Қирғизистан уйғурлири вә сәнәткарлар хәлқ артисни султан кәримофни қутқузушқа тиришмақта

Ихтиярий мухбиримиз ферузә
2021-02-11
Share
Қирғизистан уйғурлири вә сәнәткарлар хәлқ артисни султан кәримофни қутқузушқа тиришмақта Қирғизистан бойичә мәрһум язғучи чиңғиз айтматоф тәвәллутиниң 90 йиллиқиға беғишлан мурасим қирғизистан хәлқ әртиси султан кәримофниң риясәтчиликидә елип берилди. 2018-Йили декабир, бишкәк.
RFA/Féruze

Қирғизистанда тонулған уйғур сәнәткар, "қирғизистан җумһурийитиниң хәлқ артиси" унваниға еришкән султан кәримофни қоллаш үчүн җумһурийәтлик филармонийәдә, йәни сәнәткарлар сарийида хәйри-сахавәт консерти болуп өтти. Консертта қирғизистан нахша чолпанлири, уссул ансамбиллириниң артислири вә атақлиқ сазәндиләр өз маһаритини тамашибинлар һузуриға һавалә қилишти. Консерттин киргән кирим султан кәримофниң давалинишиға ишлитилидикән.

Игилинишичә, "қирғизистан хәлқ хәлқ артиси" султан кәримоф еғир кесәлгә гириптар болуп, түркийәдә давалиниши керәк икән. Җамаәт әрбаби вә паалийәтчи ассол молдокматова ханим, өзиниң фәйсебок тор сәһиписидә, җамаәтни султан кәримофниң давалинишиға ярдәм беришкә тәклип қилғаниди. Ассол молдокматова өз сәһиписидә мундақ дәп язған: "2015-йили дохтурлар султан кәримофқа еғир диагноз қойғаниди. Булар диабит кесәллики, ашқазан асти безиниң яллуғлиниши, бөрәк аҗизлиқи, йүрәк зәиплишиши вә башқа кесәлләр иди. 2020-Йилниң июн ейидин тартип 1-типлиқ диабит кесили дәп тәкитләнгән султан кәримоф инсулинға тайинип қалди. У түркийәдә җиддий давалинишқа моһтаҗ! есил сәнәткаримизни қутулдурушимиз керәк!".

Атақлиқ артис, маһир нахшичи султан кәримофқа ярдәм көрситиш үчүн яш сәнәткарлар, султан кәримофниң шагиртлири һәм атақлиқ артислар, йәни хизмәтдашлири, шундақла қирғизистан хәлқ бирләшмисиниң тәркибидики аз санлиқ милләтләр вәкиллириниң сәнәт гуруппилири бирлишип җумһурийәтлик филармонийәдә консерт уюштурғаниди.

Мәзкур консерт даңлиқ сазәндә рустәм дәвләтофниң тәшәббускарлиқида уюштурулди. Радио зияритимизни қобул қилған рустәм дәвләтоф: "султан кәримоф хәлқимизниң ғурури" дәп тәкитлиди. У мундақ деди:

"султан кәримоф ривайәт характерлик бир шәхс. Чүнки у, уйғур нахшичилиридин биринчи болуп ‹қирғизистан хәлқ артиси' унваниға еришти, биз үчүн бу бәк муһим бир нуқта, биз униң билән ғорурлинимиз. Әлвәттә бу юлтузимизға қолимиздин келишичә ярдәм беришкә тиришиватимиз, мана сахавәтлик марафон уюштурдуқ, әмди болса консерт уюштуруватимиз. Бу консертта униң шагиртлири, тиятир, филармонийә вә консерваторийәдики хизмәтдашлири һәм башқа сазәндиләр султан кәримофни қоллаш үчүн бу консертта өзлириниң сәнәт маһаритини намаян қилмақта. Көп кишиләр бизниң қиммәтлик, мухтәрәм султан кәримофни қоллашни истәп бүгүнки паалийәткә қатнашти".

Мәзкур паалийәткә йәнә қирғизистан уйғурлириниң "иттипақ" җәмийитиниң аяллар кеңиши әзаси хәлчәм ибдиминова ханим қатнишип, һәр хил милләтләр вәкиллириниң султан кәримофниң миллитини айримастин келип өз ярдәм қоллирини сунғанлиқи үчүн өз миннәтдарлиқини билдүрди. Униң ейтишичә, султан кәримоф даңлиқ нахшичи болуп, у қирғизистандин башқа йәнә чәт мәмликәтләрдики 30 дин ошуқ шәһәрләрдә консерт қойғаниди.

Игилинишичә җумһурийәтлик сәнәт сарийида өткән хәйри-сахавәт консертиға қирғизистанниң хизмәт көрсәткән артислиридин зәмира мәвланова, юлия руская, нахша чолпини өмәр, шундақла қирғиз, уйғур, өзбек, түрк, татар, рус, қарачайлар вә башқа милләтләрниң уссул ансамбиллири, тонулған уйғур сазәндә-нахшичилири қатнашқан. "атуш" вә "әссалам" нахша гуруппилириниң артислири, "юлтуз" миллий уйғур уссул ансамбилиниң уссулчилиридин сәбирҗан ниязоф, ришат садиқоф, ришат аюпоф қатарлиқлар өз маһарәтлирини көрсәтти.

Қирғизистан хәлқ бирләшмисиниң йетәкчи мутәхәссиси әйнагүл чолова зияритимизни қобул қилип, "султан кәримоф пәқәт уйғурлар үчүн әмәс, бәлки пүтүн қирғизистан сәнитидә хизмәт көрсәткән" дәп тәкитлиди. У мундақ деди:

"султан кәримоф 1994-йили қирғизистан хәлқ бирләшмиси қурулғандин тартипла униң һәр бир паалийитигә һармай-талмай нахшичи қатари, мәслиһәтчи һәм риясәтчи қатарида актип қатнишип кәлмәктә. Мана бүгүнки паалийитимизни уюштурушимиз сәвәби бу султан кәримофниң қирғиз хәлқигә сиңдүргән хизмити үчүн, қирғизистан хәлқ бирләшмисигә көрсәткән чәксиз хизмити үчүндур. Униң пәқәт уйғур хәлқигила әмәс, пүтүн қирғизистан хәлқигә көрсәткән хизмәтлири үчүн бүгүнки мурасимни уюштурдуқ. Алладин, султан кәримофниң саламәтликиниң яхши болуп, қайтидин аримизға қошулуп нахшилирини яңритип, бибаһа мәслиһәтлирини берип йеңидин хушал мурасимларни елип беришини тиләймиз. Тиликимиз қобул болғай" деди.

Уйғур хәлқиниң тонулған сәнәткари, "қирғизистан хәлқ артиси" султан кәримофниң давалинишиға ярдәм бериш үчүн қирғизистан уйғурлири "иттипақ" җәмийити бир қатар паалийәтләрни елип барғаниди. Радио зияритимизни қобул қилған "иттипақ" җәмийитиниң рәиси әсқәр қасими султан кәримофниң көрсәткән хизмәтлирини юқири баһалап, бәзи паалийәтләр һәққидә тохталди.

Султан кәримоф 1959-йили қирғизистанниң иссиқкөл вилайитидики йәтти оғуз йезисида көп балилиқ аилидә туғулған. 2001-Йили қирғизистан җумһурийитиниң хизмәт көрсәткән артиси, 2011-йили қирғизистан җумһурийитиниң хәлқ артиси қатарлиқ юқири унванларға еришкән. Султан кәримоф қирғизистан хәлқ бирләшмисиниң түрлүк мусабиқилиридә, уйғур җәмийитиниң аммиви тәнтәнилик мурасимлирида қирғиз, уйғур вә башқа тилларда нахшиларни орундап тамашибинларниң қизғин алқишлириға еришкән бир милләтпәрвәр сәнәткардур. Игилинишичә һазир султан кәримоф түркийәдики шипаханида, әң аз күндә давалинишни башлимақчи.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт