Shiwétsiyede doxtur emir extem Uyghur köchmenlirige dawalinish we sughurta sawatliri berdi

Bérndin ixtiyariy muxbirimiz hebibulla izchi teyyarlidi
2024.04.23
emir-extem-chish-doxtur-1.jpg Doxtur emir extem ependi yéngi köchmenlerge dawalinish we sughurtaning asasiy bilimliri toghrisida léksiye sözlimekte. 2024-Yili 20-aprél, shiwétsiye.
RFA/Hebibulla Izchi

20-Aprél küni shiwétsiye paytexti sitokholmdiki “Ténista” kutupxanisida Uyghurlardin yétiship chiqqan chish doxturi emir extem ependi shiwétsiyede yashawatqan Uyghurlargha, siyasiy panahliq bilen yawropagha yéngi kelgen Uyghurlar eng köp duch kélidighan dawalinish, saghlamliq we sughurta mesililiridiki biliwélishqa tégishlik ishlar toghrisida etrapliq melumat bergen bolup, bu léksiye shiwétsiye Uyghurlirining qizghin qarshi élishigha érishken.

Shiwétsiye Uyghur birlikining re'isi bextinur abduréhim xanim bu heqte tepsiliy melumat bérip, bu pa'aliyetning yéngi bir muhitqa köchmen bolup yashawatqan kishilerning eng éhtiyajliq we biliwélishqa tégishlik bolghan, xelq turmushigha biwasite munasiwetlik ishlar ikenlikini, shundaqla buning xelqqe menpe'et yetküzidighan bir léksiye bolghanliqini, bolupmu yéngi kelgen Uyghurlar üchün tolimu muhim bir téma ikenlikini tekitlidi:

Léksiye bergüchi doxtur emir extemning a'ilisi bundin 34 yil burun ottura asiyadiki qazaqistandin shiwétsiyege köchmen bolup kelgen bolup, emir extem ependi bolsa shiwétsiyede chong bolghan, ikkinchi ewlad utuq qazan'ghan yashlardindur. Bu qétimqi léksiye shiwét tilida sözlen'gen we ikki sa'et dawamlashqan. U, qatnashquchilarning so'allirigha estayidilliq bilen qana'etlinerlik jawab bérip yéngi bir muhitqa maslishish we duch kélidighan emeliy mesililer heqqide etrapliq melumat bergen. U radiyomizning ziyaritini qobul qilip, u özining bu léksiye heqqidiki köz qarashlirini radiyo anglighuchilar bilen ortaqlashti.

Doxtur emir extem ependi uchun orunlashturulghan yéngi köchmenlerge dawalinish we sughurtaning asasiy bilimliri toghrisidiki léksiye sözlesh pa'aliyitide shiwétsiye Uyghur birlikining re'isi bextinur abduréhim söz qilmaqta. 2024-Yili 20 aprél, shiwétsiye.
Doxtur emir extem ependi uchun orunlashturulghan yéngi köchmenlerge dawalinish we sughurtaning asasiy bilimliri toghrisidiki léksiye sözlesh pa'aliyitide shiwétsiye Uyghur birlikining re'isi bextinur abduréhim söz qilmaqta. 2024-Yili 20 aprél, shiwétsiye.
RFA/Hebibulla Izchi

Shiwétsiye Uyghur birlikidin nebijan ela ependining bildürüshiche, her sahediki mutexessislerni teklip qilip léksiye orunlashturush shiwétsiye Uyghur birliki teshkilatining xizmet da'irisi ichidiki bir tür bolup, gerche shiwétsiye ijtima'iy parawanliq yawropada eng yaxshi dölet bolsimu, emma til bilmeslik, medeniyet, yéngi muhit we qanun perqliri sewebidin yéngi kelgenler bezi qiyinchiliqlargha uchraydiken. Shu sewebtin bundin kéyinmu mushu shekildiki xelq turmushigha biwasite munasiwetlik, köchmenler biliwélishqa tégishlik mesililer heqqide, shu sahede yétiship chiqqan mutexessis Uyghurlarni teklip qilip her xil léksiyelerni orunlashturmaqchi iken.

Bu qétimqi léksiyege Uyghurlardin bashqa milletlermu qatnashqan we yawropaning dawalash we sughurta sistémidiki xelq turmushida eng köp duch kélidighan mesililer heqqide so'allar sorashqan. Bu léksiyege qatnashqan Uyghurlar we bashqa döletlerdin kelgen kishiler bu léksiye heqiqeten bizning emeliy turmushimizdiki hel qilishqa we biliwélishqa tégishlik mesililer idi déyiship, bundin kéyinmu shundaq léksiyeler dawamliq orunlashturushni, muhajirette yéngi muhit, yéngi dölette bilishqa tégishlik ishlar we xelqning turmushigha munasiwetlik uchurlar bilen yétekleshning tolimu muhimliqini éytishqan.

Doxtur emir extem ependi üchün orunlashturulghan yéngi köchmenlerge dawalinish we sughurtaning asasiy bilimliri toghrisidiki léksiye sözlesh pa'aliyitining axirida xatire süret. 2024-Yili 20 aprél, shiwétsiye.
Doxtur emir extem ependi üchün orunlashturulghan yéngi köchmenlerge dawalinish we sughurtaning asasiy bilimliri toghrisidiki léksiye sözlesh pa'aliyitining axirida xatire süret. 2024-Yili 20 aprél, shiwétsiye.
RFA/Hebibulla Izchi

Shiwétsiyede texminen 3 minggha yéqin Uyghur yashaydighan bolup, bu döletke Uyghurlar 1990-yillarning béshidin bashlap kélishke bashlighan. Ataqliq Uyghur sen'etkari we naxshichisi, kompozitor merhum küresh küsen bu döletke deslepte kelgen Uyghurlardin bolup, u shiwétsiyege depne qilin'ghanidi. Shiwétsiyediki Uyghurlar qazaqistan qatarliq ottura asiya memliketliri we Uyghur élidin kélip yerleshken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.