“шинҗаң сақчи һөҗҗәтлири” дики ясин бәкри һәққидә чәт әлдики бир савақдиши гуваһлиқ бәрди

Мухбиримиз шөһрәт һошур
2023.03.24
Yasin-Bekri-Shinjang-Saqchi-Hojjetliri-1.jpg Ясин бәкриниң “ шинҗаң сақчи һөҗҗәтлири”дики хитай сақчилири тәрипидин тартилған сүрити, 2018-йили.
XinjiangPoliceFiles

“шинҗаң сақчи һөҗҗәтлири”дә исми тилға елинған тутқунлардин ясин бәкри һәққидә униң нөвәттә түркийәдә яшаватқан савақдиши қәлбинур йүсүп ханим гуваһлиқ бәрди. Қәлбинур ханим, ясин бәкри билән оттура мәктәптә 3 йил бир синипта оқуған вә бир мәзгил бир партида олтурған болуп, у ясинниң тутқун қилинғанлиқини 2019‏-йили савақдашлар үндидар топидики инкаслардин хәвәр тапқан.

Нөвәттә түркийәдә яшаватқан қәлбинур йүсүп ханим, “шинҗаң сақчи һөҗҗәтлири”дики тутқунларниң сүрәтлирини көрүветип, арисидин савақдиши ясин бәкрини тонуп қалған. Мәзкур һөҗҗәттә ясин бәкриниң 2018‏-йили тутулғанлиқи вә шу йили28 яш икәнлики қәйт қилинған. Әмма униң турушлуқ орни вә шуғуллиниватқан кәспи һәққидә мәлумат берилмигән.  ясин бәкри һәққидә радийомизға гуваһлиқ бәргән қәлбинур ханимниң дейишичә, улар 2010‏-йили қәшқәрдики бир оттура мәктәпни пүттүргән. Синипта өгиниш башлиқи болған ясин бәкри, оттура  мәктәпни әла нәтиҗә билән пүттүргән болсиму, аилә қийинчилиқи сәвәбидин алий мәктәптә оқуш арзусини әмәлгә ашуралмиған. У оттура мәктәпни пүттүргәндин кейин, қәшқәр тоққузақта тиҗарәт билән шуғулланған вә узун өтмәй той қилип өйлүк-очақлиқ болған. Қәлбинур ханим өзи чәт әлгә чиқишниң алдида ясин бәкриниң бир пәрзәнти  барлиқидин хәвири барлиқини ейтти.

ясин бәкри бир қисим әл-ағинилири билән биллә чүшкән сүрәт.
Ясин бәкри бир қисим әл-ағинилири билән биллә чүшкән сүрәт.
Anglighuchimiz teminligen

Қәлбинур ханим, алий мәктәптики оқуш вә муһаҗирәт һаяти давамида, ясин бәкриниң әһвалидин савақдашлар үндидар топи арилиқ хәвәр тепип турған. Дейилишичә, 2018‏-йилиға кәлгәндә ясин бәкри бир түркүм савақдашлири қатарида үндидар топидин үни ғайип болған; йәни у топқа һечқандақ учур йоллимайдиған вә һәрқандақ бир учурға инкас қайтурмайдиған болуп қалған. 2019‏-Йилиға кәлгәндә, топтики савақдашлардин бири ясин бәкриниң исмини тилға алғинида, бирқанчиси наразилиқ билдүрүшкән, йәни ясин бәкрини тилға елишниң өзлиригә хәвп кәлтүридиғанлиқини ипадиләшкән. ясин бәкриниң тутқунда икәнликини мушу инкаслардин билгәнликини баян қилған қәлбинур ханим, мәзкур топта һечқандақ ипадә билдүрмәслик йоли билән сақлинип қалғанлиқи вә бир түркүм савақдашлириниң тутқунда икәнликидин хәвәр тапқанлиқини әскәртти.

Мәзкур һөҗҗәттә, ясин бәкриниң “топлишип җәмийәт тәртипини бузуш” қилмиши билән тутулғанлиқи хатириләнгән, әмма бу  қилмишни конкирет қайси сорунда кимләр билән садир қилғанлиқи йезилмиған.

Ясин бәкриниң оқуғучи мәзгилидила тәртиплик, интизамчан вә үлгилик бир оқуғучи икәнликини әсләп өткән қәлбинур ханим, савақдиши ясин бәкрини бир җинайәтчиләр тизимликидә учритип қелишни бурун һеч тәхмин қилмиғанлиқини әскәртип өтти.

Илгирики зиярәтлиримиз давамида, муһаҗирәттики уйғур көзәткүчиләр, уйғур җәмийитидә әхлақий җәһәттә үлгилик шәхисләрниң җазалинип, ибрәт елинишқа тегишлик кишиләрниң болса әтиварлинип келиватқанлини көп қетим оттуриға қойған вә буниң дәлили сүпитидә районда мәсчитләрниң тақилип, қимарханиларниң кеңәйтилиши; ичимлик вә чекимлик билән шуғулланғанларниң бихәтәр кишиләр санилип, уштумтут һарақ ташливәткәнләрниң “диний әсәбийлик” гумани тутулушлирини мисаллар билән тилға алған иди.

Қәлбинур йүсүп ханим, ясин бәкригә охшаш зор бир түркүм  савақдашлириниң әйни йилларда намратлиқиниң қурбани болған  болса, әмдиликтә вәһший сиясий боран-чапқунниң, йәни ирқий қирғинчилиқиниң қурбаниға айланғанлиқини ечиниш билән тилға алди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.