Или педагогика алий техникоминиң оқутқучиси шавкәт абдуллаға 4 хил "җинайәт" артилип, 25 йиллиқ кесилгәнлики дәлиләнди

Мухбиримиз шөһрәт һошур
2021-06-28
Share
Или педагогика алий техникоминиң оқутқучиси шавкәт абдуллаға 4 хил Или педагогика алий техникоминиң биологийә оқутқучиси шавкәт абдулла әпәнди. (Вақти вә орни ениқ әмәс)
Perhet Abdulla teminligen

Или педагогика алий техникоминиң биологийә оқутқучиси шавкәт абдулланиң 25 йиллиқ кесиветилгәнлики буниңдин икки йилчә бурун униң норвегйәдики иниси пәрһат абдулла арқилиқ хәлқараға ашкариланған вә бу учур норвегәйәдики "уйғур әдлийә архипи" дин орун алған иди. Мухбиримизниң икки йилға йеқин елип барған ениқлашлири давамида, мәзкур учурниң тоғрилиқи ғулҗа шәһиридики алақидар хадимлар тәрипидин дәлилләнди. Мәлум болушичә, шавкәт абдуллаға 4 хил аталмиш "җинайәт" артилип, 25 йиллиқ кесиветилгән

"уйғур әдлийә архипи" да хатирилишичә, шавкәт абдулла 1988‏-йили шинҗаң педагогика ониверситетиниң биологийә факултитиға қобул қилинған. У 1993‏-йили оқушини пүттүрүп, или педагогика алий техникомида оқутқучи болуп хизмәт қилған. 25 Йиллиқ хизмәт һаятида оқутқучилиқтин башқа мәктәп оқуғучилар башқармисиниң мудири қатарлиқ бир қатар қошумчә вәзипәләрниму утуқлуқ өтәп кәлгән. Мәктәп рәһбәрлики тәрипидин тәқдирлинип келиватқан шавкәт абдулла 2018 ‏-йили язлиқ тәтилдә бирдинла "җинайәт гумандари" ға айланған вә аталмииш "өгиниш" кә елип кетилгән. Өйидин кечидә бешиға қара халта кийдүрлүп тутуп кетилгән шавкәт абдулланиң нәдә "тәрбийә" линиватқанлиқини ғулҗадики алақидар органлардин биләлмигән аилә тавабиатлири таки үрүмчигә қәдәр берип сүрүштә қилип баққан болсиму, лекин учур алалмиған. Пәқәт 2019‏-йилниң авғуст ейиға кәлгәндә, униң норвегийәдики иниси пәрһат абдулла хитай үлкилиридә яшватқан тонуш-билишлири арқилиқ акисиға бирқанчә түрлүк аталмиш "җинайәт" артилип, 25 йиллиқ кесиветилгәнлики һәққидә еғизакий учур алған.

Или областлиқ маарип идарисиниң бир хадими шавкәт абдулла һәққидә мәлумат берәлмиди.

Йеқинда ғулҗа вәзиийитидин хәвәрдар кишиләрдин бириниң радийомизға инкас қилишичә, шавкәт абдулла маарип саһәсидики кәспий нәтиҗилири биләнла әмәс, бәлки иҗтимаий паалийәтләрдики актипчанлиқи, болупму тәшкилатчи миҗәз-характери биләнму җәмийәттә кәң тонулған; униң юрт әһлини сөйүндүргән бу алаһидилики әйни чағда хитай даирилири тәрипидинму етирап қилинип, бир мәзгил шәһәрлик маарип идарисда мәмурий хадим сүпитидә хизмәткә тәйинләнгән. Әмма униң маарип хизмитидики милләтләр мәсилисигә бәкрәк көңүл бөлүши алақидар хитай рәһбәр вә хизмәтдашлириниң дитиға яқмиған вә бу орундин мәктипидики оқутқучилиқ хизмитигә қайтурулған.

Ғулҗа шәһәрлик маарип идарисиниң бир хадимидин илгири бу идаридә хизмәт қилған шавкәт абдулла исимлик бириниң бар-йоқлиқини сориғинимизда, у бу ишханида пүтүнләй хитай хадимлар ишләйдиғанлиқини тилға алди.

Вәзийәттин хәвәрдар киши инкасида шавкәт абдулланиң маарип идарисида хизмәт қилған мәзгилидә, маарип хираҗити вә әслиһәлирини тәқсим қилиш мәсилисидә уйғур мәктәпләрниң мәнпәәтни қоғдап бирқанчә қетим тәнқидий пикир баян қилғанлиқини, лагер тутқуни башланғанда униң дәл әнә қилмиши сәвәблик тутулғанлиқини илгири сүргән.

Ғулҗа шәһәрлик маарип идарисиниң хадими бу һәқтики соалимизға җавабән өзлириниң хизмәткә йеңидин орунлашқан яшлар икәнлики, шавкәт абдуллаға охшаш яшта чоңларниң қилған-әткәнлиридин хәвири йоқлуқини баян қилди. Биз униңға шавкәт абдулланиң оттура яш кишиләрдин икәнликини әскәртип, маарип саһәсидин тутқун қилинғанлар арисида шавкәт абдулла дәп бирсиниң бар-йоқлуқини сориғинимизда, у бу соалимизғиму җавап бериштин өзини қачурди.

Инкас қилинишичә, хизмәт җәряндики миллий көз қариши сәвәблик тутқун қилинған шавкәт абдулла лагерға соланғандин кейин, 20 йил аввалқи аталмиш "хаталиқлири" динму һесап беришкә мәҗбур болған. Нәтиҗидә униң 1997‏-йили ғулҗада давам қилған мәшрәп паалийитидә адәттики бир әза болуп орун елиши униң "миллий бөлгүнчилик җинайити" болуп хатириләнгән. Или педагогика алий техникоминиң бир хадими шавкәт абдулланиң делосиниң сәзгүр делолар қатарида икәнликини вә бу һәқтә мәлумат берәлмәйдиғанлиқини баян қилиш арқилиқ униң тутқунда икәнликини вастилиқ һалда етирап қилди.

Инкаста йәнә дейилишичә, шавкәт абдулланиң норвегийәдики иниси шавкәт абдуллаға өй сетивелиши үчүн пул әвәтиши аталмиш терорчиларға ярдәм бериш" дәп саналған. Бу аталмиш "җинайәт" һәққидә шавкәт абдулланиң норвегийәдики иниси пәрһат абдулла бизгә мәлумат бәрди.

Инкаста баян қилинишичә, лагердики барлиқ тутқунларға охшашла, шавкәт абдуллаға қарита елип берилған сорақта униңдин мумкин қәдәр көп хаталиқ тепиш, униңға мумкин қәдәр еғир җинайәт артиш вә уни мумкин қәдәр еғиз җазалаш асаслиқ мәқсәт қилинған. Шуңа униң норвегийәдики бир иниси билән телефондамәлум бир китап һәққидә пикир алмаштуришиму "бөлгүнчилик идийәси" дәп саналған. Ғулҗа шәһиридики бир дөләт аманлиқ сақчиси, шавкәт абдулланиң телефондин аталмиш "чатақ чиққанлиқи" ни баян қилиш арқилиқ инкастики мәзкур учурниңму тоғрилиқини дәлиллиди.

Инкаста йәнә әскәртилишичә, сорақчилар җазани еғирлитиш үчүн "җинайәтниң йеңиси йәңгиллик қилип қалса, конисини қетиш" тәдбири қоллинилған. Нәтиҗидә униң әйни чағда иқтисадий җазасини төләп болған аталмиш "пиланлиқ туғутқа хилаплиқ қилиш" қилмишиму униң "төтинчи түрлүк җинайити" сүпитидә сорақ дәптиригә йезилған. Мәлум болушичә, униң юқириқи аталмиш 4 җинайитигә җәмий 25 йиллиқ қамақ җазаси берилгән.

Телефонимизни ахирида қобул қилған йәнә бир алақидар хадим 25 йиллиқ кесилгән шавкәт абдулланиң қайси мәктәпниң оқутқучиси икәнлики һәққидики соалимизға җавабән, униң или пдагогика алий техникоминиң оқутқучиси икәнликини баян қилиш вә "шавкәт абдулланиң 25 йиллиқ кесилгәнлики тоғриму?" дегән соалимизға җавабән: "шундақ, тоғра" дәп җавап бериш арқилиқ шавкәт абдулла һәққидә "уйғур әдлийә архипи" да хатириләнгән барлиқ учурларниң тоғрилиқини дәлиллиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт