Бейҗиңдики җиддийчилик, ши җинпиңниң қәсими

Ихтиярий мухбиримиз әкрәм
2021-06-22
Share
Бейҗиңдики җиддийчилик, ши җинпиңниң қәсими Хитай рәиси ши җинпиң вә башқа рәһбәрлири хитай компартийәсиниң музейини зиярәт қилғанда компартийәсигә қәсәм қилди. 2021-Йили 18-июн, бейҗиң.
AP

"франсийә авази" 22-июн елан қилған "хитай коммунистик партийәсиниң тәбрикләш мурасимидин илгирики ғәлитә ишлар" намлиқ хәвәрдә баян қилишичә, хитай һакимийити коммунистик партийә қурулғанлиқиниң 100 йиллиқини тәбрикләш паалийитини пүтүн мәликәт миқясида қанат яйдурған болуп, 7-айниң 1-күни өткүзүлидиған бу мурасимдин илгири бейҗиңда җиддий һаләт пәйда қилип, өзлириниң әндишилирини ашкарилап қойған.

Хәвәрдә мунулар тилға елиниду: "хитай коммунистик партийәсиниң 100 йиллиқини хатириләш мәзгили йеқинлишип қалди, бирақ ғәлитә йери кәйпият интайин җиддий, гоя қандақтур зор бир вәқә йүз беридиғандәкла. Бихәтәрлик тәдбирлирини күчәйтиш йолға қоюлупла қалмастин, мәркизи интизам тәкшүрүш комитети йәнә 30-йиллардики коммунистик партийәниң рәһбәрлиридин бири болған гу шүнҗаңниң һекайисини көтүрүп чиқип, кишиләрни чөчүтти."

Хәвәрдә баян қилинишичә, хитай бейҗиңда муқимлиқни сақлаш һәрикити қозғап, тйәнәнмен мәйданидин сирт, бейҗиңниң асаслиқ районлирини йерим һәрбий һаләт түсигә киргүзүп қойған. 5-Айдин башлапла бейҗиңдики иҗарә өйләрдә олтуридиған кишиләрниң рәсмийәтлирини тәкшүрүп, "тазилаш" елип барған. 18-Июн почта саһәсигә буйруқ чүшүрүп шаңхәй, җяшиң, җиңгаңшән, зүнйи, йәнән, ши бәйпо, бейҗиң қатарлиқ 7 районға келидиған почта боюмлири тез йолланма мулазимитини бирақла чәклигән. Бейҗиңға киридиған хәт вә йолланмиларни 2-қетимлиқ тәкшүрүштин өткүзүшни йолға қойған. Йәр асти пойиз йоллири еғизлириға тәкшүрүш хадимлирини бәлгиләп, йолучиларни назарәт қилишни күчәйткән.

Хитай һакимийити юқириқи тәдбирләрдин ташқири, бейҗиңниң 9 районидики һава бошлуқида учқучисиз айрупилан, модел айрупилан, ләгләк, шар, асман чириқи учурушни вә кәптәр қатарлиқ қушларниңму учушини чәклигән. 7-Айниң 1-күнидин башлап бейҗиңни һава долқунлири арқилиқ симсиз идарә қилиш тәдбирини бекиткән. Хәвәрдә тилға елишичә, хитайниң бу тәдбирлириниң нишани өзиниң хәлқи, шундақла партийә ичи һәмдә партийә ичидики юқири дәриҗилик әмәлдарлар икән.

Худди мәзкур хәвәрдә хитай партийә мәктипиниң сабиқ мудири сәй шиа коммунистик партийәни "қара горуһ" дәп тәшвирлигәндәк, германийәдики уйғур зиялиси абдушүкүр әпәндиму уни "терорлуқ тәшкилати" дәп атиди. Германийәдики уйғур зиялиси пәрһат муһәммиди әпәндиму бу һәқтә өз қарашлирини шәрһийиләп өтти.

Хәвәрдә илгири сүрүшичә, хитай мәркизи интизам тәкшүрүш комитети 6-айниң 19-күни гу шүнҗаңниң һекайисини көтүрүп чиқип, хитай коммунистик партийәси шаңхәй тармиқиниң мәсули болған гу шүнҗаңниң 1931-йили партийәгә асийлиқ қилғанлиқи үчүн җазаланғанлиқи, һазирқи коммунистик партийә әзалириниң партийәгә мутләқ садиқ болуши вә партийәгә һәргизму асийлиқ қилмаслиқи лазимлиқини баян қилған.

Бу кона тарихни оттуриға сөрәп чиқирип, партийә әзалириға қорқунуш селиш пикрини ши җинпиң тәминлигән. Хәвәрдә әскәртишичә, гу шүнҗаңниң һекайиси тәсвирләнгән мақалидә ши җинпиңниң партийәгә мутләқ садиқ болушни тәкитлигәнлики тәкрар оттуриға қоюлған. Гу шүнҗаң әйни чағда партийәгә асийлиқ қилғанлиқи үчүн, шу замандики хитай коммунистик партийәсиниң рәһбәрлиридин бири болған җу енләй униң пүтүн уруғ-җәмитини қирип ташлиған. Мақалә бу нуқтини тилға алмиған. Әмма "тохуни боғузлап, маймунни чөчүтүш" һелисини қоллинип, "иккини һимайә қилиш", йәни коммунистик партийәни вә партийә мәркизи комитетини һимайә қилиш, маһийәттә болса ши җинпиңни вә униң рәһбәрликини һимайә қилиш, ши җинпиңға мәңгү садиқ болушни базарға салған.

6-Айниң 18-күни ши җинпиң хитай компартийәси мәркизи комитетиниң даимий һәйәтлирини йиғип, өзи баш болуп партийәгә болған садақитини йеңилиған. Ши җинпиң алдида туруп қәсәмнамини оқиған. Ли кечаң вә ваң чишән қатарлиқ хитай дөләт рәһбәрлири ши җинпиңниң сөзини тәкрарлап партийәгә болған садақитини йәнә бир қетим билдүргән.

Немә вәҗидин бундақ ғәлитә ишлар йүз бериду?

Хәвәрдә ипадә қилишичә, нөвәттә ши җинпиңниң өзиму қорқунуш ичидә яшаватқан болуп, күтүлмигән бир сиясий өзгириштин әндишә қилидикән. Һәр даим "кимләр арқамдин қандақ сүйқәстләрни пиланлаватқанду?" дегән вәһимидин қутулалмайдикән. Униң әң әндишә қилидиғини өзиниң хәлқи, андин өзиниң партийәси ичидики юқири дәриҗилик рәһбәрләр икән. юқири дәриҗилик рәһбәрләр ши җинпиңниң көзигә ишәнчисиз көрүнүп қалмаслиқ үчүн бир биригә билдүрмәй башқиларни униңға чеқип туридикән. Буниң билән һәр хил раст-ялған хәвәрләр пәйда болидикән. Мәсилән: "хитай дөләт хәвпсизлики министерликиниң муавин министери доң җиңвей бирқанчә күн илгири америкаға қечип кәтти" дегән хәвәр буниң бир мисали икән.

Хәвәрдә тәкитлинишичә, ши җинпиңниң партийә байримини өткүзүштин илгири бейҗиңда юқури дәриҗидики бихәтәрлик тәдбирлирини бәрпа қилиши, партийә ичидә садақәт билдүрүп қәсәм ичиши вә тәшвиқат қораллирини ишқа селип партийәгә болған садақәтни тәшвиқ қилиши, униң хатирҗәм, бихәтәр әмәсликиниң бир дәлили һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт