Тутқундики врач дохтур сайитаҗи қасимниң иниси: акам дөләт террориниң һәм адаләтсиз кәспий риқабәтниң қурбани

Мухбиримиз шөһрәт һошур
2021-09-07
Share
Тутқундики врач дохтур сайитаҗи қасимниң иниси: акам дөләт террориниң һәм адаләтсиз кәспий риқабәтниң қурбани 25 Йиллиқ кесиветилгән, қәшқәр 2-дохтурханиниң ташқи кесәлләр дохтури, врач сайитаҗи қасим әпәнди аилиси билән. (Вақти вә орни ениқ әмәс)
Sawutjan Qasim teminligen

Биз тутқундики врач дохтур сайитаҗи қасимниң 25 йиллиқ кесилгәнликини ениқлап болғандин кейин, униң тутулуш вә кесилиш сәвәби һәққидиму мәлумат игилидуқ. Мәлум болушичә, сайитаҗи қасим хизмәт мунасивити билән төвәнгә чүшкинидә йопурғида бир аталмиш "террорчилар" чүшкән меһманханида йетип қалғанлиқи үчүн тутулған. 2013 ‏-Йиллири уйғур районида сақаллиқ вә һиҗаблиқ кишиләрниң дохтурханиға кириши чәкләнгән мәзгилидә, сайитаҗи қасим, уларни өйигә берип давалиғанлиқи үчүн дөләтниң диний әсәбийликни тазилаш сияситигә қарши туруш билән әйиблинип еғирлитип җазаланған.

25 Йиллиқ кесиветилгән, қәшқәр 2-дохтурханиниң ташқи кесәлләр дохтури, врач сайитаҗи қасим әпәнди оператсийә үстидә. (Вақти вә орни ениқ әмәс)
25 Йиллиқ кесиветилгән, қәшқәр 2-дохтурханиниң ташқи кесәлләр дохтури, врач сайитаҗи қасим әпәнди оператсийә үстидә. (Вақти вә орни ениқ әмәс)

Биз қәшқәр вилайәтлик 2 ‏-дохтурханиниң врач дохтури сайитаҗи қасимниң 25 йиллиқ кесилгәнликини ениқлап болғандин кейин, униң тутулуш вә кесилиш сәвәби һәққидиму мәлумат соридуқ. Қәшқәрдики алақидар хадимлар бу һәқтә мәлумат беришни рәт қилди. Мәлум болушичә, сайитаҗи қасимниң америкадики иниси савутҗан 2017 ‏-йили америкаға йолға чиқишниң алдида, акиси билән көрүшкән вә униң тутулуш сәвәбини сақчихана хадимлиридин сүрүштә қилған. Сақчи хадимлири униңға, сайитаҗи қасимниң йопурғидики бир меһманханиниң алдида машинисиниң рәсимгә чүшүп қалғанлиқи, мәзкур меһманханида шу күнләрдә аталмиш "террорчилар" ятқанлиқи үчүн сайитаҗи қасимниңму сорақ қиливатқанлиқини билдүргән.

У, акисиниң бир кәсип әһли икәнлики өз кәспий арқилиқ өзиму, җәмийәтму рази болғудәк хизмәт қилғанлиқи, шуңа униң, милләт үчүн хизмәт қилиш үчүн башқа бир йолларни таллаш мумкинчилики йоқлуқини оттуриға қойиду. У сайитаҗи қасимниң тутулушида, уйғур районида шу мәзгилдә қайтидин башланған сиясий җудунниң сәвәб болғанлиқи йәни униң хитай дөләт террориниң қурбани болғанлиқини илгири сүриду.

Сайитаҗи қасимниң тутқунда икәнликини тизимликкә киргүзгән норвегийәдики уйғуряр фондиниң түркийәдики вәкили батур қараханлиниң баян қилишичә, сайитаҗи қасимға бирқанчә хил аталмиш җинайәт артилған. Булардин бири, дөләтниң диний әсәбийлик сияситигә астиртин қарши туруш дәп бекитилгән. Сайитаҗиниң, уйғур районида сақаллиқ вә һиҗаплиқлар дохтурханиға елинмиған мәзгилләрдә, қериндашлиқ вә инсандарчилиқ нуқтисидин уларниң аилисигә берип давалиши бу аталмиш җинайәткә пакит қилип көрситилгән.

Савутҗан қасимниң акиси сайитаҗи һәққидә баян қилишичә, сайитаҗи дәсләпки қетим тутулғанда, сақчилар униң хизмәт орнидин капаләт хети тәләп қилған. Әмма, әмма дохтурханиниң хитай рәһбири, бундақ бир капаләтнамә йезип беришни рәт қилған. Савутҗанниң дейишичә, бундақ болушиға дохтурхана башлиқиниң хитай болушидин башқа, сайитаҗиниң кәсиптә алаһидә нәтиҗә қазанишиму сәвәб болған. Йәни дохтурхана рәһбәрлири сайитаҗиниң наһийәләргә дәвәт қилиниши вә иқтисадий җәһәттин ронақ тешпиидинму биарам болған.

Телефон зиярәтлиримиз давамида, мәлум бир идарә хадими, сайитаҗи қасимниң компютеридин аталмиш қанунсиз материяллар байқалғанлиқи, буниңму сайитаҗиниң диний әсәбийликкә бағлинип җазалинишиға йәнә бир сәвәб қилинғанлиқини илгири сүрди.

Батур қараханлиниң дейишичә, сайитаҗи қасим ана тилдин башқа инглизчә вә хитай тилиниму яхши билгән зиялийлардин болуп, миллитиниң тәқдири һәққидә дуняда болуватқан ишларға көңүл бөлгән вә алақидар хәвәр мақалиләрни көргән болушиму мумкин икән.

Юқирида, қәшқәр вилайәтлик 2 ‏-дохтурханиниң врач дохтури, сайитаҗи қасимниң 25 йиллиқ кеслишиниң сәвәблири һәққидики ениқлашлиримизни диққитиңларға сундуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт