Uyghur yash satuq göktughning TRT muzika qanilida orundighan Uyghurche naxshiliri alqishqa érishti

Ixtiyariy muxbirimiz arslan
2023.02.03
Uyghur yash satuq göktughning TRT muzika qanilida orundighan Uyghurche naxshiliri alqishqa érishti Uyghur yash naxshichi satuq göktugh TRT muzika qanilida naxsha orunlimaqta. 2023-Yili 28-yanwar, türkiye.
RFA/Arslan

28-Yanwar küni Uyghur yash naxshichi satuq göktughning orunlishidiki Uyghurche naxshilar türkiyening eng chong döletlik téléwiziye qanili bolghan TRT (türkiye radiyo-téléwiziyesi) ning muzika qanilida körsitilip, kürmenlerlerning qizghin alqishqa érishti. Yash naxshichi satuq göktugh shu küni abduréhim ötkürning “Bahargha mushtaqliq” namliq shé'irini naxsha qilip oqushtin sirt yene “Salam lutpulla”, “Bizning naxshimiz” qatarliq Uyghurche naxshilarnimu éytqan.

Biz bu munasiwet bilen Uyghur yash naxshichi sutuq göktughni ziyaret qilduq. Uning bildürüshiche, u eslide 2009-yili misirgha oqushqa chiqqan bolup, 2014-yili dadisi bilen türkiyege kélip, istanbulda olturaqlashqan iken. U hazir bir tereptin ishlep a'ilisining türmushini qamdashqa tirishsa, yene bir tereptin, ishtin sirt studiyogha bérip naxsha-muzika meshqi élip barmaqta iken. U hazirghiche öz aldigha 4-5 Uyghurche naxshini özi ijat qilghan

Uning bildürüshiche, u bir sen'et heweskari bolup, ularning a'ilisimu ilgiri sen'et bilen shughullan'ghan a'ile iken.

Sutuq göktughning bildürüshiche, uning situdiyodiki yétekchisi uni TRT diki munasiwetlik programma rézhissuri bilen tonushturghan iken. U tallashtin ötkendin kéyin, TRT muzika qanilida naxsha éytish salahiyitige érishken.

U, özi éytqan “Bahar mushtaqliqi” namliq naxshining mezmuni toghrisida toxtilip, bu shé'irni merhum sha'ir abduréhim ötkürning 1978-yili yazghanliqini, shé'irda wetenning hörlüki we musteqilliqigha bolghan intilishni bir qizning teswiridin güzel shekilde otturigha qoyghanliqini bayan qilip ötti.

Sutuq göktughning éytishiche, uning apisi buningdin birqanche yillar ilgiri ata-aninsi yoqlap weten'ge qaytaqanda, xitay saqchiliri teripidin tutqun qilinip lagirgha qamalghan we kéyinche 25 yilliq qamaq jazasigha höküm qilin'ghan iken. Sutuq göktugh wetendiki uruq-tughqanlirining béshigha téximu éghir palaketlerning kélip qélishidin saqlinish üchün, apisi toghrisida tepsiliy melumat bérelmeydighanliqini éytti.

U özining bir sen'et heweskari ikenlikini, weten-xelqi üchün sen'et arqiliq xizmet qilishqa tirshiwatqanliqini bildürdi.

Biz yene bu heqte pikir qarashlirini élish üchün TRT Uyghurche radiyo qanilining xadimi, zhurnalist mirkamil qeshqerliri bilen söhbet élip barduq.

Mirkamil qeshqerli ependi, körürmenliri köp bolghanTRT muzika qanilida Uyghurche naxsha orundashning Uyghurlar we Uyghur mesilisini türkiye hem türk dunyasigha tonushturushta zor ehmiyetke ige ikenlikini, bu xil pirogrammilarning téximu köplep otturigha chiqishi üchün téximu zor tirishchanliq körsitish kéreklikini tilgha aldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.