йили 9-июл, пакистан.
RFA/Erkin Tarim

Корона вируси тарқалғандин кейин келип чиққан иқтисадий кризис, иш вә сода ишлириниң ақсап қелиши қатарлиқ түрлүк сәвәбләрдин худди дуняниң көп әллиридикигә охшашла түркийә, қазақистан, қирғизистан, пакистан вә афғанистан қатарлиқ әлләрдики уйғурларму иқтисадий һәм турмуш җәһәттин қийин әһвалларда қалмақта. Бу сәвәбтин қурбанлиқ қилалмиған уйғурларниң саниму көпәйгән. Бундақ еғир бир пәйттә д у қ юқиридики дөләтләрдики қурбанлиқ қилалмиған уйғурларниму унтумиди.

Д у қ явропа дөләтлиридики түрк вә бәзи мусулман дөләтләрниң аммиви тәшкилатлири вә уйғурлар тәқдим қилған қурбанлиқ ианилирини түркийә, оттура асия түркий җумһурийәтлири, пакистан вә афғанистан қатарлиқ дөләтләрдики йүзлигән уйғур аилисигә әвәтип бәргән.

Д у қ ниң баш мәслиһәтчиси, сиясәтшунас қәһриман ғоҗамбәрди д у қ тапшурувалған ианиләрни қазақистандики уйғурларға әвәткинигә тәшәккүр ейтти. 2022-Йили 9-июл, алмута.
Д у қ ниң баш мәслиһәтчиси, сиясәтшунас қәһриман ғоҗамбәрди д у қ тапшурувалған ианиләрни қазақистандики уйғурларға әвәткинигә тәшәккүр ейтти. 2022-Йили 9-июл, алмута.
RFA/Erkin Tarim

Д у қ рәиси долқун әйса әпәнди алди билән пүтүн дунядики барлиқ уйғурларниң қурбан һейтини тәбриклигәндин кейин бу қетимқи қурбанлиқ ярдәм паалийитиниң мәқсити тоғрисида тохталди.

Д у қ иҗраийә комитети муавин рәиси турғунҗан алавуддин әпәнди соалимизға җаваб берип, қурбанлиқ қилиш вә ианә қилишниң әһмийити тоғрисида тохтилип мундақ деди: “қурбанлиқ қилиш һәр қандақ һал оқити җайида, турмуши яхши мусулманға пәрз. Шуниң үчүн бу пәрзни ада қилимиз дәп пүтүн дунядики мусулманлар қурбанлиқ қилиду. Қурбанлиқни пәйғәмбиримизниң һәдиси шәрипи бойичә үчкә бөлиду. Пәйғәмбиримиз қурбанлиқ қилсаңлар гөшниң бир қисмини пәрзәнтлириңлар билән йәңлар, йәнә бирқисмини қошна вә дост бурадириңлар билән йәңлар, бир қисмини кәмбәғәл, мискин, қурбанлиқ қилалмиғанлар билән ортақлишиңлар дәп көрсәткән. Бу һәдистә дейилгәнләргә асасән қурбанлиқ гөшлири бир тәрәп қилиниду”.

Қирғизистандики уйғурлар д у қ әвәткән ианиләрни тапшурувалғанлиқиға тәшәккүр ейтти. 2022-Йили 9-июл, алмута.
Қирғизистандики уйғурлар д у қ әвәткән ианиләрни тапшурувалғанлиқиға тәшәккүр ейтти. 2022-Йили 9-июл, алмута.
RFA/Erkin Tarim

Игилишимизчә д у қ гәрчә сиясий тәшкилат болсиму қурулғандин тартип түрк, уйғур, әрәб вә башқа мусулман хәлқләрдин йиғқан ианиләрни дуняниң һәрқайси җайлирида қийин әһвалда қалған уйғурларға тарқитип келиватқаникән. Турғунҗан алавуддин әпәнди бу йилму оттура асия түркий җумһурийәтлири, пакистан, түркийә вә афғанистан қатарлиқ җайлардики уйғурларға қурбанлиқ әвәткәнликини билдүрди. У, мундақ деди: “биз д у қ йиллардин буян қолида бар түрк вә уйғурлар ианә қилған қурбанлиқларни вәтәнниң йоли етилмәстин бурун шәрқий түркистанниң һәр қайси җайлиридики кишиләргә йәткүзүп берәттуқ. Хитай 2016-йилиниң ахирида вәтәндики хәлқимизниң чәтәл билән болған мунасивитини үзүл-кесил үзүвәткәндин кейинму қурбанлиқларни йиғип түркийә, оттура асия түркий җумһурийәтлири, пакистан вә афғанистанда уйғурларға тарқитип бериватимиз. Бу йилму һәм шундақ қилдуқ”.

Д у қ ниң қирғизистандики малийә ишлириға мәсул вәкили дилмурат әкбәроф әпәнди д у қ әвәткән қурбанлиқларни қирғизистанда уйғурлар зич олтурақлашқан йезилардики уйғурларға тарқитип бәргәнликини билдүрди.

Пакистандики өмәр уйғур вәхписи рәиси өмәр уйғур әпәнди корона вируси пәйда болғандин кейинки қурбан һейитлирида пакистандики уйғурларниң көпиниң қурбанлиқ қилалмиғанлиқини, бундақ бир пәйттә бу ярдәмниң әһмийитиниң зор болғанлиқини, уйғурларниң дуня уйғур қурултийиға миннәтдарлиқини ипадиләшкәнликини баян қилди.

2020-Йилиниң башлирида корона вируси пүтүн дуняда ямрашқа башланғандин кейин дуняниң һәр қайси дөләтлиридә паалийәт елип бериватқан 40 тин артуқ уйғур тәшкилати д у қ ниң йетәкчиликидә “вирус кризиси ярдәм мәркизи” қурғаниди. Мәзкур мәркәз дуняниң һәрқайси җайлиридики уйғурлардин 160 миң доллар пул ианә топлап тарқатқаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.