Үрүмчи шәһәрлик җ х идарисиниң муавин башлиқи җүрәт ибраһимниңму тутқунда икәнлики ашкариланди

Мухбиримиз шөһрәт һошур
2019-09-18
Елхәт
Пикир
Share
Принт
Үрүмчи шәһәрлик  җ х идарисиниң муавин башлиқи җүрәт ибраһимниң 2014-йили хизмәт көрситип мукапатланған көрүнүши.
Үрүмчи шәһәрлик җ х идарисиниң муавин башлиқи җүрәт ибраһимниң 2014-йили хизмәт көрситип мукапатланған көрүнүши.
xinjiangnet.com.cn

Үрүмчи шәһәрлик җ х идарисиниң сабиқ муавин башлиқи қадир мәмәтниң тутулғанлиқи һәққидики хәвиримиз елан қилинғандин кейин, вәзийәттин хәвәрдар кишиләрдин бири, қадир мәммәттин икки һәптә аввал мәзкур идариниң йәнә бир муавин башлиқи җүрәт ибраһимниңму тутулғанлиқи вә бу иккисиниң делосиниң бир-биригә четишлиқ икәнликини мәлум қилди. Мухбиримизниң икки һәптидин буянқи телефон зиярәтлири давамида җүрәт ибраһимниң тутқунда икәнлики айдиңлашти.

Үрүмчидики юқири дәриҗилик кадирларниң вәзийитидин хәвәрдар кишиләрдин бириниң радийомизға инкас қилишичә, үрүмчи шәһәрлик җ х идарисиниң йәнә бир муавин башлиқи җүрәт ибраһимму буниңдин 3 айчә илгири тутулған. Хитай хәвәр архиплирида баян қилинишичә, җүрәт ибраһим 2014 ‏-йиллардин буян үрүмчи шәһәрлик җ х ирадиси парткомниң һәйәт әзаси вә шәһәрлик дөләт аманлиқ сақчи әтритиниң сиясий комиссари қатарлиқ вәзипиләрниму үстигә алған. Телефонимизни қобул қилған үрүмчи шәһиридики сақчи хадимлири, җүрәт ибраһим һәққидики һәрқандақ бир соалимизға җаваб бәрмиди.

Хитай тор архиплирида баян қилинишичә, үрүмчи шәһәрлик җ х идариси 2014 ‏-йили мәмликәт бойичә «хәлқ рази болған илғар коллектип» болуп баһаланған, җүрәт ибраһим шәһәрлик җ х идарисигә вакалитән мәзкур йиғинға қатнишип мукапат тапшурувалған. Телефонимизни қобул қилған үрүмчидики һәр дәриҗилик сақчи хадимлири җүрәт ибраһимниң нәдилики һәққидики соалимизға җаваб берәлмиди. Вәзийәттин хәвәрдар кишиниң радийомизға билдүрүшичә, җүрәт ибраһим сабиқ хизмәтдиши қадир мәмәттин икки һәптә бурун тутулған. Вәзийәттин хәвәрдар кишиниң инкасида бу икки муавин башлиқниң җ х саһәсидә, болупму лагерлар мәсилисидә бәк көп нәрсә билип кәткәнлики үчүн тутулғанлиқи илгири сүрүлгән. Алақидар хадимлар җүрәт ибраһимниң нөвәттә вәзиписини иҗра қиливатқан яки қилмайватқанлиқидики соалимизниму җавабсиз қалдурди.

Инкаста җүрәт ибраһим тутулғандин кейин, қадир мәмәтниң сораққа тартилғанлиқи вә бу иккисиниң тутулуш делосиниң бир-биригә четишлиқ икәнлики илгири сүрүлгән; әмма иккисиниң қайси нуқтида четилидиғанлиқи тилға елинмиған. Пәқәт җүрәт ибраһимниң җ х саһәсидики уйғур хадимлар билән олтурған җәм болған бир сорунда, нөвәттә тәрбийәләш мәркизидә тутуп турулуватқанларниң омуми санини ашкарилап қойғанлиқи баян қилған; әмма җүрәтниң омуми сан һәққидә ениқ немә дегәнлики тилға елинмиған. Хадимлардин җүрәт ибраһимниң дөләт мәхпийәтликини ашкарилап қойғанлиқи учуриниң тоғра-хаталиқини сориғинимизда, бу һәқтә алақидар рәһбәрләрдин мәлумат елишимизни тәвсийә қилди.

Инкаста дейилишичә, җүрәт ибраһим буниңдин 5 айчә илгири дуч кәлгән дәсләпки сорақта, тәрбийәләштикиләрниң омуми санини қәстән ашкарилимиғанлиқи, пәқәт гәпкә тоғра кәлгәндә қол астидики хадимларни җасарәтләндүрүш үчүн тилға алғанлиқини баян қилип, өзини ақлиған. Инкаста йәнә дейилишичә, җүрәт ашкарилиған бу сан җ х саһәсидики чәклик кишиләрдин башқиларға тарқалмиғанлиқи үчүн, у дәсләпки сорақта қутулуп қалған; әмма 6 ‏-айниң ахиридики бир қайта сорақта, дөләт мәхпийәтликини ашкарилаш билән әйиблинип тутулған вә өзи миңларчә кишини солиған вә солашқа буйруған қамақханиға өзиму койзиланған һаләттә апирилған. Биз сақчи хадимлиридин җүрәт ибраһимниң дөләт мәхпийәтликини ашкарилап қойғанлиқи һәққидики учурниң торға яки хаталиқини соридуқ. Хадимлар бу һәқтиму өзлириниң мәлумат берәлмәйдиғанлиқини тәкитлиди.

Хадимлардин бири җүрәт ибраһимниң немә үчүн тутулғанлиқи һәққидики соалимизға җавабән, бу делони аптоном райондин игилишимизни тәвсийә қилди. Биз униңдин өзиниң җүрәт ибраһимниң тутулғаниқидин хәвири бар-йоқлуқини сориғинимизда «бар» дәп җаваб бәрди. У өзиниң бу һәқтә җаваб бәрмәсликиниң «бир җасарәтсизлик, яки билмәслик мәсилиси әмәс, бәлки, хизмәт тәртипи мәсилиси икәнлики» ни баян қилиш арқилиқ җүрәтниң тутқунда икәнликини дәлиллиди. Йәнә бир хадим болса, җүрәт ибраһимниң қайси қамақта икәнликини сориғинимизда бу һәқтә хххх сақчиханисидкиләрниң хәвәрдар икәнликини ашкарилиди. Бу сақчихана хадими болса, җүрәт ибраһимниң аталмиш тәрбийәләш мәркизидә икәнликини тилға алди. Әмма җүрәт ибраһимниң немә үчүн тәрбийәләшкә әкетилгәнлики вә қайси мәркәзгә әкетилгәнлики һәққидики соалимизға җаваб бәрмиди.

Һөрмәтлик радио аңлиғучилар, ениқлашлиримиздин муавин сақчи башлиқи җүрәт ибраһимниң тутқунда икәнлики мәлум болған болсиму, униң һалда немә сәвәбтин тутулғанлиқи айдиңлашмиди. Аталмиш тәрбийәләштики кишиләрниң омуми саниниң 3 милйондин артуқ икәнлики хәлқара тәшкилатлар тәрипидин вә һәтта бәзи америка дөләт әрбаблири тәрипидин тилға елинған болсиму, хитай һазирғичә елип барған тәшвиқатлириниң һечбиридә еғизға елишқа җүрәт қилалмиған. Уйғур райониниң рәиси шөһрәт закирму нәччә милйон дегән санниң мубалиғә икәнлики дегән, әмма ениқ санни еғизға алалмиған. Шуңа инкасчи оттуриға қойған җүрәт ибраһимниң лагердикиләрниң санини еғизидин чиқирип қойғанлиқи үчүн тутулғанлиқи учури гәрчә әқилгә уйғундәк көрүнсиму, әмма ениқлашлиримиздин бу һәқтә ениқ бир дәлил тепилмиди.

Толуқ бәт