Sabiq mehbus memettursun osman: "Qéyin-qistaqtin qutulush üchün özümni 'jihatchi' dep iqrar qildim"

Muxbirimiz shöhret hoshur
2019-07-01
Élxet
Pikir
Share
Print
Ezherdiki esnem Uyghur ashxanisining ashpizi memettursun osman ependi.
Ezherdiki esnem Uyghur ashxanisining ashpizi memettursun osman ependi.
RFA/Shöhret Hoshur

2016- We 2017-yilliri misirdin qaytqan we qayturulghan Uyghurlar arisida ezherdiki esnem Uyghur ashxanisining ashpizi memettursun osmanmu bar bolup, u 2017‏-yili xotende tutqun qilin'ghan. U qamaqta misirdiki hayati heqqide qattiq so'al-soraqqa we éghir qéyin-qistaqqa uchrighan. U gerche misirda 6 ayche ashpezlik qilghan, uningdin bashqa héchqandaq pa'aliyetke qatnashmighan bolsimu, emma soraq jeryanda özining jihad heqqide tebligh anglighanliqi we xoten'ge wezipe bilen qaytqanliqi heqqidiki iqrarnamige qol qoyushqa mejburlan'ghan. Töwende bu jeryanni sabiq mehbus memet tursun osmanning öz éghizidin anglaysiler.

Xitay qamaqxanisidin özining hayatini qutquzush we qamaqxanidiki ehwallarni dunyagha ashkarilash üchün xitayning chet'elde turup jasusluq qilish teklipini qobul qilghan hemde ötken yili xitay saqchiliri teripidin dubeyge yolgha sélin'ghan. Dubeyge barghandin kéyin heqiqiy ehwalni dadisigha ashkarilap, xitay bilen chek-chégrisini ayrighan sabiq mehbus memettursun osman söhbitimizning bügünki qismida özining xoten qamaqxanisidiki mezgilde duch kelgen so'al-soraq we qéyin-qistaqliri heqqide toxtaldi.

Uning déyishiche, saqchilar uni aldi bilen "Misirda din oqughanliqi" ni iqrar qilishqa mejburlighan. U buni inkar qilghandin kéyin "Misirda diniy tebligh anglighanliqi" ni iqrar qilishqa qistalghan. U saqchilarning peyli we kamirdashlirining kechürmishilirige asasen soraqta saqchilar kütken jawabni bermigüche qéyin-qistaqning tügimeydighanliqi we bu qamaqxanida jismaniy jehettin tügishidighanliqini perez qilghan. Shunga axiri saqchilar éghizigha sélip bergen jawablarni tekrarlashqa, yeni atalmish "Jinayiti" ni iqrar qilishqa mejbur bolghan.

Memettursun osmanning déyishiche, bu qamaqxanidiki barliq tutqunlar duch kelgen ehwal bolup, tutqunlar özliri ötküzmigen, eksiche saqchilar layihelep chiqqan bir jinayet xatirisige qol qoyush we bu atalmish "Jinayiti" ge chet'elde yashawatqan birlirini shérik qilip körsitish arqiliq qéyin-qistaqtin qutulghan. Misirdiki hayatida qazan béshi bilen yatiqi arisidin nérigha bérishqa waqti yetmigen memettursun osman özining jihadqa alaqidar tebligh anglighanliqi heqqidiki iqrarnamige qol qoyghan. Gerche u xoten'ge dadisining tosushigha qarimay yurtini séghinip qaytip kelgen bolsimu, emma özining xoten'ge atalmish "Térrorchilar tapshurghan wezipe" bilen kirgenlikini iqrar qilghan. Yeni u xoten'ge chet'elde din oqushni xalaydighanlarni tépish we yolgha sélish üchün kelgenlikini bayan qilghan.

Yuqirida misirdin qaytip tutqun qilin'ghan Uyghurlardin ashpez memettursun osmanning xoten qamaqxanisida bashtin kechürgen so'al-soraq we qéyin-qistaqliri heqqide melumat berduq.

Toluq bet