Abduweli ayup: “Söygüning bedili bolidu”

Norwégiyede turushluq siyasiy pa'aliyetchi abduweli ayup ependi Uyghur qirghinchiliqini arxiplashturush üchün qilghan xizmetliri bilen Uyghurlargha we Uyghur mesilisige diqqet qiliwatqan kishilerge tonushluq. Yéqinda uning sabiq xitay saqchisi bilen yüzlishishi we bu jeryanda ichki dunyasida yüz bergen keskin toqunushlar bash téma qilin'ghan “Niqabning arqisida” namliq höjjetlik filimi amérikadiki eng chong höjjetlik filim féstiwalida qoyulghandin kéyin, Uyghurlar mesilisi qaytidin diqqet qozghidi.

Mezkur filimda abduweli ayup ependi 2022-yili 5-ayda gérmaniyege bérip, gérmaniyede panahliq tilep turuwatqan, eyni waqitta Uyghurlarni tutush we qiynap soraq qilishqa biwasite qatnashqan sabiq xitay saqchisi bilen körüshidu. U xitay saqchidin türmidiki qiyin-qistaqlar we Uyghurlarni keng kölemde tutush siyasitining yürgüzülüshi heqqide so'al soraydu.

U radiyomizgha bergen ziyaritide bu heqte toxtilip, özining ashundaq xitay formisi kiygen xitay saqchilirining qiynap soraq qilishlirigha uchrighan bolghachqa, xitay saqchisi bilen yüzlishishning nahayiti qiyin'gha toxtighanliqini éytti.

Abduweli ayup ependi qeshqerde ana til mektipi achqanliqi üchün tutulup, 2013-yili 8-ayning 19-künidin 2014-yili 11-ayning 20-künigiche türmide yatqan. Chet'elge chiqqandin kéyin türmide uchrighan qiyin-qistaqlar we xitayning Uyghurlargha yürgüzüwatqan basturush siyasetliri heqqide köp qétim guwahliq bergenidi.

Abduweli ayup ependi söhbitimizning axirida mundaq dédi: “Söygüning bedili bolidu. Bu bedelni mushundaq janni xejlep turup öteymiz” .

Abduweli ayup ependi bilen ötküzgen söhbitimizning tepsilatini yuqiridiki ulinishtin anglighaysiler.