Shiwétsariye Uyghur folklori medeniyet sen'et kéchiliki ötküzüldi

Shiwétsariyening zurix ishtatining bülax shehiride 14-iyun künidin 15-iyun'ghiche Uyghur kiyim-kéchek medeniyitining 100 yilliq örneklirini körgezme qilish bilen birge, Uyghurlarning her qaysi yurtlirining kiyim-kéchekliri, naxsha-ussul, muzikilirini asas qilghan Uyghur folklor medeniyiti kéchiliki ötküzüldi.

Bu pa'aliyetni teshkilligüchi amine xanim, bir ussulchi sen'etkar bolush süpiti bilen, peqet sen'etke ehmiyet bérish bilenla qalmay, yene Uyghur xelqining folklorigha alahide ehmiyet bergen. U, kéchilikte Uyghurlarning chalghuliri, en'eniwi kiyim-kéchekliri, bezi qolda tikilgen tarixiy en'eniwi kiyim-kéchekler, shundaqla yüz xilgha yéqin doppa qatarliqlarni körgezme qilghan.

Biz bu munasiwet bilen amine xanimni ziyaret qilduq, u özini tonushturup, özining shiwétsariyege toy qilip kélip, bu yerde yurtini séghinishning hijranliq künlirini özining milliy kimliki we güzel Uyghur medeniyitini shiwétsariyeliklerge tonushturush arqiliq ötküzüp kelgenlikini we hazirghiche élip barghan bezi pa'aliyetliri heqqide köz qarashlirini sözlep ötti.

Bu kéchilikke shiwétsariyediki Uyghurlardin bashqa yene, shiwétsariyelik tetqiqatchilar we bashqa Uyghur medeniyitige qiziqquchilarmu qatnashqan bolup, tetqiqatchi charlés sarasén ependi özining bu kéchilikte hés qilghanlirini bayan qildi.

U, bu kéchilikte körgenliridin, Uyghurlarning ne qeder parlaq bir medeniyetke ige xelq ikenlikini tonup yetkenlikini, özining bundaq chong tiptiki Uyghur medeniyet-sen'et kéchilikige tunji qétim qatnishishi ikenlikini, muhajirettiki Uyghurlarning özining milliy kimliki, örp-aditi, medeniyitini saqlap qélishni zörür ikenlikini bildürdi.

Amine xanimmu bu heqte, Uyghurlarning qedimdin parlaq medeniyetke ige bir xelq ikenlikini we buni chet elliklerge tonushturush bilenla qalmay, chet ellerde chong boluwatqan ikkinchi ewlad perzentlerningmu özining milliy kimliki we medeniyitini öginishning ehmiyitining zor ikenlikini bildürdi.

 Bu kéchilikke kelgen shiwétsariye Uyghur jem'iyitining sabiq re'isi endili qaraxanli ependimu, bu pa'aliyetning heqiqeten mol mezmunluq bir pa'aliyet bolghanliqini, bolupmu körgezmige qoyulghan doppilarning türining jiqliqidin özining heyran qalghanliqini ipadilep, özining köz qarashlirini radiyo anglighuchilar bilen ortaqlashti.

 Pa'aliyette yawropa Uyghur ansambili, norwégiye Uyghur komitétining ezasi möminjan ejem, her bir yurtning xelq ahanglirini orundighanda amine we uning oqughuchilirining shu yurtlarning özige xas kiyimlirini kiyip chiqip, Uyghur usulini wayigha yetküzüp oynishi qatnashquchilarning qizghin alqishigha érishti. Möminjan ejem ependi ziyaritimizni qobul qilip, “Muhajirettiki Uyghurlarning özining milliy örp-aditi, medeniyitige ige chiqishi kérek” dédi.

 Shiwétsariye ötküzülgen bu pa'aliyetni teshkilligüchi amine xanim bolsa, özi qeshqerdin chiqqan ussuli oqutquchisi, b d t pen-ma'arip we medeniyet komitéti qarmiqidiki xelq'ara ussul kéngishining ezasi bolup, u hazirghiche yilda bir qétim mushu xil chong tiptiki pa'aliyetni teshkillep, shiwétsariyeliklerge Uyghur medeniyiti, sen'iti, örp-adetlirini tonushturup, shiwétsariye we dunyaning her qaysi jayliridin kelgen Uyghur sen'iti heweskarlirini terbiyelep kelmekte.