Roshen abbas: “Uyghurlar: xitayning jaza lagérliri ünsiz dunyada”
2019.05.29
Amérika hökümiti yéqindin buyan Uyghurlarning weziyitige yéqindin köngül bölüp, uning xelq'arada küntertipke kélishi üchün zor tirishchanliqlarni körsitiwatqan bir mezgilde, awstriyening paytexti wiyénna shehiridiki amérika elchixanisi 28-may Uyghur weziyiti tonushturulghan bir doklat bérish yighini uyushturdi.
Mezkur yighin'gha munasiwetlik uchur awstriyede turushluq amérika elchixanisining feysbok bétide élan qilin'ghan bolup, bu awstriyediki “Amérika medeniyet sariyi” da échilghan. Buninggha amérikadiki “Uyghur herikiti” teshkilatining diréktori roshen abbas xanim qatnashqan we “Uyghurlar: xitayning jaza lagérliri ünsiz dunyada” dégen témida doklat bergen.
U bügün, yeni 29-may radiyomiz ziyaritini qobul qilip, yighinning tepsilati heqqidiki so'allirimizgha jawab berdi. Roshen abbas xanim doklatning mezmuni heqqide qisqiche chüshenche berdi. Uning déyishiche, xitay hökümitining Uyghur diyarida élip bériwatqan “Irqiy qirghinchiliqi” gha xelq'ara jem'iyetning inkassiz turuwatqanliqi, bu xil weziyetke choqum bir konkrét tedbirning otturigha chiqishi lazimliqi doklatning muhim témisi bolghan iken.
29-May awstiriyede turushluq amérika elchixanisining twittir bétide bu qétimliq doklat bérish yighini heqqide qisqiche bayanat élan qilin'ghan bolup, uningda “‛Uyghur herikiti‚ teshkilatining bashliqi roshen abbas tünügün kechte awstiriyediki ‛amérika medeniyet sariyi‚ da sözligen nutqida, xitayning Uyghur rayonidiki Uyghurlar uchrawatqan ziyankeshlikler heqqide tepsiliy chüshenche berdi” dep yézilghan.
Roshen abbas xanim yighinning so'al-jawab basquchi heqqide toxtilip, yighin'gha ishtirak qilghan nopuzluq erbablarning uningdin Uyghurlar weziyitining xelq'arada toluq küntertipke kélelmigenlikning sewebi heqqide herxil so'allarni sorighanliqini sözlep ötti.
Bu qétimliq yighin'gha anglighuchi süpitide qatnashqan “Awstriye Uyghur jem'iyiti” ezaliridin mezkur jem'iyetning teshkilat bölüm bashliqi mewlan dilshatmu radiyomiz ziyaritini qobul qilip, yighin'gha qatnashqan kishilik hoquq pa'aliyetchilirining Uyghurlargha hésdashliq bildürgenlikini éytip ötti.
Mewlan dilshatning sözliridin melum bolushiche, doklat bérish yighinining so'al-jawab basquchida bir-ikki xitay meydan'gha kirip, “Uyghurlarning nöwette lagérlargha yaki türmilerge solinishi xitay hökümitining ‛irqiy qirghinchiliq‚ élip bériwatqanliqini ispatliyalmaydu” déyish arqiliq, roshen abbas xanimning sözlirige qarshiliq bildürgen iken.
Roshen abbas xanimning bildürüshiche, 30-may u yene chéx jumhuriyitining paytexti piraga shehiride Uyghur mesilisi heqqide doklat béridiken.