Шаңхәй кочилиридики сәргәрдан уйғур йигити вә хитай завутлириға йөткәлгән уйғурлар

Мухбиримиз меһрибан
2022-05-18
Share
Шаңхәй кочилиридики сәргәрдан уйғур йигити вә хитай завутлириға йөткәлгән уйғурлар Корона вируси юқуми сәвәблик қаттиқ қамал қилинған шаңхәйдә сәргәрдан болуп йүргән бир уйғур йигити. 2022-Йили май.
Social Media

Йеқинда ашкариланған бир син филимидә корона вироси юқуми сәвәблик қаттиқ қамал қилинған шаңхәйдә сәргәрдан болуп йүргән бир уйғур йигити һәққидики көрүнүшләр ашкарилинип, диққәт қозғиди. Филимдики диялоглардин бу йигитниң шаңхәйгә ишләмчиликкә кәлгәнлики, әсли юртиниң қәшқәрниң қағилиқ наһийәси икәнлики мәлум болған.

Син филимдә бу уйғур йигитниң кочида сәргәрдан болуп йүргинигә диққәт қилған бир хитай униңға йемәклик бәргән. Йигит хитайға өзиниң қәшқәр вилайитиниң қағилиқ наһийәсидин шаңхәйгә ишләмчиликкә кәлгәнликинини ейтқан.

Америкадики лагер шаһитлиридин зумрәт давут ханим, уйғурлар тоғрилиқ хитайда тарқалған син филимлирини хитай тор мәнбәлиридин елип фейсбук қатарлиқ иҗтимаий таратқуларға йоллап кәлмәктә.

Зумрәт ханим филимдики бу уйғур йигитиниң баянлиридин униң хитай даирилири тәрипидин “йөткәп ишқа орунлаштуруш” намида хитай өлкә-шәһәрлиригә мәҗбурий йөткәлгән уйғур яшлириниң бири икәнликини җәзимләштүрүш мумкинликини билдүрди.

Зумрәт ханим йәнә хитайниң тик-ток мунбиридә башқиму син көрүнүшлириниң барлиқини, шаңхәйдики қамал мәзгилидә ач қалған уйғурлар тоғрилиқ нәқ мәйдандин син көрүнүшлири тарқатқанлиқини тилға алди.

Дуня уйғур қурултийи иҗраийә комитетиниң муавин рәиси илшат һәсән әпәндиниң билдүрүшичә, шаңхәй кочилирида байқалған бу уйғур йигити, хитай һөкүмити йиллардин буян давам қиливатқан аталмиш “йөткәп ишқа орунлаштуруш” намида хитай өлкилиригә мәҗбурий йөткәп кетилгән уйғур яшлириниң бири икән. Бу син филими уйғурларниң хитай өлкилиридә учраватқан ечинишлиқ қисмәтлириниң әмәлий көрүнүши икән.

Илшат һәсән әпәндиниң билдүрүшичә, нөвәттә хитайда давамлишиватқан корона вируси юқуми сәвәбидин йүргүзүливатқан қамалда, уйғурларниң вәзийитини хитай пуқралири учраватқан тәқипләрдин нәччә һәссә еғир дейишкә болидикән.

Илшат һәсән әпәндиниң тәкитлишичә, гәрчә нөвәттә уйғурлар учраватқан “ирқий қирғинчилиқ” вә “мәҗбурий әмгәк” қатарлиқ зулумлар, ғәрб әллириниң диққитигә еришкән болсиму, әмма хитайда йүргүзүливатқан “вирус юқумиға қарши қамал” да уйғурларниң зади қандақ бир вәзийәттә икәнликини ашкарилап көрситидиған учурлар йәнила интайин аз вә йетәрсиз икән.

У бу әһвалниң хәлқарадики кишилик һоқуқ тәшкилатлири вә ғәрп демократик дөләт һөкүмәтлириниң җидди диққитини қозғиши керәкликини билдүрди.

Илшат һәсән әпәнди йәнә нөвәттә хитай һөкүмити һәрқайси шәһәрләрдә йолға қойған “юқум қамали” вә униң мәқсити һәққидә тохталди. Униң тәкитлишичә, пуқраларни бу хил мәҗбурий қамал қилишиниң арқисиға хитай компартийәсиниң өзиниң һөкүмранлиқ орнини сақлап ғәризи йошурунған икән.

Зияритимиз ахирида илшат һәсән әпәнди йәнә хитайда корона вируси юқумини баһанә қилип йүргүзүливатқан қамалда, пуқралар мәҗбурий тутқун қилиниш, өлүвелиш, һәтта ачлиқтин өлүштәк паҗиәләргә йолуқиватқан болсиму, әмма хитай пуқралирики қаршилиқ кәйпиятиниң йәнила төвән икәнликини билдүрди.

Униң билдүрүшичә, буниң сәвәби гәрчә көп хил амилларға бағлиқ болсиму, әмма хитай мәдәнийитидә тарихитин буян давамлишип келиватқан еғир дәриҗидики қулчилиқ идийәси хитай пуқралириниң роһийитидә һакимийәткә қарши чиқиш ирадисини суслаштурған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт