Қурбан нурниң лагерда көзи көрмәс болуп қелип, қоюп берилгәнлики ашкариланди

Биз өткән һәптә хәвирини бәргән маралбеши базар ичидики лагердин қоюп берилгән қурбан нурниң әһвали һәққидә йәниму илгириләп елип барған ениқлашлиримиз давамида, униң лагердин җаза муддити тошуп әмәс, бәлки көзидә еғир мәсилә көрүлүп қоюп берилгәнлики ашкариланди. Мәлум болушичә, униң көзиниң көрмәс болуп қелишиға лагерда техичә 45 кишиниң бир ятақта туруши вә аз һаваландуруш қатарлиқ начар шараитларниң сәвәб болғанлиқи айдиңлашти.

Маралбеши сериқбоя базарлиқ аманлиқ мудири тутқун қурбан нурниң 2 йил 2 айлиқ җаза муддити тошуп қоюп берилгәнликини мәлум қилған иди. Бу һәқтә йәниму илгириләп елип барған ениқлашлиримиз давамида, вәзийәттин хәвәрдар кишиләрдин бири, униң җаза муддити тошуп әмәс, бәлки көзидә еғир мәсилә көрүлүп лагердики мәшғулатларға маслишалмиғандин кейин қоюп берилгәнликини инкас қилди.

Телефонимизни қайта қобул қилған мәзкур аманлиқ мудири қурбан нур қоюп берилгәндә көзи асасән көрмәйдиған һаләттә чиққанлиқи вә уруқ-туғқанлириниң беқишиға тапшурулғанлиқини дәлиллиди. Униң дейишичә, лагерға елип кетилиштин аввал әслидә көзидә һечқандақ мәсилә болмиған қурбан нур, дохтурханида бир һәптичә көзини давалатқан вә униңға көз томури қуруп кәткәнлик диягнози қоюлған.

Илгирики ениқлашлиримизда, лагерларда дәсләпки мәзгилләрдә көп санда кишиниң кичик бир камерда қистилип туридиғанлиқи вә һәтта тутқунларниң орунниң қислиқи сәвәбидин кечилири нөвәтлишип ухлайдиғанлиқи, кейинчә чоң көләмлик лагерлар селинғандин кейин, орун қислиқи йүз бәрмигәнлики тилға елинған иди. Әмма вәзийәттин хәвәрдар киши маралбешидики лагерларда йәнила көп санда кишиниң бир ятақта йетиватқанлиқи, бу ятақларда деризә йоқлуқи вә яки кичиклики сәвәбидин, ятақларға күн нури чүшмәйдиғанлиқи, бу ятақларда узун ятқан тутқунларниң көзидә мәсилә көрүлүватқанлиқини инкас қилди. Мәзкур аманлиқ мудири, қурбан нурниң маралбешидики лагерда 15 киши билән бир ятақта ятқанлиқини тилға алди. Әмма маралбешиниң сериқбоя базарлиқ сақчихана хадими, қурбан нурниң йеңи барғанда 25 киши билән, қоюп берилишниң алдида, 45 киши билән бир ятақта (камирда) ятқанлиқини ашкарилиди.

Маралбешидики мәлум бир дохтурхана хадими, қурбан нурниң көзидин мәсилә чиқип дохтурханида ятқанлиқини дәлиллигән болсиму, әмма бу көз зәхмисиниң лагерниң муһити билән болған мунасивити һәққидә мәлумат берәлмиди.

Иҗтимаий таратқулардики учурларда йеқинқи йилларда лагер вә түрмидин чиққанларниң җисманий җәһәттин еғир зәип һаләттә икәнлики ечинишлиқ көрүнүштики сүрәтләрдин мәлум болған иди. Йәнә ениқлашлиримиз давамида корла шәһәрлик сақчи идариси үстидин тутуш буйруқи чиқарған “қачқун җинайәтчи” махмут мойдинниң түрмидики чидиғусиз азаб вә өлүм хәвпи сәвәблик түрмидин қачқанлиқи илгири сүрүлгән иди.

Юқирида өткән айда лагердин қоюп берилгән қурбан нурниң җаза муддити тошуп әмәс, бәлки күзи аҗизлишип кетип “тәрбийәләш” кә маслишалмиғанлиқи үчүн, қоюп берилгәнлики һәққидә мәлумат бәрдуқ.