Д у қ қатарлиқ бир қисим аммиви тәшкилатлар уйғурларға «қурбанлиқ» тарқатти

Ихтиярий мухбиримиз әркин тарим
2020-08-05
Share

Корона вируси тарқалғандин кейин келип чиққан иқтисадий кризис, карантин, иш вә сода орунлириниң тохтиши қатарлиқ түрлүк сәвәбләрдин худди дуняниң көп әллиридикигә охшашла түркийә вә бир қисим оттура асия әллиридики уйғурларму иқтисадий һәм турмуш җәһәттин қийин әһвалларда қалмақта. Бу сәвәбтин қурбанлиқ қилалмиған уйғурларниң саниму көпәйгән. Бундақ еғир бир пәйттә д у қ башлиқ һәр қайси дөләтләрдики шәрқий түркистан аммиви тәшкилатлири қурбанлиқ қилалмиған уйғурларниму унтумиди.

Д у қ явропа дөләтлиридики түрк вә бәзи мусулман дөләтләрниң аммиви тәшкилатлири тәқдим қилған қурбанлиқ ианилирини түркийә, оттура асия түркий җумһурийәтлири, пакистан, тайланд вә һиндистан қатарлиқ дөләтләрдики 252 уйғур аилисигә әвәтип бәргән.

Д у қ рәиси долқун әйса әпәнди алди билән пүтүн дунядики барлиқ уйғурларниң қурбан һейтини тәбриклигәндин кейин бу қетимқи қурбанлиқ ярдәм паалийитиниң мәқсити тоғрисида тохталди.

«Вирус кризиси ярдәм мәркизи» мәсули, д у қ диний ишлар комитети мудири турғунҗан алавуддин әпәнди соалимизға җаваб берип, д у қ гәрчә сиясий тәшкилат болсиму қурулғандин тартип түрк, уйғур, әрәб вә башқа мусулман хәлқләрдин йиғқан ианиләрни дуняниң һәрқайси җайлирида қийин әһвалда қалған уйғурларға тарқитип келиватқанлиқини билдүрди.

Турғунҗан алавуддин әпәнди бу йил д у қ қанчә аилигә қурбанлиқ ярдәм қилди? дегән соалимизға у, мундақ җаваб бәрди: «бу йил уйғур вә түрк қериндашлардин 252 кишилик қурбанлиқ ианиси йиғип, бу қурбанлиқларни әвәттуқ: мәсилән: қазақистанға 50, қирғизистанға 50, өзбекистанға 10, пакистанға 15, тайландқа 15, мисирға 7, афғанистанға 3 қурбанлиқ ианиси әвәтилди. Булардин сирт түркийәниң бурса, қаһраманмараш вә истанбул қатарлиқ шәһәрләрдә қийин әһвалда қалған йетим-йесир вә оқуғучи балиларға болуп җәмий 102 кишигә қурбанлиқ әвәтип берилди. Биз бу қурбанлиқларниң пулини түркийәдики бәзи вәқип вә тәшкилатларға әвәтип бәрдуқ, улар д у қ намидин бу қурбанлиқларни тарқитип бәрди».

Пакистандики өмәр уйғур вәқпи рәиси өмәр уйғур әпәнди корона вируси пәйда болғандин кейинки мәзкур тунҗи қурбан һейитида пакистандики уйғурларниң 65% иң қурбанлиқ қилалмиғанлиқини, бундақ бир пәйттә бу ярдәмниң әһмийитиниң зор болғанлиқини баян қилди.

Түркийәниң истанбул шәһиридә паалийәт елип бериватқан «көк ай инсаний ярдәм тәшкилати» му бу қурбан һейитта тул хотун, йетим-йесир, яшинип қалған, кесәлчан вә игә-чақисиз кишиләрдин тәркиб тапқан 2000 әтрапида аилигә қурбанлиқ гөши тарқитип бәргән. Мәзкур тәшкилатниң рәиси абдуреһим әзизоғли әпәнди дуняниң һәр қайси җайлиридики уйғур тәшкилатлири, түркийәдики түрк тәшкилатлири вә бәзи кишиләр ианә қилған 50 кала, 650 қурбанлиқ қойни союп тарқитип бәргәнликини билдүрди.

Булардин башқа түркийәдики бәзи шәрқий түркистан фондлири вә тәшкилатлириму қурбанлиқ гөши тарқатқан.

Д у қ ниң истанбулда турушлуқ вәкили абдурешит абдулхәмит әпәнди түркийәниң бурса, қаһраманмараш вә истанбул шәһиридә туруватқан аилиләр вә оқуғучиларға 102 қурбанлиқниң пулини әвәтип қурбанлиқ қой сойдуруп тарқатқанлиқини баян қилди.

Бу йил 3-айниң 26-күни дуняниң һәр қайси дөләтлиридә паалийәт елип бериватқан 40 тин артуқ уйғур тәшкилатиниң мәсуллири телефон йиғиниға иштирак қилип, д у қ ниң йетәкчиликидә «вирус кризиси ярдәм мәркизи» қурғаниди. Мәзкур мәркәз дуняниң һәрқайси җайлиридики уйғурлардин 160 миң доллар пул ианә топлап тарқатқаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.