Lagér shahiti sayragülning kechmishliri bayan qilin'ghan kitab in'gilizchigha terjime qilindi

Shiwétsiyede yashawatqan lagir shahiti sayragül xanimning xitayning ghuljadiki jaza lagéri heqqide özi körgen ehwallar bayan qilin'ghan kitabning én'gilizche terjimisining 2021-yili 13-yanwar küni neshrge tapshurulghanliq xewiri tarqaldi. Bu munasiwet bilen radiyomiz Uyghur bölümi 21-yanwar küni sayragül xanim bilen mexsus söhbet ötküzdi.

Sayragül xanimning bildürüshiche, mezkur kitap 2020-yili 6-ayning 22-küni deslep bérlinda yawropa wérlag neshriyati teripidin gérman tilida neshr qilin'ghan iken. Uning béshidin ötken kechmishlirini aghzakiy bayan qilishi asasida gérmaniyelik yazghuchi aliksandra kawilé'us xanim mezkur kitanning gérmanche nusxisini qelemge alghan iken. Mezkur kitabning én'gilizche terjime nusxisi en'giliye we awstraliyediki skribé wérlag (Scribe Verlag) neshriyatining orunlashturushi bilen karolin wayt (Caroline Waight) teripidin terjime qilin'ghan iken. Melum bolushiche, bu kitabning in'gilizche nusxisi 2021-yili 5-ayning 13-küni neshrdin chiqip tarqitilidiken.

Mezkur kitab heqqide toxtalghan sayragül xanim, uningda özining ghuljadiki atalmish “Téxnika terbiyelesh mektipi” de oqutquchi bolup ishligen mezgilide öz közi bilen körgen heqiqiy ehwallarni eynen bayan qilin'ghanliqini bildürdi.

U özige oxshash lagér shahitliri teminligen pakitliq deliller taratqularda köplep ashkarilan'ghandila, andin sherqiy türkistanda yüz bériwatqan insaniyetke qarshi jinayet, yeni érqiy qirghinchiliqning heqiqiy ehwalidin dunyani xewerdar qilghili we xitay hökümitige qarshi tedbir qollan'ghili bolidighanliqini tekitlidi.

Sayragül xanim yene 19-yanwar küni amérikaning aldinqi nöwetlik tashqiy ishlar minstéri mayk pompiyo xitay hökümitining Uyghurlargha qarita yürgüzgen zulumlirini “Irqiy qirghinchiliq”, “Insaniyetke qarshi jinayet” dep élan qilghinida, özining bir lagér shahiti bolush süpiti bilen qattiq hayajanlan'ghanliqini, shundaqla kelgüsige nisbeten ümid peyda bolghanliqini bildürdi.

2017-Yili xitayning ghuljadiki lagérida oqutquchiliq qilghan sayragül sawutbay, 2018-yili 4-ay mezgilide qazaqstan bilen xitay arisida qurulghan qorghas baziri arqiliq qazaqstan'gha qéchip chiqqan. Sayragül qazaqstandiki mezgilde köpligen taratqularning ziyaritini qobul qilip, xitayning ghuljadiki atalmish “Qayta terbiyilesh kursi” dep atiwalghan lagérda özi körgen ehwallarni dunyagha ashkarilighan we xelq'arada zor tesir qozghighan. Qazaqstandiki mezgilide xitay hökümitining her xil tehditlirige duch kelgen sayragül sawutbay xelq'ara teshkilatlarning yardimi arqiliq 2019-yili 6-ayda siyasiy panahliqi qobul qilinip, a'ilisi bilen birlikte shiwétsiyege kélip yerleshken. Sayragül sawutbay shundin buyan yawropa we amérikadiki xelq'ara teshkilatlar hemde amérika hökümitining teklipi bilen amérikagha kélip, lagérda körgen-bilgenliri heqqide guwahliq bergen. Sayragül xanim xitay hökümitining her xil bésim-tehditlirige qarimay xitay hökümitining ghuljadiki jaza lagérida yüz bergen ehwallarni dunyagha ashkarilighanliqi üchün, amérika hökümiti 2020-yili3-ayning 4-küni uninggha “Jasaretlik ayal” mukapati bergen idi.