Qirghizistan Uyghurliri we sen'etkarlar xelq artisni sultan kerimofni qutquzushqa tirishmaqta

Ixtiyariy muxbirimiz féruze
2021-02-11
Share
Qirghizistan Uyghurliri we sen'etkarlar xelq artisni sultan kerimofni qutquzushqa tirishmaqta Qirghizistan boyiche merhum yazghuchi chingghiz aytmatof tewellutining 90 yilliqigha béghishlan murasim qirghizistan xelq ertisi sultan kerimofning riyasetchilikide élip bérildi. 2018-Yili dékabir, bishkek.
RFA/Féruze

Qirghizistanda tonulghan Uyghur sen'etkar, "Qirghizistan jumhuriyitining xelq artisi" unwanigha érishken sultan kerimofni qollash üchün jumhuriyetlik filarmoniyede, yeni sen'etkarlar sariyida xeyri-saxawet konsérti bolup ötti. Konsértta qirghizistan naxsha cholpanliri, ussul ansambillirining artisliri we ataqliq sazendiler öz maharitini tamashibinlar huzurigha hawale qilishti. Konsérttin kirgen kirim sultan kerimofning dawalinishigha ishlitilidiken.

Igilinishiche, "Qirghizistan xelq xelq artisi" sultan kerimof éghir késelge giriptar bolup, türkiyede dawalinishi kérek iken. Jama'et erbabi we pa'aliyetchi assol moldokmatowa xanim, özining feysébok tor sehipiside, jama'etni sultan kerimofning dawalinishigha yardem bérishke teklip qilghanidi. Assol moldokmatowa öz sehipiside mundaq dep yazghan: "2015-Yili doxturlar sultan kerimofqa éghir di'agnoz qoyghanidi. Bular di'abit késelliki, ashqazan asti bézining yallughlinishi, börek ajizliqi, yürek ze'iplishishi we bashqa késeller idi. 2020-Yilning iyun éyidin tartip 1-tipliq di'abit késili dep tekitlen'gen sultan kerimof insulin'gha tayinip qaldi. U türkiyede jiddiy dawalinishqa mohtaj! ésil sen'etkarimizni qutuldurushimiz kérek!".

Ataqliq artis, mahir naxshichi sultan kerimofqa yardem körsitish üchün yash sen'etkarlar, sultan kerimofning shagirtliri hem ataqliq artislar, yeni xizmetdashliri, shundaqla qirghizistan xelq birleshmisining terkibidiki az sanliq milletler wekillirining sen'et guruppiliri birliship jumhuriyetlik filarmoniyede konsért uyushturghanidi.

Mezkur konsért dangliq sazende rustem dewletofning teshebbuskarliqida uyushturuldi. Radi'o ziyaritimizni qobul qilghan rustem dewletof: "Sultan kerimof xelqimizning ghururi" dep tekitlidi. U mundaq dédi:

"Sultan kerimof riwayet xaraktérlik bir shexs. Chünki u, Uyghur naxshichiliridin birinchi bolup 'qirghizistan xelq artisi' unwanigha érishti, biz üchün bu bek muhim bir nuqta, biz uning bilen ghorurlinimiz. Elwette bu yultuzimizgha qolimizdin kélishiche yardem bérishke tirishiwatimiz, mana saxawetlik marafon uyushturduq, emdi bolsa konsért uyushturuwatimiz. Bu konsértta uning shagirtliri, tiyatir, filarmoniye we konsérwatoriyediki xizmetdashliri hem bashqa sazendiler sultan kerimofni qollash üchün bu konsértta özlirining sen'et maharitini namayan qilmaqta. Köp kishiler bizning qimmetlik, muxterem sultan kerimofni qollashni istep bügünki pa'aliyetke qatnashti".

Mezkur pa'aliyetke yene qirghizistan Uyghurlirining "Ittipaq" jem'iyitining ayallar kéngishi ezasi xelchem ibdiminowa xanim qatniship, her xil milletler wekillirining sultan kerimofning millitini ayrimastin kélip öz yardem qollirini sun'ghanliqi üchün öz minnetdarliqini bildürdi. Uning éytishiche, sultan kerimof dangliq naxshichi bolup, u qirghizistandin bashqa yene chet memliketlerdiki 30 din oshuq sheherlerde konsért qoyghanidi.

Igilinishiche jumhuriyetlik sen'et sariyida ötken xeyri-saxawet konsértigha qirghizistanning xizmet körsetken artisliridin zemira mewlanowa, yuliya ruskaya, naxsha cholpini ömer, shundaqla qirghiz, Uyghur, özbék, türk, tatar, rus, qarachaylar we bashqa milletlerning ussul ansambilliri, tonulghan Uyghur sazende-naxshichiliri qatnashqan. "Atush" we "Essalam" naxsha guruppilirining artisliri, "Yultuz" milliy Uyghur ussul ansambilining ussulchiliridin sebirjan niyazof, rishat sadiqof, rishat ayupof qatarliqlar öz maharetlirini körsetti.

Qirghizistan xelq birleshmisining yétekchi mutexessisi eynagül cholowa ziyaritimizni qobul qilip, "Sultan kerimof peqet Uyghurlar üchün emes, belki pütün qirghizistan sen'itide xizmet körsetken" dep tekitlidi. U mundaq dédi:

"Sultan kerimof 1994-yili qirghizistan xelq birleshmisi qurulghandin tartipla uning her bir pa'aliyitige harmay-talmay naxshichi qatari, meslihetchi hem riyasetchi qatarida aktip qatniship kelmekte. Mana bügünki pa'aliyitimizni uyushturushimiz sewebi bu sultan kerimofning qirghiz xelqige singdürgen xizmiti üchün, qirghizistan xelq birleshmisige körsetken cheksiz xizmiti üchündur. Uning peqet Uyghur xelqigila emes, pütün qirghizistan xelqige körsetken xizmetliri üchün bügünki murasimni uyushturduq. Alladin, sultan kerimofning salametlikining yaxshi bolup, qaytidin arimizgha qoshulup naxshilirini yangritip, bibaha meslihetlirini bérip yéngidin xushal murasimlarni élip bérishini tileymiz. Tilikimiz qobul bolghay" dédi.

Uyghur xelqining tonulghan sen'etkari, "Qirghizistan xelq artisi" sultan kerimofning dawalinishigha yardem bérish üchün qirghizistan Uyghurliri "Ittipaq" jem'iyiti bir qatar pa'aliyetlerni élip barghanidi. Radi'o ziyaritimizni qobul qilghan "Ittipaq" jem'iyitining re'isi esqer qasimi sultan kerimofning körsetken xizmetlirini yuqiri bahalap, bezi pa'aliyetler heqqide toxtaldi.

Sultan kerimof 1959-yili qirghizistanning issiqköl wilayitidiki yetti oghuz yézisida köp baliliq a'ilide tughulghan. 2001-Yili qirghizistan jumhuriyitining xizmet körsetken artisi, 2011-yili qirghizistan jumhuriyitining xelq artisi qatarliq yuqiri unwanlargha érishken. Sultan kerimof qirghizistan xelq birleshmisining türlük musabiqiliride, Uyghur jem'iyitining ammiwi tentenilik murasimlirida qirghiz, Uyghur we bashqa tillarda naxshilarni orundap tamashibinlarning qizghin alqishlirigha érishken bir milletperwer sen'etkardur. Igilinishiche hazir sultan kerimof türkiyediki shipaxanida, eng az künde dawalinishni bashlimaqchi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet