Доктор раһилә давут хәлқаралиқ «тәпәккур җасарити» мукапатиға еришти

Мухбиримиз нуриман
2020-11-11
Share
rahile-dawut.jpg Тутқундики доктор раһилә давут. 2002-Йили, үрүмчи.
Photo: RFA

Баш шитаби нйо-йорктики «хәвп астидики алимларни қутқузуш» тәшкилати (Scholars at Risk) 10-ноябир күни тутқундики доктор раһилә давутқа 2020-йиллиқ хәлқаралиқ «тәпәккур җасарити» мукапатини бәргәнликини елан қилди.

«Хәвп астидики алимларни қутқузуш» тәшкилатиниң бу һәқтики баянатиға қариғанда, 2017-йили 12-айниң оттурилирида хитай даирилири тәрипидин тутқун қилинған вә һазирғичә из-дерики болмиған шинҗаң университети филологийә институтиниң профессори раһилә давутниң илмий тәтқиқат саһәсидә көрсәткән узун йиллиқ тиришчанлиқлири вә җасарити муәййәнләштүрүлүп, бу мукапатқа лайиқ көрүлгән икән.

«Хәвп астидики алимларни қутқузуш» тәшкилатиниң тор бетидә «раһилә давут вә униңға охшаш җасарәт билән тәтқиқат илип бериватқан башқа мутәхәссисләр вә оқуғучилар илим-пән әркинлики, пикир әркинлики үчүн тиришчанлиқ көрсәтмәктә. Шу вәҗидин ‹тәпәккур җасарити' мукапати уларға лайиқ көрүлди,» дейилгән.

«Тәпәккур җасарити» мукапати кәспий яки аммиви мулазимәт саһәлиридә өзиниң шәхсий бихәтәрликини қайрип қоюп, илмий тәтқиқат әркинлики вә тәпәккур әркинликни қоғдаш йолида җасарәт көрсәткән шәхс, гуруппа яки органларға берилидикән.

«Хәвп астидики алимларни қутқузуш» тәшкилатиниң ниң иҗраийә мудири роб куин мундақ дегән: «уйғур мәдәнийәт тәтқиқати бойичә хәлқарада тонулған тәтқиқатчи доктор раһилә давутниң түрмигә ташлиниши хитай һөкүмитиниң өзи яқтурмайдиған аваз вә пикирләрни очуқ-ашкара бастуридиғанлиқини ашкарилиди. Хитай һөкүмитиниң доктор раһилә давутниң илмий паалийәтлирини вә әркин пикир қелишини чәклиши, уларниң аз санлиқ милләтләрниң әнәниси, тарихи вә тилини йоқитишқа уруниватқанлиқини көрситиду. Доктор раһилә давутниң из-дерәксиз йоқап кетишигә охшаш бундақ паҗиәләргә нисбәтән һәммәйләнниң наразилиқ билдүрүш мәсулийитимиз бар. Бундақ вәһшийликни чоқум ахирлаштурушимиз керәк.»

Доктор раһилә давутниң америкада турушлуқ қизи әқидә полат аписи һәққидә пикир баян қилип, мундақ дегән: «апам җинайәтчи әмәс, бәлки бир алим. У уйғур миллитиниң фолклор вә мәдәнийәт әнәнисини тәтқиқ қилған. Бу һөкүмәткә, башқа органларға яки хитай хәлқигә тәһдит әмәс.»

Биз 2020-йиллиқ хәлқаралиқ «тәпәккур җасарити» мукапатиниң саһиби доктор раһилә давут ханим һәққидә техиму яхши мәлуматқа иришиш үчүн қизи әқидә билән сөһбәт өткүздуқ.

Әқидә аписиниң наһайити ирадилик вә миллитини сөйидиған бир тәтқиқатчи икәнликини, шуниң билән бир вақитта йәнә өз пәрзәнтигә наһайити тәләпчан вә меһрибан бир ана икәнликини өзиниң балилиқ әслимилири билән аңлатти.

Әқидә радийо долқунлири арқилиқ аписини тәбрикләп, мундақ деди: «апа, сән бәкму қәһриман бир ана икәнсән, ғәйрәт қилғин, биз сени ашу қараңғулуқтин елип чиқмиғучә һәргизму ваз кәчмәймиз!»

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт