Jem'iyette "Ot yürek tarixchi" dep nam alghan yüsüpjan yasinning tutqunda ikenliki ashkarilandi

Muxbirimiz shöhret hoshur
2021-12-01
Share
Jem'iyette "Tengrining qamchisi atilla" qatarliq kitabliri we "Uyghur milliy rohining asasliri" namliq nutuqliri bilen bilen tonulghan tarix oqutquchisi yüsüpjan yasin.
Oqurmen teminligen

"Tengrining qamchisi atilla" qatarliq kitabliri we "Uyghur milliy rohining asasliri" namliq nutuqliri bilen bilen tonulghan tarix oqutquchisi yüsüpjan yasin, gerche xitay döliti teripidin étirap we étibargha érishmigen bolsimu, Uyghur jem'iyitide söyülgen we "Ot yürek tarixchi" dep nam alghan. Del mushu sewebtin bolsa kérek, u 2017-yildin kéyin zor bir türküm serke ziyaliylar qatarida ün-tinsiz ghayib bolghan. Yéqinda ürümchidin kelgen bir namsiz xettiki yip uchlirigha asasen élip barghan éniqlashlirimiz dawamida yüsüpjan yasinning tutqunda ikenliki delillendi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Yéqinda ismini ashkarilashni xalimaydighan bir anglighuchimizgha ürümchidin kelgen bir namsiz xette bayan qilinishiche, jem'iyette "Ot yürek tarixchi" dep nam alghan, ürümchi 23-ottura mektepning tarix oqutquchisi yüsüpjan yasin, 2017-yildin bashlap iz-dériki ghayib bolghan. Namsiz xette yüsüpjan yasinning kimlik nomuri we esli olturushluq adrési éniq bayan qilinish bilen birlikte, eyni chaghda uninggha mes'ul bolghan ahaliler komitéti xadimi we mes'ul saqchi xadimining isim we alaqe uchurlirimu teminlen'gen. Inkasta nami tilgha élin'ghan mes'ul xadim téléfonimizni alghan bolsimu, emma yüsüpjanning nöwettiki ehwali heqqide melumat bérelmidi. Deslepte özining mes'ul xadim ikenlikini yoshurmighan mezkur xadim, arqidin yüsüpjanning mes'ul xadimi ikenlikidin téniwaldi.

Tor arxiplirida körsitilishiche, yüsüpjan yasin 1970-yili atush téjende tughulghan bolup, u 2003-yili shinjang uniwérsitétining tarix fakultétini püttürüp ürümchi shehiridiki 23-ottura mektepke ishqa chüshken. Uning hazirgha qeder "Mu medeniyiti heqqidiki izdinishler",

Dastan-milliy bayliq", "Tengri qamchisi attila", "Uyghur milliy rohining asasliri", "Uyghur yéngi ma'aripi we ömer bay", "Uyghur medeniyet tarixida totémizm mesilisi", "Edebiyat nezeriyesidin qisqiche bayan", "Rus edebiyatida teswirlen'gen sherq" qatarliq ilmiy maqaliliri élan qilin'ghan.

23-Ottura mektep memuriy xadimi, mektipide yüsüpjan yasin isimlik bir oqutquchi bolghanliqini bayan qilghan bolsimu, emma uning aqiwiti heqqide melumat bérelmidi.

Tor arxipliridin melum bolushiche yüsüpjan yasinning maqaliliri chet'eldiki Uyghurlar arisidimu keng tarqalghan, bolupmu uning "Milliy rohning asasliri" namliq maqalisi heweskar diktorlar teripidin oqup tarqitilghan.

Éniqlashlirimizdin yüsüpjan yasinning 23-ottura mektepte yeni xizmet ornida yoq ikenliki aydinglashti. Biz mektep rehberliri we ma'arip nazaritige téléfon qilip, yüsüpjanning nöwettiki ehwali heqqide melumat soriduq. Alaqidar xadimlardin biri bu heqte j x tarmaqliridin ehwal igilishimiz kéreklikini bayan qilish arqiliq, uning tutqunda ikenlikini wasitilik delillidi. Biz uningdin yüsüpjanning nede ikenliki, késilgen yaki késilmigenlikini sorighinimizda, uning qilmishining jinayi ishlar délosigha chétishliq ikenlikini ilgiri sürdi.

Melum bolushiche, yüsüpjan yasin jarangliq nutqi, ésil kishilik peziliti, heq-naheq mesililiridiki keskin meydani seweblik, mektep we jem'iyette köp sanda zoqlan'ghuchiliri bolghan bir ma'aripchi we tetqiqatchi bolup, u mushu xasliqliri seweblik, oqughuchi waqtidin bashlapla da'irilerning chetke qéqish we her xil awarichiliklirige küp qétimlap uchrap kelgen. Uninggha bu qétimqi tutulushida, yene qandaq xewp-xeterlerning yetkenliki yaki yétidighanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet