Қәшқәр 2-дохтурханиниң дохтури, врач сайитаҗи қасимниң 25 йиллиқ кесиветилгәнлики ашкариланди

Мухбиримиз шөһрәт һошур
2021-09-06
Share
Қәшқәр 2-дохтурханиниң дохтури, врач сайитаҗи қасимниң 25 йиллиқ кесиветилгәнлики ашкариланди 25 Йиллиқ кесиветилгән, қәшқәр 2-дохтурханиниң ташқи кесәлләр дохтури, врач сайитаҗи қасим әпәнди. (Вақти вә орни ениқ әмәс)
Sawutjan Qasim teminligen

Уйғур районида аталмиш тәрбийәләшкә елип кетилип, бир йил яки икки йилдин кейин кесиветилгән тутқунлар арисида кәспидә көзгә көрүнгән, уйғур җәмийитиниң дәрдлиригә дәрман болуватқан медитсина хадимлириму аз әмәс. Булардин бири қәшқәр вилайәтлик 2‏-дохтурхана ташқи кесәлликләр дохтури, врач сайитаҗи қасимдур. Инкас қилинишичә, бу йил 45 яш әтрапида болған сайитаҗи қасим 2017-йили 9-айда тутуп кетилгәндин кейин из-дерәксиз ғайиб болған. Мухбиримизниң қәшқәрдики алақидар органларға қарита елип барған телефон зиярәтлири давамида, униң 25 йиллиқ кесиветилгәнлики ашкариланди.

25 Йиллиқ кесиветилгән, қәшқәр 2-дохтурханиниң ташқи кесәлләр дохтури, врач сайитаҗи қасим әпәнди оператсийә үстидә. (Вақти вә орни ениқ әмәс)

1996‏-Йили шинҗаң медитсина университетини пүттүргән сайитаҗи қасим, юрти қәшқәргә қайтип 2-дохтурханиниң ташқи кесәлләр бөлүмигә ишқа чүшкән вә узун өтмәй сүйдүк йоли вә бөрәк кесәлликлиридә уста врач дохтур болуп көзгә көрүнгән. Сайитаҗиниң америкадики иниси савутҗанниң баян қилишичә, сайитаҗи қасим, 2017-йили уштумтут сақчиханиға чақиртилған вә 2-дохтурхана әтрапидики бир сақчиханида бир күн тутуп турулған. Биринчи қетимлиқ сорақтин аман чиққан сайитаҗи қасим, 2017-йили 9-айниң 14-күни иккинчи қетим чақиртилғандин кейин, из-дерәксиз ғайиб болған.

Биз сайитаҗи қасимниң из-дерикини елиш үчүн қәшқәрдики алақидар идарә органларға телефон қилдуқ. Биз бирқатар ениқлашлардин кейин қәшқәр иккинчи дохтурханиниң сайитаҗи қасим ишлигән сүйдүк кесәлликлири бөлүминиң алақә учуриға ериштуқ. Бу бөлүмдин телефонимизни алған бир хадим, бөлүмдә хизмәт қилған сайитаҗи қасим исимлик бир дохтурни тонумайдиғанлиқини баян қилди. Телефонимизни қобул қилған йәнә бир хадим, сайитаҗи қасимниң нөвәттә бу дохтурханида әмәс икәнликини тилға алди. Әмма у өзиниң бу дохтурханиға йеңи икәнликини билдүрүп, сайитаҗи қасимниң қисимити һәққидә мәлумат бәрмиди.

Савутҗанниң баян қилишичә, акиси сайитаҗи кәспигә өзини атиған ихтисас игиси болуп, у һәптә ичилири өзи мәнсуп дохтурханида хизмәт қилса, һәптә ахирлири қәшқәрниң һәрқайси наһийә дохтурханилардики назук оператсийәләргә қатнашқан вә яки йетәкчилик қилған. Һәптиниң 7 күнини хизмәт билән өткүзсиму, намрат вә чарисиз хәлқиниң дәрдигә дәрман болуватқини үчүн, қилчиму һарғинлиқ һес қилмиған, әксинчә еливатқан миннәтдарлиқ дуалири сәвәблик техиму һузур ичидә яшаватқаникән. Шуңа акисиға бир җинайәтниң артилишни еһтималдин узақ дәп қариған савутҗан, өзи 2017-йилниң ахири қәшқәрдин айрилип америкаға кәлгәндин кейин, дәсләптә акисиниң әһвалини бәк сүрүштә қилип кәтмигән. Әмма вақит өткәнсери уйғур вәзийитиниң җиддийлишиши билән уму акисиниң тәқдиридин әндишә қилишқа башлиған. Кейинчә акисиниң әһвалини билип беқиш үчүн алақилишишкә урунуп баққан болсиму, уруқ-туғқан вә тонуш билишлириниң һечқайси билән алақә бағлиялмиған.

Илгирики ениқлашлиримиздин мәлум болишичә, хитай даирилири 2017-йили лагерға йиғивалған кишиләрниң зор бир қисми үстидин җаза һөкүми чиқирип, түрмиләргә йөткигән вә яки лагерниң намини түрмигә өзгәрткән. Сайитаҗи қасимниң тутқунда икәнликини әң дәсләп тизимға алған норвегийәдики уйғуряр фондиниң түркийә вәкили батур қараханли әпәнди, сайитаҗи һәққидә 4 йилдин буян һечқандақ учур болмайватқанлиқиға асасән, униң кесилип кәткәнлики, кесилгәндиму еғир бир җинайәт артилип кесилгәнлик еһтималлиқини оттуриға қойиду.

Биз бу пәрәзләргә асасән қәшқәрдики сот вә тәптиш органлириға телефон қилдуқ. Қәшқәр шәһәрлик тәптиш мәһкимисиниң бир бөлүм башлиқи, дәсләптә соаллиримизға қопаллиқ билән җаваб берип, сайитаҗи һәққидә мәлумат бериштин өзини тартти. У арқидин, бөлүмидики алақидар бир хадимни, сайитаҗи һәққидики соалимизға җаваб беришкә буйруди. Бөлүм башлиқиниң қолидин телефонни алған бу хадим, сайитаҗи қасимниң 25 йиллиқ кесилгәнликини ашкарилиди. Һөкүмниң қачан чиққанлиқидин хәвири йоқлуқини билдүргән бу хадим, һөкүмдин өзиниң техи бир ай бурун хәвәр тапқанлиқини билдүрди.

У йәнә сайитаҗи қасимниң немә сәвәбтин тутулған вә кесилгәнлики һәққидики соалимизға җаваб берәлмәйдиғанлиқи вә бу һәқтә артуқ мәлумат беришни халимайдиғанлиқини билдүрүш арқилиқ, бу соалларға җаваб беришниң өзиниң мәсулийәт даирисиниң сиртида икәнликини ишарәтлиди.

Юқирида, қәшқәр 2-дохтурханиниң врач дохтури сайитаҗи қасимниң 25 йиллиқ кесилгәнлики һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт