Istanbulda yashawatqan Uyghurlar qurban héytni tebriklesh pa'aliyitide jem boldi

Ixtiyariy muxbirimiz arslan
2022.07.12
Share on WhatsApp
Share on WhatsApp
Istanbulda yashawatqan Uyghurlar qurban héytni tebriklesh pa'aliyitide jem boldi Istanbuldiki xelq'ara sherqiy türkistan teshkilatlar birlikining uyushturushi bilen ötküzülgen qurban héytni tebriklesh pa'aliyitidin körünüsh. 2022-Yili 11-iyul, türkiye.
RFA/Arslan

Bu yilqi qurban héytning 3-küni yeni 11-iyul düshenbe küni istanbuldiki xelq'ara sherqiy türkistan teshkilatlar birlikining uyushturushi bilen istanbulda qurban héyt tebriklesh pa'aliyiti ötküzüldi. Pa'aliyet zeytinburnu sahilidiki kazlicheshme kültür sen'et merkizining meydanida uyushturulghan bolup, pa'aliyette sherqiy türkistan ijtima'iy teshkilatlarning rehberliri, ezaliri we istanbulda yashawatqan Uyghurlardin er-ayal, yash ösmürler we balilar bolup köp sanda kishi jem boldi.

Pa'aliyet qur'an kerim tilawiti bilen bashlandi. Kéyin sherqiy türkistan ma'arip we hemkarliq jem'iyiti re'isi hidayetullah oghuzxan söz qilip Uyghurlarning qurban héyt bayrimini tebriklidi.

Hidayetullah oghuzxan sözide bir yerge jem bolup héytlishishning ehmiyiti toghrisida toxtaldi, u sözide bir dastixan'gha jem bolup héytlishishning qérindashliq rishtisini kücheytidighanliqini, buning muhajirettiki hayatta Uyghurlarning milliy we islamiy kimliki, örp-adetliri we qimmet-qarashlirini yoqatmasliqning simwoli ikenlikini tekitlidi.

Hidayetullah oghuzxan bu héytlishish pa'aliyitige nurghunlighan Uyghurlarning qatniship meydan'gha liq tolghanliqini körüp söyün'genlikini ipadilidi we mundaq dédi: “Bu, birlikimiz, ijtima'iy hayatta körsetken birlikimizdur. Bu, buningdin kéyinki siyasiy istiqbalimiz, sherqiy türkistanning azadliqi, étnik, siyasiy, ijtima'iy, exlaqi, medeniyet, örp-adet qimmetlirini qoghdashta bir sep bolalaydighanliqimizni ipadileydighan birinchi qedem”.

Istanbulda ötküzülgen qurban héytni tebriklesh pa'aliyitide sherqiy türkistan ma'arip we hemkarliq jem'iyiti re'isi hidayetullah oghuzxan söz qildi. 2022-Yili 11-iyul, türkiye.
Istanbulda ötküzülgen qurban héytni tebriklesh pa'aliyitide sherqiy türkistan ma'arip we hemkarliq jem'iyiti re'isi hidayetullah oghuzxan söz qildi. 2022-Yili 11-iyul, türkiye.
RFA/Arslan

Hidayetullah oghuzxan sözide yene Uyghur diyaridiki türmilerde, lagérlarda zulum chékiwatqan Uyghurlarning chet'ellerge chiqip ketken Uyghurlardin ümid kütidighanliqini xatiriletti we chet'ellerde yashawatqan Uyghurlarning her birining öz wetinining bir wekili, bir elchisi bolup bu jehettiki mes'uliyitini ada qilishi kéreklikini tekitlidi.

Pa'aliyette yene sherqiy türkistan ölimalar birlikining re'isi doktur atawulla shahyar söz qilip, Uyghurlarning qurban héytini tebriklidi we qurban héytini tebrikleshni bir oyun-tamasha dep qarimastin belki öz-ara yardemlishish we ibadet dep bilish kéreklikini tekitlidi.

Doktur atawulla shahyar sözide yene qurban héytining Uyghurlarning ming yildin buyan dawam qilip kéliwatqan milliy bayrimi ikenlikini tekitlep mundaq dédi: “Qurban héyt biz Uyghur xelqining ming yillardin biri bizning milliy pütünlükimizge, milliy kimlikimizge ornap ketken bir bayrimimiz bolup, bu hem bir ibadet, hem millitimizning birlikte milliy örüp-adetlirimizni, milliy kimlikimizni yashnitishning eng muhim bir pa'aliyiti”.

U sözide yene qurbanliq qilishning ehmiyiti toghrisida toxtilip mundaq dédi: “Qurbanliq qilish eng qimmetlik mal-mülkimizni alla yolida pida qilish, bu arqiliq allagha yéqinlishishni izhar qilish dégenlik bolidu”.

Kéyin yash ösmür balilar sehnige chiqip qurban héytqa munasiwetlik shé'ir déklamatsiye qildi.

Pa'aliyetke qatnashqan yesewiy alperenler teshkilatining re'isi kurshat mijan, türk zhurnalist xalis özdémir qatarliqlar söz qilip Uyghurlarning qurban héytini tebriklidi we qoshumche qilip, sherqiy türkistan mesilisi toghrisida pikir bayan qilip her waqit Uyghurlarni qollap yénida bolidighanliqini ipadileshti.

Héytlishish pa'aliyiti jeryanida jama'et erbabi abduqadir yapchan söz qilip Uyghurlarning qurban héytini tebriklidi we mundaq dédi: “Bügün bu yerde héytlishish munasiwiti bilen sherqiy türkistanliqlar yighilghan bir kün, lékin, bügün sherqiy türkistanda xelqimiz, qérindashlirimiz zulumgha uchrap türmining ichide, lagérlarda azab chékiwatqanliqi üchün bügün bu xursenlik künde bizning könglimiz yérim boluwatidu”.

U sözide bügün héytni tebrikleshtin ibaret xushalliq kün bolsimu qérindashlirimiz zulum chékiwatqanliqi üchün biz xushal bolalmay könglimiz yérim boluwatidu, dédi.

Pa'aliyet jeryanida yash-ösmürlerni xushal qilish üchün héytliq hediye tarqitildi.

Pa'aliyet axirida balilar üchün Uyghurlar we sherqiy türkistanning tarixi, jughrapiyesi we rehberliri toghrisida so'al-jawabliq zéhin sinash musabiqisi ötküzüldi. So'allargha toghra jawab bergenlerge neq pul bilen mukapat tarqitildi.

Pa'aliyet tamaq ziyapitidin kéyin xushal keypiyat ichide axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.