Кучалиқ дохтур таһир һәсән чәтәлдики “хәтәрлик кишиләр” билән телефонлашқанлиқи үчүн тутулған

Мухбиримиз шөһрәт һошур
2019.09.27
lager-derwazisi.jpg Уйғур районидики хитайниң 13-девизийәси “тәрбийәләш лагери” ниң алди дәрвазиси. 2017-Йили алдинқи йерим йили, қумул.
BITTER WINTER

Паалийәтчи абдувәли аюп тәрипидин түзүлгән “тутқундики зиялийлар тизимлики” дә куча наһийәлик дохтурханиниң дохтури таһир һәсәнниңму тутқунда икәнлики йезилған. Мухбиримизниң бу һәқтә елип барған ениқлашлири давамида мәзкур учурниң тоғрилиқи дәлилләнди вә униң чәтәлдики аталмиш “хәтәрлик кишиләр” билән телефонлашқанлиқи үчүн тутулғанлиқи айдиңлашти.

Һөрмәтлик радио аңлиғучилар, мәзкур “тутқундики зиялийлар тизимлики” дә куча наһийәлик дохтурханиниң дохтури таһир һәсәнниң лагерда икәнлики йезилған. Әмма униң қачан вә немә үчүн тутулғанлиқи баян қилинмиған. Телефонимизни қобул қилған куча наһийәлик дохтурхана хадимлири таһир һәсәнниң дохтурханида бар-йоқлуқи һәққидики соалимизға җаваб бәрмиди. Телефонимизни қобул қилған йәнә бир хадим дохтур таһир һәсәнниң қачан тутулғанлиқи һәққидики соалимизға өзиниң алдирашлиқини сәвәб қилип көрситип, җаваб бәрмиди. Әмма хизмәтдиши таһир һәсәнниң тутқунда икәнликини рәт қилмиди.

Муһаҗирәттики куча вәзийитидин хәвәрдар кишиләрдин бири таһир һәсәнниң тутқунда икәнликидин хәвәрдар икәнликини баян қилиш билән бирликтә униң тутулуш сәвәби һәққидики пәризини оттуриға қойди. У бу һәқтә таһир һәсәнниң иҗтимаий паалийәтләрдә актип бири икәнлики, кучада җәмийәттә хели тонулғанлиқи, болупму диний саһәдики кишиләр билән алаһидә йеқин мунасивити барлиқи, бәлким униң мунасивәт даирисидин чатақ чиққанлиқи үчүн тутулуп кәткәнлик еһтималлиқини илгири сүрди.

Куча наһийәлик дохтурханидин телефонимизни қобул қилған дохтурхана қоғдаш хадими таһир һәсәнниң телефондин чатақ чиққанлиқи үчүн, йәни аталмиш “хәтәрлик кишиләр” билән телефонлашқанлиқи үчүн тутулғанлиқини ашкарилиди. Әмма бу хадим таһир һәсәнниң ениқ қачан тутулғанлиқи вә нөвәттә қәйәрдә тутуп турулуватқанлиқи һәққидә мәлумати йоқлуқини баян қилди. У бу һәқтә куча наһийәлик дөләт аманлиқ сақчилиридин әһвал игилишимизни тәвсийә қилди. “тутқундики зиялийлар тизимлики” ниң елан қилинған вақтидин қариғанда, таһир һәсәнниң бултур йил ахири яки йил оттурилири тутулғанлиқи мәлум. Кучадики мәлум бир дөләт аманлиқ хадими таһир һәсәнниң тутулғиниға бир йил болуп қалғанлиқини баян қилди. У йәнә таһир һәсәнниң чәтәл билән телефонлашқини үчүн тутулғанлиқини дәлиллиди. 

Һөрмәтлик радио аңлиғучилар, муһаҗирәттики кучалиқлардин бири түнүгүн дохтур таһир һәсәнниң кучадики әң тәҗрибилик ашқазан дохтури икәнлики, униң тутулушиниң дохтурхана ички кесәлликләр бөлүмидә чоң бир бошлуқ яратқанлиқи, дохтурхана мәсуллириниң наһийә рәһбәрлиригә капаләтнамә йезип бериш арқилиқ таһир һәсәнни лагердин елип чиққанлиқини баян қилған болсиму, әмма бу учурниң тоғрилиқи дәлилләнмиди.

Фирансийә ахбарат агентлиқиниң өткән йили хитайниң ички материяллиридин нәқил елип хәвәр қилишичә, уйғур райониниң партком секретари чен чүәнго аталмиш “тәрбийиләш мәркәзлири” ни “башқуруш” та “мәктәптәк оқутуш, һәрбий газармидәк чиң тутуш вә түрмидәк мәхпий тутуш” ни тәшәббус қилған икән. Шуңа дохтур таһир һәсәнниң дохтурханиниң арилишиш билән қоюп берилгәнлики учуриниң тоғрилиқи еһтималдин узақ көрүлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.