Қазақистан һөкүмити җасарәтлик қазақ паалийәтчи серикҗан билашни қолға алди

Мухбиримиз алим сейтоф
2019-03-10
Елхәт
Пикир
Share
Принт
«Ата юрт пидаийлири» ниң қурғучиси вә башламчиси серикҗан билашоғли әпәнди(оттурида).
«Ата юрт пидаийлири» ниң қурғучиси вә башламчиси серикҗан билашоғли әпәнди(оттурида).
Sérikjan Bilash’oghli teminligen

Қазақистан һөкүмити йәкшәнбә күни хитай лагерлирида соланған қазақларниң һәқ-һоқуқини қоғдап кәлгән кишилик һоқуқ паалийәтчиси серикҗан билашни аталмиш «миллий өчмәнликни тәрғиб қилған» дегән баһанә билән қолға алған. Серикҗан билаш «ата-җурт пидаийлири» ниң қурғучиси болуп, у бир йилдин бери хитай лагерлирида соланған қазақларниң давасини қилип, бу мәсилини бәлгилик дәриҗидә хәлқаралаштурған иди.


Фирансийә агентлиқиниң хәвиригә қариғанда, қазақистан дөләт бихәтәрлик идарисиниң алаһидә хадимлири йәкшәнбә саәт 1:00 ләрдә серикҗан билашни алмутада қолға елип, уни пайтәхт астанаға елип кәткән. Бу алаһидә хадимлар йәнә «ата-җурт пидаийлири» ниң ишханисиға бастуруп кирип, ишхана ичидики барлиқ материяллар, һөҗҗәтләр, компютерлар вә хитайниң зиянкәшликигә учриған қазақларниң бәргән язма гуваһлирини елип кәткән. Серикҗан билашниң ханими ләйла адилҗанниң билдүрүшичә, бу хадимлар  кетиштин бурун «ата-җурт пидаийлири» ниң ишханисини рәсмий печәтлигән.
Астанаға елип кетилгән серикҗан билаш йәкшәнбә бир қисқа син арқилиқ өзиниң хитайлар яки хитай җасусларниң қолида әмәстин, бәлки қазақ сақчилириниң қолида икәнликини  билдүргән.


Хитай һөкүмити 2017-йили башлиридин башлап 800 миңдин 2 милйонғичә уйғур, қазақ вә башқа түркий хәлқләрни җаза лагерлириға ташлиғандин бери, серикҗан билаш қазақистанда «ата-җурт пидаийлири» дегән тәшкилатни қуруп, хитай һөкүмитиниң тәһдитлири, қазақ һөкүмитиниң бесими, вә бәзи қазақларниң уни сотқа әйиблишигә қаримай өзиниң һәққаний паалийитини давамлаштурған.


Қазақистан һөкүмитиниң серикҗан билашни тосаттин қолға елиши хитайниң лагер мәсилисигә көңүл бөлүватқан барлиқ инсанларни һәйран қалдурди. Қазақистан һөкүмитиниң һазирчә серикҗан билашни қоюп бериши, сотқа тартиши вәяки хитайға қайтуруветиши ениқ әмәс.

Пикирләр (0)
Share
Толуқ бәт