Ressam sabitjan babajanofning “Hayat yoli” namliq körgezmisi échildi

Qirghizistan paytexti bishkek shehiride 82 yashliq meshhur ressam sabitjan kamal oghli babajanofning shexsiy körgezmisi échildi. “Hayat yoli” dep atalghan mezkur körgezme sen'etchiler öyide 3-mart bashlan'ghan bolup, 12-martqiche dawam qilidu. Körgezmide grafik uslubida sizilghan qirghiz we Uyghur xelqlirining hayatigha munasiwetlik resimler tamashibinlarning huzurigha sunuldi. Ijadiyet pa'aliyitige qirghizistan jumhuriyitining sen'itige emgek singdürgen erbab assol moldaqmatowa, qirghizistan süretchiler ittipaqi wekilliri, muxbirlar, sen'etsöyerler we köp sanda jama'et erbabliri qatnashti. Assol moldaqmatowa shu körgezmidin tesirlinip özining instagram tor sehipiside “Sabitjan babajanofdek ressam dölet mirasidur” dep yazghan. Mezkur körgezmige qatnashqan qirghizistan Uyghurliri ittipaq jem'iyitining ezasi abduméjit hüseynof ziyaritimizni qobul qilip sabitjan babajanofning Uyghur xelqining örp-adetlirini süretliri arqiliq tonushturwatqanliqini tekitlep uni “Nahayiti méhnetkesh ressam” dep atidi.

RFA/Féruze

Péshqedem ressam her yili özining shexsiy körgezmiliri bilen jama'etni söyündürüp turidu. U, qirghizistan sen'itige qoshqan hessiliri üchün 1993 yili qirghizistan hökümiti teripidin “Emgek singdürgen ressam” dégen aliy mukapatqa érishkenidi. U, 2016-yili moskwa shehiride ötküzülgen xelq'araliq körgezmige qatniship rus xelqige Uyghur dewasini medeniyet arqiliq tonushturghanidi. Sabitjan ependi Uyghur xelqining medeniyet bayliqi we edep-exlaq en'enisini ilgiri sürüshke qoshqan töhpiliri üchün qirghizistan Uyghurliri “Ittipaq” jem'iyiti teripidin “Éhsan” médali bilen mukapatlan'ghanidi.

Melumki sabitjan babajanof türlük maharetler bilen resim sizghan. U, özining her bir körgezmiside mana shu maharetler bilen sizilghan eserlirini namayan qilidu. Sabitjan babajanof mezkur körgezmide grafik uslubida sizghan eserlirini körsitish bilen birge özining 80 yashliqigha béghishlighan “Karwan izida” dep atalghan resim kitabchisini tarqatti. Bu kitabchidiki eserlerde ressamning weten söygüsi we hesriti alahide közge chéliqidu. Ziyaritimizni qobul qilghan sabitjan babajanof körgezme we resim kitabchisi toghrisida toxtilip, öz eserliride Uyghur éli témisining alahide orun alghanliqini tekitlidi.

RFA/Féruze

Sabitjan babajanofning ijadiyitide pelsepe, tebi'et we weten témiliri muhim rol oynaydu. Körgezmini ziyaret qilghan sen'et söyerler sabitjan babajanofning ijadiyitini yuqiri bahalap, uning eserlirining Uyghur ewladlirini öz xelqining tarixini öginishke ilhamlanduridighanliqini bildürüshti.

Qirghizistan Uyghurliri bu dölette yashawatqan bashqa milletler bilen bir qatarda, özlirining talanti we tirishchanliqi bilen her qaysi sahelerde muweppeqiyet qazanmaqta. Qirghizistan Uyghurliridin akadémik merhum eziz narinbayéf, méditsina proféssori nurmuhemmed babajanof, putbol cholpini yüsüp musayéf, chélishish mahiri farxad hushurof, qirghizistan xelq artisi sultan karimof we bashqilarmu pütün jumhuriyetke, ottura asiyagha yaxshi tonulghanidi.

Sabitjan babajanofning namimu ottura asiyadiki ressamlar arisigha uzundin buyan tonushluqtur.