Атақлиқ журналист қурбан мамутниң 15 йиллиқ кесиветилгәнлики тутулуп 5 йилдин кейин айдиңлашти

Мухбиримиз шөһрәт һошур
2022.03.30
Share on WhatsApp
Share on WhatsApp
Бир адәмниң бинаси Уйғур дияридики тәсири әң күчлүк нопузлуқ журнал - “шинҗаң мәдәнийити” ниң баш муһәррири, 70 яштин ашқан қурбан мамут әпәнди. 2017-Йили феврал, вашингтон.
Photo: RFA

Хитай даирилири 2017-йилидики чоң тутқундин кейин кесилгәнләрниң мутләқ көп қисминиң җаза муддитини җәмийәт вә мәһкум аилисидин сир тутуп кәлмәктә. Атақлиқ журналист қурбан мамутму учури интайин аз вә қейинда елиниватқан мәһкумлардин бири. Қурбан мамутниң америкадики оғли бәһрам синташниң йеқинда хәвәр тепишичә вә мухбиримизниң телефон зиярәтлиридә дәлиллинишичә, у 15 йиллиқ кесиветилгән. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Уйғур районидики нопузлуқ журнал “шинҗаң мәдәнийити” ниң баш муһәррири болған қурбан мамутниң америкадики оғли бәһрам синташ йеқинда дадисиниң 15 йиллиқ кесиветилгәнлики һәққидә учур алған. Бу учурни униң үрүмчидики һәдиси алаһидә йәткүзгән. Учур мәһкумниң аилә әзалиридин кәлгәнлики үчүн, ишәнчлик саналсиму, әмма биваситә әмәс, васитилик кәлгәнлики үчүн, мәзкур учурниң тоғрилиқи һәққидә ениқлаш елип бардуқ.

Қурбан мамутниң хизмәт орни тәвә болған үрүмчидики мәдәнийәт мәмури органлири, униң һәққидә учур беришни рәт қилди.

Қурбан мамут уйғур райондики мәшһур шәхсләр ичидә учури елиниши қийин вә интайин чәклик болған мәһкумлардин бири. Униң оғли бәһрам синташ, 2017-йилдин буян дадиси һәққидә гуваһлиқ баянати бериш, ахбарат зияритини қобул қилиш, әһвални алақидар органларға мәлум қилиш қатарлиқ шәкилләрдә униң из-дерикини қилип баққан болсиму, бу урунушларниң асасән дегүдәк нәтиҗиси болмай кәлгән. Өткән йили радийомиз тәрипидин елип берилған телефон зиярәтлири давамида, қурбан мамутниң бир хитай хизмәтдиши, униң тутқунда икәнликини ашкарилиған. Ғайиб болуп 4 йилдин кейин тутқунда икәнлики дәлилләнгән қурбан мамутниң зади нәдә тутуп турулуватқанлиқи вә кесилгән-кесилмигәнлики йәнила сир пети қелип қалғаниди. Қурбан мамутниң мәзкур хизмәтдиши, униң кесилгән-кесилмигәнлики һәққидики соалимизға җавабән, бу һәқтә аилисидин учур елишимизни тәвсийә қилған.

Бәһрам синташ пәқәт һәдисиниң үндидарини васитилик көзитиш, тонуш-билишләр арқилиқ аилә әһвалини йирақтин сүрүштә қилиш йоли билән һәдиси вә аписиниң сиртта икәнликидин хәвәр тапқан болсиму, лекин дадиси һәққидә йәнила һечқандақ учурға еришәлмигән. У йеқинда еришкән дадисиниң 15 йиллиқ кесиветилгәнлики учури, дадиси тутулғандин кейинки 5 йиллиқ урунушлири нәтиҗисидә, аилисидин алалиған бирдин бир учур һесаблиниду.

Үрүмчи шәһиридики бир дөләт аманлиқ әтрити хадиму, қурбан мамутниң кесим муддити һәққидә хәвири барлиқи, әмма, рәһбәрлиридин рухсәт алмай туруп бу һәқтә учур берәлмәйдиғанлиқини баян қилди.

Илгирики ениқлашлиримиз давамида қурбан мамутниң җаза һөкүми һәққидә учур елинмиған. Мәлум болушичә, даириләр 2017-йилдин кейинки чоң тутқунда тутқунларниң көпинчисини, нопуси қәйәрдә болушидин қәтийнәзәр өзи туғулуп өскән юртидики лагерларға йоллиған болса, йәнә бир қисминиң сот учурлирини әсли юртидики сақчиханиларға мәлум қилған. Шуңа биз қурбан мамутниң кесим муддитини ениқлаш үчүн, униң юрти болған кучадики бир сақчиханиға телефон қилдуқ. Қурбан мамутниң қериндашлиридин әхмәт мамут вә нурниса мамутниң пәрзәнтлири олтурушлуқ 7-район тәвәликидики сақчи хадимлиридин бири қурбан мамутниң 15 йиллиқ кесилгәнликидин хәвири барлиқини ашкарилиди.

Телефонимизни қобул қилған үрүмчи оттура сот мәһкимиси хадимиму, қурбан мамутниң 15 йиллиқ кесилгәнликини дәлиллиди. Әмма хизмәт орниға йеңи икәнликини билдүрүп, униң қайси түрмидә җаза муддитини өтәватқанлиқини дәп бәрмиди.

Юқирида, атақлиқ журналист қурбан мамутниң 15 йиллиқ кесилгәнликиниң дәлилләнгәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт