12-Nöwetlik "Dunya sherqiy türkistanliqlar qérindashliq uchrishishi" ning teyyarliq yighini istanbulda ötküzüldi

Ixtiyariy muxbirimiz arslan
2020-02-17
Élxet
Pikir
Share
Print
12-Nöwetlik "Dunya sherqiy türkistanliqlar qérindashliq uchrishishi" ning teyyarliq yighinidin körünüsh. 2020-Yili féwral,istanbul.
12-Nöwetlik "Dunya sherqiy türkistanliqlar qérindashliq uchrishishi" ning teyyarliq yighinidin körünüsh. 2020-Yili féwral,istanbul.
RFA/Arslan

Istanbuldiki sherqiy türkistan ma'arip we hemkarliq jem'iyitining uyushturushi bilen her yili ötküzülüp kéliwatqan "Dunya sherqiy türkistanliqlar qérindashliq uchrishishi" ning 12-nöwetliki aldimizdiki aylarda ötküzülidighan bolup, bu yighinning teyyarliqi üchün istanbulda kéngesh yighini ötküzüldi.

Kéngesh yighinida söz qilghan sherqiy türkistan ma'arip we hemkarliq jem'iyitining re'isi hidayetullah oghuzxan: "Milliy menpe'etimiz asasida ortaq dewayimizni yaxshi élip bérishta teshkilatlar we rehberler öz-ara munasiwetlerni kücheytish kérek," dédi.

Kéngesh yighin'gha sherqiy türksitan teshkilatlar birlikining ezaliri we dunya Uyghur qurultiyining mu'awin re'isi doktor erkin ekrem qatarliq kishiler we diniy ölimalar qatnashti.

Bu yighinda 12-nöwetlik dunya sherqiy türkistanliqlar qérindashliq uchrishishini qandaq shekilde, qachan, qeyerde ötküzüsh muzakire qilindi. Yighinda yene uchrishishning küntertipliri tartishildi.

Yighinda hidayetulla oghuzxan söz qilip, ötken yilidiki qérindashliq yighinda muzakire qilin'ghan témilar toghrisida toxtilip ötti.

U mundaq dédi: "Ötkenki yillarda ötküzülgen dunya sherqiy türkistanliqlar qérindashliq uchrishishi yighini bilen dewa üchün aktip xizmet qiliwatqan shexs we teshkilat mes'ullirining munasiwetlerning kücheygenlikini körüwatimiz. Emeliyettimu her sahediki munasiwetler aldinqi yillardiki uchrishishlar netijiside barghanséri küchiyiwatidu."

Hidayetullah oghuzxan yene mundaq dédi: "Küreshlirimizning qattiq murekkepliship kétishi bilen birge öz-ara qérindashliq munasiwetni söz bilen emes, emeliy sahede teshkilatlar teshkilatlar bilen, rehber rehberler bilen, ilim sahesidikiler, ölimalar we ziyaliylar hemmimiz birlikte ortaq küch chiqirip, birlikte qedem élishimiz intayin muhim."

U bu yighinning asasliqi dewa yétekchiliri bilen teshkilat mes'ullirining sewiyesini östürüsh shundaqla öz-ara munasiwetlerni küchlendürüshni meqset qilidighanliqini bildürdi.

Hidayetullah oghuzxanning bildürüshiche, bu qétimqi uchrishishta yene herqaysi Uyghur teshkilatliri mes'ullirining qatnishishi bilen 3-nöwetlik "Sherqiy türkistan milliy birlik shurasi" namida yighin ötküzülidiken.

Bu yighinda söz qilghan jama'et erbabi abdulqadir yapchan ependi Uyghurlar bilen xitaylar otturisidiki asasliq ziddiyetning zémin we tupraq mesilisi ikenlikini otturigha qoydi. U sherqiy türkistanni ishghal qiliwalghan xitayning sherqiy türksitan zéminini ebediy özining qiliwélish üchün Uyghurlarni her xil qebih wasitiler bilen yoq qilishqa urunuwatqanliqini tekitlep ötti. U: "Shuning üchün biz xitay bilen bolghan küreshning ishghaliyetke qarshi zémin kürishi ikenlikini éniq békitiwélishimiz kérek," dédi.

Toluq bet