Amérika prézidéntining bu yilliq dölet weziyitidin melumat bérish nutuqigha tunji qétim Uyghur wekili qatnashti

Muxbirimiz qutlan
2020-02-04
Élxet
Pikir
Share
Print
Amérika prézidénti donald tramp dölet weziyiti boyiche melumat bérish murasimida nutuq sözlimekte. 2020-Yili 4-féwral. Washin'gton d.S., amérika.
Amérika prézidénti donald tramp dölet weziyiti boyiche melumat bérish murasimida nutuq sözlimekte. 2020-Yili 4-féwral. Washin'gton d.S., amérika.
c-span.org

Washin'gton waqti 4-féwral kech sa'et 21:00 de amérika prézidénti trampning dölet weziyiti boyiche melumat bérish nutuq murasimi amérika dölet mejliside ötküzüldi. Murasimgha amérika dölet mejlisining awam palatasi bilen kéngesh palatasigha mensup barliq ezaliri, aqsaraydikiler, yoqiri derijilik herbiy emeldarlar, amérika aliy soti hemde fédéral hökümetning yoqiri derijilik xadimliri bolup, nurghun kishi qatnashti.

Amérika prézidéntining bu yilliq dölet weziyitidin melumat bérish boyiche nutuq sözlesh murasimigha amérikadiki Uyghur pa'aliyetchi, "Uyghur herikiti" teshkilatining re'isi roshen abbas xanim qatnashti. Bu Uyghurlarning tunji qétim amérika prézidéntining dölet weziyitidin melumat bérish nutuq murasimigha qatnishi bolup hésablinidiken.

Amérika prézidénti tramp bu yilliq dölet ehwalidin melumat bérish nutuqida amérika iqtisadining yéqinqi 3 yildin buyan izchil örlesh halitini dawamlashturup kéliwatqanliqini alahide tekitlidi. U amérika qoshma shitatlirining tashqiy sodida, bolupmu xitay bilen bolghan "Soda urushi" da xitayning uzun yillardin buyan amérikadin paydillinish, amérikaning eqliy mülüklirini oghrilash qatarliq bir qatar qilmishlirigha ünümlük chek qoyghanliqini, xitaygha "Yéter emdi" dégenlikini eskertip ötti. 

Trampning bu qétimliq nutuqi uning aqsaraygha kirgendin buyan amérika dölet mejliside dölet ehwalidin melumat bérish boyiche sözligen üchinchi qétimliq muhim sözi iken. U ötken yili sözligen sözide amérikaning "Büyüklükni tallash" ni tekitligen bolup, bu yilliq sözide nahayiti ishench bilen "Amérikaning büyüklikini qayta qurup chiqtuq," dédi. U nutuqida yene amérikaning xelq turmushi, ma'arip, saqliqni saqlash, köchmenler, qoshna eller bilen bolghan munasiwet, dölet bixeterliki we dunya démokratiyesini qoghdash qatarliq jehetlerdiki eng yéngi yüzlinishlirini tilgha élip ötti. 

Igilinishiche, roshen abbas xanim bu murasimigha amérika kéngesh palatasi ezasi marko rubiyoning alahide méhmini süpitide qatnashqan. Marko rubiyo özining bügün élan qilghan bayanatida amérika prézidéntining bu yilliq dölet ehwalidin melumat bérish murasimigha Uyghur pa'aliyetchisi roshen abbas xanim bilen filorida shitatining bashliqi jenét nunézni özining alahide méhmini süpitide teklip qilghanliqini bildürdgen.

"Uyghur herikiti" teshkilatining re'isi roshen abbas xanim yéqinqi yillardin buyan xitay hökümitining Uyghur diyarida qurghan yighiwélish lagérlirini taqash we lagérlargha qamalghan Uyghur tutqunlarning qiyin ehwalini dunyagha anglitish jehette aktip pa'aliyetlerni élip barmaqta. Uning amérika démokratiyesining nahayiti muhim en'enisi hésablinidighan bu murasimigha teklip bilen qatnishishi muhajirettiki Uyghur jama'itini söyündürmekte. Amérika qoshma shitatliri prézidéntining dölet ehwalidin melumat bérish nutuq murasimi (State of the Union) amérika hökümitining her yilliq xizmet kaléndarining bashlinidighan küni ötküzülidighan bolup, uningda amérika prézidénti amérika awam palatasi bilen kéngesh palatasining barliq ezalirigha amérikaning dölet ehwalidin yilliq melumat béridiken.

Pikirler (1)
Share

Uyghurjan

Din Qeshqer

Qatnashqanliqi muhim emes , yighinda Uyghurlar toghrisida néme qarar élindi bu muhim.
Ministirlar bilen uchrishish we yaki ministirlarning yighinigha qatnishish chet'ellerdiki Uyghurlarning hazir adettiki ishqa aylinip qaldi....

Feb 05, 2020 06:37 PM

Toluq bet