Шейн ширкитиниң тәшвиқат саяһити техиму көп гуман қозғиған

Хитайниң төвән баһа билән тонулған кийим-кечәк ширкити шейн йеқинда америкалиқ тор чолпанлирини шейнниң гуаңҗудики бир завутини екскурсийә қилишқа тәклип қилған. Мәзкур зиярәткә авҗен батлир (AuJené Butler) , дәни карбонари (Dani Carbonari) , марина саведра (Marina Saavedra) , дәстен судуз (Destene Sudduth) ға охшаш даңлиқ тор чолпанлири қатнашқан.

Тор чолпанлири зиярәт җәрянида иҗтимаий таратқулирида тарқатқан синлирида, хизмәтчиләр билән уларниң хизмәт шараити һәққидә параңлашқанлиқини вә һәммә ишниң “нормал” икәнликини ейтқан. Улар йәнә завутларниң нәқәдәр пакиз вә техникилиқ икәнликини тәкитлигән.

Твиттердики сузан бәйли (Susan Bailey) исимлик ханим өзиниң 20 нәччә йиллиқ хитайдики мода кийим-кечәк завутлирини зиярәт қилғандики тәҗрибисигә асасланғанда, шейин завутиға зиярәткә барған тор чолпанлириниң ейтқанлириниң ялғанлиқни язған. У авҗен, дәни қатарлиқлар тарқатқан видийодики инчикә нуқтиларни тәһлил қилиш арқилиқ шейин ширкитиниң тиҗарәт өлчимигә чүшмәйдиғанлиқини оттуриға қойған.

Радийомиз һәр хил иҗтимаий таратқулар арқилиқ мәзкур зиярәткә қатнашқан точ чолпанлири билән алақилишишқа тиришқан болсақму, улар учурлиримизға җаваб қайтурмиди.

Иҗтимаий таратқуларда шейн тәклип қилған тор чолпанлири қизиқ нуқтиға айланған болуп, тарқалған учурларға қариғанда, тор чолпанлириниң хитайға вә қошумчә сингапорға қилған саяһәт чиқимниң һәммисини шейн ширкити үстигә алған. Һәрқайси ахбарат қаналлири вә һәтта зиярәткә қатнашқан тор чолпанлириниң әгәшкүчилириму, шейин бу хил зор чиқим билән орунлаштурулған саяһәт арқилиқ өзиниң образини нәрсиләрни әслигә кәлтүрүшкә урунмақта, дәп баһа бәргән.

Мәлум болушичә, хитайниң тез мода ширкити болған шейн өткән йили баш штабини нәнҗиңдин сингапорға йөткигән. Лекин барлиқ завутлири вә амбарлирини өз ичигә алған сода тиҗаритиниң көпинчисини йәнила хитайда давам қилдурған.

Америкадики сиясий анализчи андерс кор (Anders Corr) бу һәқтә радийомизниң зияритини қобул қилип, америкада шейинға қарита сәзгүрлүк ешишқа башлиғанда, шейнниң бу хил тәшвиқат зияритини елип бериши өзиниң образини қайта тикләшкә урунуши икәнликини тәкитләп мундақ деди: “мениңчә, шейин өзинң образини яхшилашқа урунуватиду. Шейин шинҗаңниң пахтисини ишләткәнлики үчүн, уйғур мәҗбурий әмгикигә, вә уйғур ирқий қирғинчилиқиға четишлиқ дәп әйиблинип америка сиясәтчилиридин нурғун ‛дәшнәм‚ йегән. Палата әзаси марко рубийо, шейинниң бир қисим пахтиниң шинҗаңдин кәлгәнликини етирап қилғанлиқини ейтқан. Шейин өзиниң җинайитини етирап қилған, йәни бу ширкәт ирқий қирғинчилиққа шерик. Униңдин башқа шейин йәнә екологийәлик муһитни болғаш мәсилисигиму четишлиқ. Униң тоннилап ишләпчиқарған мәһсулатлириниң әхлити тупрақ вә һава булғиниши биләнму мунасивәтлик. Мушуниңға охшаш шейинға мунасивәтлик нурғун иҗтимаий әйибләшләр мәвҗут. Шуңлашқа улар өзлириниң образини яхшилаш үчүн мушундақ тәшвиқат саяһитини орунлаштурған.”

Дуняниң һәрқайси җайлиридики заманиви қуллуққа тақабил туруш үчүн қурулған “әркинлик бирләшмиси” намидики хәлқаралиқ тәшкилатниң хадимлири шейин ширкитиниң гуаңҗудики ширкитигә зиярәткән барған тор чолпанлириниң тәшвиқат видийосиға күчлүк инкас қайтурған. Мәзкур тәшкилатниң пирограмма башқурғучиси мериям кармали ханим вә паалийәт мәслиһәтчиси кириста биснавут ханим бу һәқтә радийомизниң соаллириға елхәт арқилиқ җаваб қайтурди. Улар хетидә мундақ дәп язған: “мода маркилириниң тор чолпанлири билән һәмкарлишиши сетиш истратегийәсиниң бир тәркибий қисми. Шейинму охшаш өзинң мәһсулатлирини сетиш үчүн тор чолпанлирни тәклип қилған. Әмма, шейин ширкити мәҗбурий әмгәк билән мунасивәтлик. ‛билумберг‚ хәвәр агентлиқиниң 2022-йилдики доклатида байқилишичә, шейин кийим-кечәклиридики пахтиниң әвришкиси уйғур районидин кәлгән болуп, бу районда ишләпчиқирилған барлиқ мәһсулатларни мәҗбурий әмгәк билән булғанған дәп қарашқа болиду. Шейинниң гуаңҗудики завутиниң алдин орунлаштурулған саяһитидә тор чолпанлириниң у йәрдики хизмәт шараитиниң начарлиқи яки мәҗбурий әмгәкниң испатини көрмигәнлики, у йәрдә мәсилиниң мәвҗут әмәсликини билдүрмәйду. Биз тор чолпанлирини маркилар билән һәмкарлишиштин бурун ширкәтниң салаһийитини тәкшүрүшини тәвсийә қилимиз.”

Америка дөләт мәҗлиси қармиқидики америка-хитай истратегийәлик риқабәт пәвқуладдә комитети 22-июн күни елан қилған “тез мода вә уйғур қирғинчилиқи” сәрләвһилик тәкшүрүш доклатида мәхсус шейин қатарлиқ хитай маркилириниң уйғур мәҗбурий әмгикигә четишлиқ икәнлики оттуриға қойғаниди. Униңдин башқа америка дөләт мәҗлиси “америка-хитай иқтисадий, бихәтәрлик көзитиш комитети” 14-апрел елан қилған доклатида, хитайниң шеин, темо қатарлиқ дуняға даңлиқ мода кийим сода әплириниң истемалчиларниң шәхсий учурлирини топлайдиғанлиқидәк бихәтәрлик мәсилисини оттуриға қойған.

Зияритимизниң ахирида андерс кор әпәнди шейин қатарлиқ уйғур мәҗбурий әмгикигә четишлиқ ширкәтләрниң мәһсулатлириниң америка вә дуня базириға керишини чәкләш үчүн қоллинишқа тегишлик тәдбирләр һәққидә тохталди: “биз шейиниң америка базириға керишигә рухсәт қилмаслиқимиз керәк. Улар төвән тәннәрх өлчими сияситидики йочуқтин пайдилинип һәтта баҗ төлимәстин америка базириға кериватиду. Биз алди билән бу сиясәтни өзгәртишимиз керәк. Әлвәттә, қоллинишқа тегишлик нурғун тәдбирләр бар, әмма мениңчә хитай билән болған сода алақисини бирақла үзүш керәк. Болупму шейинға охшаш хитайниң ишләпчиқириш күчигә тайинидиған ширкәтләр билән болған тиҗарәтни тохтитиш керәк. Биз техиму көпрәк американиң вә иттипақдашлиримизниң ширкитигә пурсәт беришимиз керәк. Фирансийә, японийә қатарлиқ өзимизниң достлириниң ширкәтлириниң маллирини базиримизға киргүзсәк болиду. Дүшминимизниңкини әмәс. Бу шунчилик аддий мәсилә әслидә.”

 “әркинлик бирләшмиси” тәшкилатиниң хадимлириму америка һөкүмитиниң уйғур мәҗбурий әмгәкниң алдини елиш қануни (UFLPA) ға охшаш мәҗбурий әмгәккә четишлиқ импортларни чәкләш буйруқини йолға қоюши керәкликини тәкитлигән. Улар америка вә пүтүн дунядики истемалчиларниң истемалчи болуш сүпити билән ширкәтләрниң мәсулийитини сүрүштүрүши вә уларниң уйғур мәҗбурий әмгики билән болған алақисини үзүшини тәләп қилиши керәкликини әскәрткән.

Шейин ширкити уйғур мәҗбурий әмгикигә вә муһит булғинишиға мунасивәтлик барлиқ әйибләшлирини рәт қилған. Нәтиҗидә иҗтимаий таратқулардики инкасларға қариғанда, кишиләр тор чолпанлириниң шейин һәққидә тарқатқан тәшвиқат характерлик синлириға гуман билән қариған.