Җәмийәттә "от йүрәк тарихчи" дәп нам алған йүсүпҗан ясинниң тутқунда икәнлики ашкариланди

Мухбиримиз шөһрәт һошур
2021-12-01
Share
Җәмийәттә "тәңриниң қамчиси атилла" қатарлиқ китаблири вә "уйғур миллий роһиниң асаслири" намлиқ нутуқлири билән билән тонулған тарих оқутқучиси йүсүпҗан ясин.
Oqurmen teminligen

"тәңриниң қамчиси атилла" қатарлиқ китаблири вә "уйғур миллий роһиниң асаслири" намлиқ нутуқлири билән билән тонулған тарих оқутқучиси йүсүпҗан ясин, гәрчә хитай дөлити тәрипидин етирап вә етибарға еришмигән болсиму, уйғур җәмийитидә сөйүлгән вә "от йүрәк тарихчи" дәп нам алған. Дәл мушу сәвәбтин болса керәк, у 2017-йилдин кейин зор бир түркүм сәркә зиялийлар қатарида үн-тинсиз ғайиб болған. Йеқинда үрүмчидин кәлгән бир намсиз хәттики йип учлириға асасән елип барған ениқлашлиримиз давамида йүсүпҗан ясинниң тутқунда икәнлики дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Йеқинда исмини ашкарилашни халимайдиған бир аңлиғучимизға үрүмчидин кәлгән бир намсиз хәттә баян қилинишичә, җәмийәттә "от йүрәк тарихчи" дәп нам алған, үрүмчи 23-оттура мәктәпниң тарих оқутқучиси йүсүпҗан ясин, 2017-йилдин башлап из-дерики ғайиб болған. Намсиз хәттә йүсүпҗан ясинниң кимлик номури вә әсли олтурушлуқ адреси ениқ баян қилиниш билән бирликтә, әйни чағда униңға мәсул болған аһалиләр комитети хадими вә мәсул сақчи хадиминиң исим вә алақә учурлириму тәминләнгән. Инкаста нами тилға елинған мәсул хадим телефонимизни алған болсиму, әмма йүсүпҗанниң нөвәттики әһвали һәққидә мәлумат берәлмиди. Дәсләптә өзиниң мәсул хадим икәнликини йошурмиған мәзкур хадим, арқидин йүсүпҗанниң мәсул хадими икәнликидин тенивалди.

Тор архиплирида көрситилишичә, йүсүпҗан ясин 1970-йили атуш теҗәндә туғулған болуп, у 2003-йили шинҗаң университетиниң тарих факултетини пүттүрүп үрүмчи шәһиридики 23-оттура мәктәпкә ишқа чүшкән. Униң һазирға қәдәр "му мәдәнийити һәққидики издинишләр",

Дастан-миллий байлиқ", "тәңри қамчиси аттила", "уйғур миллий роһиниң асаслири", "уйғур йеңи маарипи вә өмәр бай", "уйғур мәдәнийәт тарихида тотемизм мәсилиси", "әдәбият нәзәрийәсидин қисқичә баян", "рус әдәбиятида тәсвирләнгән шәрқ" қатарлиқ илмий мақалилири елан қилинған.

23-Оттура мәктәп мәмурий хадими, мәктипидә йүсүпҗан ясин исимлик бир оқутқучи болғанлиқини баян қилған болсиму, әмма униң ақивити һәққидә мәлумат берәлмиди.

Тор архиплиридин мәлум болушичә йүсүпҗан ясинниң мақалилири чәтәлдики уйғурлар арисидиму кәң тарқалған, болупму униң "миллий роһниң асаслири" намлиқ мақалиси һәвәскар дикторлар тәрипидин оқуп тарқитилған.

Ениқлашлиримиздин йүсүпҗан ясинниң 23-оттура мәктәптә йәни хизмәт орнида йоқ икәнлики айдиңлашти. Биз мәктәп рәһбәрлири вә маарип назаритигә телефон қилип, йүсүпҗанниң нөвәттики әһвали һәққидә мәлумат соридуқ. Алақидар хадимлардин бири бу һәқтә җ х тармақлиридин әһвал игилишимиз керәкликини баян қилиш арқилиқ, униң тутқунда икәнликини васитилик дәлиллиди. Биз униңдин йүсүпҗанниң нәдә икәнлики, кесилгән яки кесилмигәнликини сориғинимизда, униң қилмишиниң җинайи ишлар делосиға четишлиқ икәнликини илгири сүрди.

Мәлум болушичә, йүсүпҗан ясин җараңлиқ нутқи, есил кишилик пәзилити, һәқ-наһәқ мәсилилиридики кәскин мәйдани сәвәблик, мәктәп вә җәмийәттә көп санда зоқланғучилири болған бир маарипчи вә тәтқиқатчи болуп, у мушу хаслиқлири сәвәблик, оқуғучи вақтидин башлапла даириләрниң чәткә қеқиш вә һәр хил аваричиликлиригә күп қетимлап учрап кәлгән. Униңға бу қетимқи тутулушида, йәнә қандақ хәвп-хәтәрләрниң йәткәнлики яки йетидиғанлиқи һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт