“Shinjang saqchi höjjetliri” de tilgha élin'ghan oqutquchi méhriban'gül memetning tutqunda ikenliki delillendi

Toqquzaqliq muhajirlardin bumeryem xanim, “Shinjang saqchi höjjetliri” diki tutqunlar arisidin oqutquchi méhriban'gül memetni tonuwalghan. Mezkur höjjette méhriban'gülning 28‏-ottura mektepning oqutquchisi ikenliki qeyt qilin'ghan. Téléfonimizni qobul qilghan mezkur teweliktiki saqchi xadimimu bu mekteptin 6 oqutquchining tutqunda ikenliki, bulardin birining méhriban'gül memet ikenlikini delillidi.

Xelqa'arada “Shinjang saqchi höjjetliri” dep atalghan qeshqer konasheher saqchi arxiplirida konasheher we tékes nahiyesige a'it bolghan 20 mingdin artuq tutqunning uchurliri saqlan'ghan, bulardin 2800 che tutqunning süriti qisturulghan. Bu arxip bultur 5‏-ayda dunyagha ashkarilan'ghandin buyan, muhajirettiki Uyghurlar mezkur arxiptin özlirining uruq-tughqan, dost burader we tonush-bilishliri toghruluq melumat izdimekte.

Nöwette qirghizistanda yashawatqan toqquzaqliq muhajir bumeryem xanim, bügün radiyomizgha inkas yollap, “Shinjang saqchi höjjetliri” diki tutqunlar arisidin özining bir tonushi-oqutquchi méhriban'gül memetni tonuwalghanliqini melum qildi. U özining qeshqer shehiride dukan achqan mezgilide méhriban'gül memetni her küni ishqa kétiwatqan waqtida köridighanliqi, ikkeylenning arisida yéqin dostluq munasiwiti bolmisimu, eyni chaghda öz'ara salam-sa'et qiliship ötkenlikini tilgha aldi.

Mezkur höjjette méhriban'gül memetning melum bir ündidar munazire topigha qétilghanliqi we qol téléfonigha torda tam atlash yumtali VPN ni qachilighanliqi, uning tutulush sewebliri süpitide körsitilgen. 28‏-Ottura mektep tewelikidiki saqchixana xadimliri, mezkur mekteptin tutulup kétilgen xizmetchi sanining besh neper ikenlikini we ulardin birining méhriban'gül memet ikenlikini ashkarilidi.

Mezkur höjjette méhriban'gül memetning 2018‏-yili tutqun qilin'ghan mezgilide 29 yash ikenliki xatirilen'gen. Mezkur saqchixanidiki yene bir xadim méhriban'gül memetning qol téléfonidin chiqqan “Mesile” seweblik tutqun qilin'ghanliqini delillidi. Höjjette yene méhriban'gül memetning “Chet elge chiqishqa bolmaydighan a'ile ezasi” ikenlikimu tutulush seweblirining biri süptide tilgha élin'ghan. Lékin saqchi xadimliri, méhriban'gül memetning ata‏-anisining kim ikenliki, néme üchün chet elge chiqishqa bolmaydighanliqi heqqidiki so'allirimizgha jawab bérishni ret qildi.

Yuqirida “Shinjang saqchi höjjetliri” de xatirilen'gen méhriban'gül memetning tutqunda ikenlikining delillen'genliki toghruluq xewer berduq.