Zakirjan quziyéf qazaqistan parlaméntining sénat ezaliqigha teyinlen'gen

Qazaqistan jumhuriyitining prézidénti toqayéfning biwasite körsitishi bilen Uyghur xelqining wekili zakirjan quziyéf qazaqistan parlaméntining sénat ezaliqigha teyinlen'gen.

Yéqinda qazaqistan prézidénti qasim-jomart toqayéfning permanigha béna'en, qazaqistan parlaménti sénatining yéngi ezaliri teyinlen'gen we saylap chiqilghan. Dölet rehbirining qazaqistan xelqi birleshmisidin belgiligen sénat ezaliri ichide Uyghur xelqining wekili zakirjan quziyéfmu bar.

Qazaqistanning asasiy qanuni boyiche parlamént memliketning qanun chiqirish rolini atquridighan yuqiri derijilik wekiller organi bolup, u ikki palatadin, yeni sénat we aliy kéngeshtin teshkil tapqan. Sénatta 50 eza bolup, ulardin 10 nepiri, shu jümlidin qazaqistan xelqi birleshmisidin 5 wekil prézidént teripidin biwasite teyinlinidu, qalghanliri yoshurun awaz bérish arqiliq ezaliqqa saylinidu. Qazaqistan xelqi birleshmisi memlikette yashawatqan 100din oshuq milletlerge wekillik qilidighan chong teshkilattur.

Qazaqistan parlaméntining sénat ezaliqigha Uyghur wekilining belgilinishi, qazaqistandiki Uyghur jama'iti arisida, bolupmu metbu'at we ijtima'iy taratqularda zor inkas qozghimaqta.

Ataqliq yazghuchi we dramatorg, qazaqistan yazghuchilar ittipaqining ezasi exmetjan hashiri ependi, zakirjan quziyéfning parlamént sénatining ezasi bolup belgilinishining qazaqistan Uyghurliri üchün chong yéngiliq bolghanliqini alahide tekitlidi.

U mundaq dédi: “Men zakirjanning heqiqiy menide danishmenlik pikrining bar ikenlikige közüm yetti. U xelqimizning ichide chong izzet-hörmetke ige Uyghur yigiti. Uni saylighan waqitta xelqimiz hemmisi oyghinip, nahayiti xursen boldi. Xelqimizning milliyetlik qediriyitini yoquri kötirishte bu bir chong beriket, bizge kelgen bir amet boldi. U bizning sen'etkarlirimizni, yazghuchilirimizni nahayti qedirleydighan ichki bir kishi. Uning qazaqistan parlaméntidiki sénatta xelqimizning bexit-sa'aditi üchün küch chiqiridighanliqigha ishenchim kamil.”

Exmetjan hashiri yene zakirjan quziyéfning bosh yatqan yerlerni xelqqe bérish, bolupmu déhqanlarni her jehettin qollap-quwetleshke oxshash teshebbusliri bilen közge körün'genlikini otturigha qoydi. U zakirjan quziyéfni öz milliti üchün köyünidighan hem shu yönilishte köpligen xeyir-saxawetlik ishlarni qilghan shexs süpitide tonuydighanliqini tekitlidi.

Jumhuriyetlik Uyghur étno-medeniyet merkizi aliy kéngishining re'isi, “Uyghur awazi” gézitining bash muherriri érshat esmetof ependi mundaq dédi: “Yéqinda bolup ötken sénat saylimida besh millet wekilining qatarida zakirjan quziyéf eza bolup saylandi. Mana bumu qazaqistan Uyghurlirining siyasiy pa'aliyetchanliqining bir körünüshi bolsa kérek. Biz zakirjan quziyéfqa sénattiki orni mubarek bolsun deymiz! uning kélechekte musteqil qazaqistan'gha, qazaqistan xelqi birleshmisige, qazaqistandiki 130 milletke, yeni Uyghur xelqige xizmet qilidighanliqigha ümid qilimiz. Zakirjan'gha utuq tileymiz.”

Érshat esmetof, qazaqistan Uyghurlirining memliketning asasiy qanunliridin paydilinip, özlirining milliy tereqqiyatigha we qazaqistanning güllinishige zor töhpe qoshup kéliwatqanliqini bildürdi.

U yene qazaqistan parlaméntining yuqiriqi we töwenki palatalirigha saylan'ghan Uyghurlarning qazaqistanning omumiy tereqqiyatigha xizmet qilishtin tashqiri yene öz millitining güllinishigimu köngül bölüp kéliwatqanliqini körsetti.

Igilishimizche, zakirjan quziyéf 1969-yili almuta shehiride dunyagha kelgen. Ottura mektepni püttürgendin kéyin, almuta qurulush téxnikomini tamamlighan. U emgek pa'aliyitini yaghachchi bolup bashlap, chong shirketning prézidénti derijisigiche yetken. Zakirjan quziyéf köpligen döletlerning mukapatlirigha érishken, memliket da'iriside keng tonulghan bir tijaretchi. Hazir u qazaqistandiki “Uniwérsal” ishlepchiqirish shirketlirin birleshmisini bashquruwatqan bolup, qol astida üch mingdin artuq xizmetchi ishlimektiken.