Ataqliq zhurnalist qurban mamutning 15 yilliq késiwétilgenliki tutulup 5 yildin kéyin aydinglashti

Muxbirimiz shöhret hoshur
2022-03-30
Share
Bir ademning binasi Uyghur diyaridiki tesiri eng küchlük nopuzluq zhurnal - “Shinjang medeniyiti” ning bash muherriri, 70 yashtin ashqan qurban mamut ependi. 2017-Yili féwral, washin'gton.
Photo: RFA

Xitay da'iriliri 2017-yilidiki chong tutqundin kéyin késilgenlerning mutleq köp qismining jaza mudditini jem'iyet we mehkum a'ilisidin sir tutup kelmekte. Ataqliq zhurnalist qurban mamutmu uchuri intayin az we qéyinda éliniwatqan mehkumlardin biri. Qurban mamutning amérikadiki oghli behram sintashning yéqinda xewer tépishiche we muxbirimizning téléfon ziyaretliride delillinishiche, u 15 yilliq késiwétilgen. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Uyghur rayonidiki nopuzluq zhurnal “Shinjang medeniyiti” ning bash muherriri bolghan qurban mamutning amérikadiki oghli behram sintash yéqinda dadisining 15 yilliq késiwétilgenliki heqqide uchur alghan. Bu uchurni uning ürümchidiki hedisi alahide yetküzgen. Uchur mehkumning a'ile ezaliridin kelgenliki üchün, ishenchlik sanalsimu, emma biwasite emes, wasitilik kelgenliki üchün, mezkur uchurning toghriliqi heqqide éniqlash élip barduq.

Qurban mamutning xizmet orni tewe bolghan ürümchidiki medeniyet memuri organliri, uning heqqide uchur bérishni ret qildi.

Qurban mamut Uyghur rayondiki meshhur shexsler ichide uchuri élinishi qiyin we intayin cheklik bolghan mehkumlardin biri. Uning oghli behram sintash, 2017-yildin buyan dadisi heqqide guwahliq bayanati bérish, axbarat ziyaritini qobul qilish, ehwalni alaqidar organlargha melum qilish qatarliq shekillerde uning iz-dérikini qilip baqqan bolsimu, bu urunushlarning asasen dégüdek netijisi bolmay kelgen. Ötken yili radiyomiz teripidin élip bérilghan téléfon ziyaretliri dawamida, qurban mamutning bir xitay xizmetdishi, uning tutqunda ikenlikini ashkarilighan. Ghayib bolup 4 yildin kéyin tutqunda ikenliki delillen'gen qurban mamutning zadi nede tutup turuluwatqanliqi we késilgen-késilmigenliki yenila sir péti qélip qalghanidi. Qurban mamutning mezkur xizmetdishi, uning késilgen-késilmigenliki heqqidiki so'alimizgha jawaben, bu heqte a'ilisidin uchur élishimizni tewsiye qilghan.

Behram sintash peqet hedisining ündidarini wasitilik közitish, tonush-bilishler arqiliq a'ile ehwalini yiraqtin sürüshte qilish yoli bilen hedisi we apisining sirtta ikenlikidin xewer tapqan bolsimu, lékin dadisi heqqide yenila héchqandaq uchurgha érishelmigen. U yéqinda érishken dadisining 15 yilliq késiwétilgenliki uchuri, dadisi tutulghandin kéyinki 5 yilliq urunushliri netijiside, a'ilisidin alalighan birdin bir uchur hésablinidu.

Ürümchi shehiridiki bir dölet amanliq etriti xadimu, qurban mamutning késim mudditi heqqide xewiri barliqi, emma, rehberliridin ruxset almay turup bu heqte uchur bérelmeydighanliqini bayan qildi.

Ilgiriki éniqlashlirimiz dawamida qurban mamutning jaza hökümi heqqide uchur élinmighan. Melum bolushiche, da'iriler 2017-yildin kéyinki chong tutqunda tutqunlarning köpinchisini, nopusi qeyerde bolushidin qet'iynezer özi tughulup ösken yurtidiki lagérlargha yollighan bolsa, yene bir qismining sot uchurlirini esli yurtidiki saqchixanilargha melum qilghan. Shunga biz qurban mamutning késim mudditini éniqlash üchün, uning yurti bolghan kuchadiki bir saqchixanigha téléfon qilduq. Qurban mamutning qérindashliridin exmet mamut we nurnisa mamutning perzentliri olturushluq 7-rayon tewelikidiki saqchi xadimliridin biri qurban mamutning 15 yilliq késilgenlikidin xewiri barliqini ashkarilidi.

Téléfonimizni qobul qilghan ürümchi ottura sot mehkimisi xadimimu, qurban mamutning 15 yilliq késilgenlikini delillidi. Emma xizmet ornigha yéngi ikenlikini bildürüp, uning qaysi türmide jaza mudditini ötewatqanliqini dep bermidi.

Yuqirida, ataqliq zhurnalist qurban mamutning 15 yilliq késilgenlikining delillen'genliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet