Shiwétsiyede jaza lagérliri toghriliq "Neq meydan guwahliqi yighish" pa'aliyiti ötküzüldi

Ixtiyariy muxbirimiz ekrem
2020-01-17
Élxet
Pikir
Share
Print
Shiwétsiyede ötküzülgen "Neq meydan guwahliqi yighish" pa'aliyitining uqturushi.
Shiwétsiyede ötküzülgen "Neq meydan guwahliqi yighish" pa'aliyitining uqturushi.
RFA/Ekrem

Muhajirettiki Uyghurlar 2017-yilidin étibaren ijtima'iy taratqularda xitayning Uyghur diyarida tesis qilghan jaza lagérlirigha qamalghan ata-ana, qewmi-qérindashliri we dost-buraderliri toghriliq guwahliq bérish pa'aliyitini bashlighandin kéyin 2018-2019-yilliri bu pa'aliyet yuqiri dolqun hasil qilghan idi. 2020-Yilining muqeddimisidimu guwahliq bérish heriketliri keng qanat yéyishqa bashlidi.

Jaza lagérliridiki tutqunlarning arxipini turghuzush xizmiti bilen meshghul bolup kéliwatqan merkizi norwégiyening oslo shehiridiki "Uyghur edliye arxipi ambiri" hazirgha qeder 5 mingdin artuq Uyghurning arxipini xatirilep chiqqan bolup, yéqindin buyan bu organ sin körünüshliri arqiliq guwahliq bérish pa'aliyitini yolgha qoyup, toplighan guwahliq körünüshlirini in'gilizche tillargha terjime qilip élan qilmaqta idi. 

17-Yanwar chüshtin kéyin shiwétsiye Uyghur ma'arip uyushmisining orunlashturishi, "Uyghur edliye arxipi ambiri" xadimlirining ishtirakida "Neq meydan guwahliqi yighish" pa'aliyiti ötküzülgen. Pa'aliyettin ilgiri jüme namizida guwahliq ishliri toghrisida wez éytilghan. Shiwétsiyening paytexti sitokholim shehiridiki bir bölük Uyghurlar bu pa'aliyetke aktip qatniship xitayning jaza lagirlirigha qamalghan urugh-tughqanliri toghriliq guwahliq bergen. 

"Uyghur edliye arxipi ambiri" ning mes'uli, norwégiye Uyghur komitétining re'isi bextiyar ömer ependi bu heqte toxtalghanda bügünki bu "Neq meydan guwahliqi yighish" pa'aliyitining nahayiti netijilik ötküzülgenlikini ilgiri sürdi.

Ikki kün dawamlishidighan bu pa'aliyet heqqide toxtalghan shiwétsiyediki Uyghur ziyaliysi nijat turghun ependi bu guwahliqlarning xitayning saxta teshwiqatlirini aghdurup tashlashta zor rol oynaydighanliqini tekitlidi.

Shiwétsiye Uyghur ma'arip uyushmisining mes'ulliridin abdulla kökyar ependimu bu heqte pikir bayan qilip, guwahliq bérishning her türlük ehmiyetlirini tilgha aldi. U sözide guwahliqtin özini qachurushning diniy, milliy we insaniy nuqtidin xata bolidighanliqini izahlidi.

2019-Yili 12-ayning 9-küni Uyghur aptonum rayonluq hökümetning re'isi shöhret zakir "Lagirdikilerning oqush püttürüp öylirige qaytqan" liqini tilgha alghan bolsimu, buning yalghanliqini ispatlash yüzsidin hazirgha qeder wetendiki urugh-tughqanliri bilen alaqe qilalmay kéliwatqan muhajirettiki köpligen Uyghurlar guwahliq bérish pa'aliyetlirini hélihem dawamlashturmaqta. 

"Uyghur edliye arxipi ambiri" ning mes'uli bextiyar ömer ependi "Neq meydan guwahliqi yighish" pa'aliyitini aldimizdiki künlerde yene Uyghurlar topliship olturaqlashqan bashqa döletlerdimu qanat yayduridighanliqini eskertti.

Toluq bet