Bir a'ilidiki 5 ayalgha éghir jaza kesken korla xelq sot mehkimisi hökümnamisining chinliqi delillendi

Muxbirimiz shöhret hoshur
2022-01-19
Share
turme-siyasiy-mehbus.jpg Jinayetchilerni tutup turush merkizining derwazisi. Yerlik kishiler éytishiche, bu orun siyasiy jinayetchiler üchün ishlitilidiken. 2017-Yili 2-noyabir, korla.
AP

Yéqinda radiyomiz korla sheherlik xelq sot mehkimisige a'it bolghan bir a'ilidiki 5 ayal kishige éghir jaza kesken bir “Hökümname” ni qolgha chüshürdi.

“Hökümname” de qeyt qilinishiche, bir a'ilidiki ana, qiz we kélin bolup jem'iy 5 kishige atalmish “Qanunsiz diniy pa'aliyet bilen shoghullandi” dégen jinayet bilen 7 yilliqtin 20 yilliqqa qeder qamaq jazasi bérilgen. Muxbirimizning téléfonigha jawap bergen mezkur sot mehkisining alaqidar xadimi 2019‏-yili 4‏-ayda chqirilghan mezkur “Hökümname” ge imzasi qoyulghan shir'eli memet qatarliq 4 neper sotchining nöwette korla sheherlik sot mehkimiside wezipe ötewatqanliqini bayan qilish arqiliq mezkur sot hökümnamisining chinliqini delillidi.

Qolimizgha chüshken korla sheherlik xelq sot mehkimisining 2019-yil 312-nomurluq bir jinayi ishlar hökümnamiside bayan qilinishiche, xelchem pazil, melikizat memet, patigül memet, zemire memet we bostan ibrahim qatarliq besh ayal atalmish “Qanunsiz diniy tebligh anglighan we buninggha sorun hazirlap bergen” liki üchün, “Jem'iyet tertipini buzush we milliy öchmenlik peyda qilish” jinayiti bilen eyiblinip, 7 yildin 20 yilgha qeder oxshimighan muddette késiwétilgen. Mehkumlarning eng chongi xelchem pazil bu yil 78 yash, eng kichiki bostan ibrahim 33 yash bolup, bulardin birsi dölet xizmetchisi, qalghanliri a'ile ayalliri iken. Hökümnamining axiri'igha “Bash sotchi shir'eli memet, sotchi exmetjan qurban we ibadet yasin, pütükchi dilmu'arat perhat” dégen isimlarda imzalar qoyulghan.

Biz mezkur hökümnamining chinliqini delillesh üchün, korla sheherlik sot mehkimisige téléfon qilduq. Sotning bir xadimi, mezkur hökümnamidiki déloning tepsilati we hökümnamida imzasi bar sotchilarning kimliki heqqidiki so'alimizgha jawaben, bu délolar heqqide saqchixanidin melumat élishimizni tewsiye qildi. Mezkur xadim bizning bu sotta mezkur namdiki sotchilarning bolghan-bolmighanliqi heqqidiki so'alimizghimu jawap bermidi.

Hökümnamide bayan qilinishiche, mezkur 5 ayal korla sheherlik teptish mehkimisi teripidin eyiblen'gen. Eyibnamide mezkur 5 ayal teblighini anglighan kishining xelchigül memet isimlik birsi ikenliki we uning nöwette chet elde ikenliki qeyt qilin'ghan. Muhajirettiki korlalqilarning bayan qilishiche, xelchigül memet eyni chaghda korlada jama'et sorunliridiki aktipliqi bilen közge körün'gen we bir diniy zat a'iliside chong bolghan bir ayal bolup, u nöwette türkiyede yashimaqtiken.

Téléfonimizni qobul qilghan xelchigül xanim, mezkur hökümnamida tilgha élin'ghan shexsning özi ikenlikini bayan qilish bilen birlikte, mezkur 5 mehkumning kimlikliri heqqidimu melumat berdi. Déyilishiche, mezkur besh mehkum ana, qiz we kélindin terkib tapqan bolup, ular örp-adetler boyiche, bir-birini yoqlashqan, a'ilisini ziyaret qilghan we bu uchrishishlirida öz'ara diniy sawat chiqirish, diniy melumatlirini toluqlash we ewlat yétishtürüsh heqqide öz'ara pikir almashturghan hem yardemleshken iken. Özining bir diniy zat a'iliside chong bolghanliqi seweplik belgilik diniy melumatqa ige ikenlikini tilgha alghan xelchigül xanim, bu uchrishishlirining Uyghurlarda nechche yüz yildin buyan dawam qilip kéliwatqan bir medeniyet pa'aliyti we en'ene ikenlikini tekitlidi. U yene bu weqening pilanliq we teshkillik bir siyasiy herket süpitide bir terep qilinishining, nöwette rayonda dawam qiliwatqan irqiy qirghinchiliqining janliq bir pakiti ikenlikini körsitip béridighanliqini ilgiri sürdi.

Mezkur hökümnamide qedriye memet isimlik yene bir mehkumningmu ismi tilgha élin'ghan bolup, uning bashqa bir déloda ayrim bir terep qilinidighanliqi qeyt qilighan. Xelchigül memet mezkur xanimningmu hökümnamide isimi tilgha élin'ghan 5 ayal bilen bir a'ile kishiliri ikenlikini, mezkur a'ilidiki aka-ukilardin mehmut memet we musajan memet, zöhregüllerningmu késiwétilgenlikini, yeni bu a'ilidin jem'iy 9 kishining nöwette qamaqta ikenlikini tilgha aldi.

Téléfonimizni qobul qilghan korla sheherlik sot mehkimisining yene bir xadimi, mezkur hökümnamida ismi tilgha élin'ghan bash sotchi shir'eli memet, sotchi exmetjan qurban we ibadet yasinlarning bu sot mehkimiside hélihem xizmet qiliwatqanliqini bayan qilish arqiliq, mezkur sot hökümnamisining chinliqi delillidi.

Mezkur hökümnamidin melum bolushiche, mehkumlardin eng deslepte tutulghini melikizat memet bolup, hökümname 2019‏-yili 4‏-ayning 2‏-küni chiqirilghan. Bu Uyghur rayonining sabiq re'isi shöhret zakirning rayonda atalmish “Terbiyelesh merkezlirining taqalghanliqi” ni élan qilghan mezgilge toghra kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet