Истанбулда "шәрқи түркистан шеир кечилики" өткүзүлди

Ихтиярий мухбиримиз азиғ
2020-11-16
Share
sherqi-turkistan-sheir-kechiliki.jpg Түркийә язғучилар бирлики вә уйғур яш қәләмкәшләр бирликиниң орунлаштуруши билән истанбулда өткүзүлгән "шәрқи түркистан шеир кечилики" дә хатирә сүрәт. 2020-Йили 14-ноябир, түркийә.
RFA/Azigh

14-Ноябир түркийә язғучилар бирлики вә уйғур яш қәләмкәшләр бирликиниң орунлаштуруши билән истанбулда "шәрқи түркистан шеир кечилики" өткүзүлди.

Паалийәткә түркийәдә яшаватқан уйғур шаирлири, әдиблири, оқуғучилар вә һәр саһәдики уйғур зиялийлири қәдәм тәшрип қилди.

Паалийәткә яш шаир имран садаий риясәтчилик қилди. Түркийә язғучилар бирликиниң истанбул шөбисиниң башлиқи маһмут бейикли мәзкур кечиликниң ичилиш мурасимиға қатнашти вә сөз қилди. Мәһмут бейикли башқа паалийәтләргә селиштурғанда шәрқи түркистан даваси билән мунасивәтлик паалийәтләрниң кишини техиму һаяҗанландуридиғанлиқини тәкитләп, мундақ деди: "бизниң шәрқи түркистан билән чоңқур риштимиз бар. Бу риштини йоқитиш үчүн һәрхил урунушлар илип бериливатқан, сиясий чүшәнчиләр тиңиливатқан болсиму, әмма биз уларниң һечқайсисиға ишәнмәймиз. Һәммисини рәт қилимиз. Бизниң шәрқий түркистан билән болған риштимиз чоңқур риштидур, бу риштә қиямәткичә давамлишиду."

Паалийәттә йәнә тәклипкә бинаән қатнашқан қибрис 15-ноябир университетиниң оқутқучиси профессор шәвкәт насири әпәндим вә доктор пәрһат қурбан тәңритағли әпәндимләр шәрқий түркистан даваси вә шәрқий түркистандики мәдәний мираслар тоғрисида сөз қилди.

Уйғур яш қәләмкәшләр бирликидин шаир абдухәбир қадир әркан зияритимизни қобул қилип, мәзкур паалийәтниң тәшкиллиниш җәряни вә мәқсити һәққидә тәпсилий тохталди.

Бу кечиликтә уйғур шаирлардин имран садаи, алимҗан сайрами, абдухәбир қадир әркан, абдурәһим парач, мәдинә бавудун қатарлиқлар вәтән һәққидики шеир вә нәсирлирини декламатсийә қилиш арқилиқ паалийәткә қатнашқучиларни интайин тәсирләндүрди.

Мәзкур паалийәткә америкадин келип қатнашқан уйғур зиялийси мәдинәай бавудун ханим зияритимиз қобул қилип, мундақ деди: "бүгүн түркийә язғучилар бирлики тәрипидин орунлаштурулған шеир кечиликигә иштирак қилғанлиқим үчүн наһайити хурсән болдум. Кечиликтә яш шаирлиримиз өзлириниң вәтәнгә болған сеғиниши һәққидики тәсирлик шеирлири билән кичиликни зилзилигә салди. Мән бу шеир кичиликигә қатнишип интайин тәсирләндим. Давамлиқ бу хил мәдәнийәт кечиликлириниң көпләп уюштурулушини, бу арқилиқ шәрқий түркистан давасиға төһпә қошулушини үмид қилимән."

Паалийәткә қатнашқан зиялийлар вә әдибләр бирдәк шәрқий түркистан даваси һәққидә муһим сөз қилди вә бу хил мәдәнийәт паалийәтлириниң шәрқий түркистан давасини түрк хәлқигә аңлитишта муһим васитә икәнликини тәкитләшти. Бу һәқтә түркийә язғучилар җәмийити истанбул шөбисиниң башлиқи мәһмут бийикли әпәндим зияритимизни қобул қилип мундақ деди: "шәрқий түркистан давасини түрк хәлқигә техиму яхши аңлитиш үчүн мәдәнийәт паалийәтлирини тәшкилләш интайин муһим дәп ойлаймиз. Бу сәвәб билән бүгүн бир шеирийәт кечилики өткүздуқ. Буниңдин кийин шәрқий түркистанни вә шәрқи түркистанниң мәдәнийәт байлиқлирини йеңи нәсилләргә тонутуш вә йәткүзүш үчүн һәр хил йиғинлар, кечиликләр вә сөһбәтләргә охшаш мәдәнийәт паалийәтлирини тәшкилләймиз. Мәқситимиз шәрқий түркистан билән түркийә оттурисидики күчлүк мунасивәтниң әдәбий җәһәттин давамлишишини сақлаш вә өзара әдәбий тонушқа игә болушни илгири сүрүштин ибарәт. Мән бүгүн мәзкур паалийәткә қатнашқан язғучилар, шаирлар вә әдибләргә көп рәһмәт ейтимән. Мәдәнийәт алақисини техиму күчәйтиш үчүн түркийә язғучилар бирлики болуш сүпитимиз билән қилишқа тегишлик вәзипимизни техиму яхши орундашқа ишәнч вә сөйгү билән тиришимиз."

Паалийәт интайин қизғин кәйпиятта илип берилди. Паалийәтниң ахирида уйғур яш қәләмкәшләр бирлики түркийә язғучилар бирликигә хатирә буюми совға қилди. Тонулған хитай тәтқиқати мутәхәссиси пәрһат қурбан тәңритағли билән шаир мутәллип сәйдулланиң йеңи китаблири паалийәткә қатнашқучиларға хатирә буюми сүпитидә совға қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт