Bilinkén: xitayning teywen'ge qaratqan her qandaq tajawuz herikiti “Dehshetlik aqiwet” peyda qilidu

Amérika tashqi ishlar ministiri antoniy bilinkén jüme küni dunya rehberliri qatnashqan bir yighinda söz qilip, xitay teywen'ge qaratqan her qandaq tajawuz qilish herikitining “Dehshetlik aqiwet” peyda qilidighanliqi heqqide agahlandurush bergen hemde xitay rehberlirini teywen boghuzi weziyitini jiddiyleshtürmeslik toghrisida nahayiti estayidil oylinishqa chaqirghan.

Bilinkén bu sözlerni jüme küni roytérs agéntliqi sahibxaniliq qilghan “Roytérs nékst” namliq herqaysi ellerdin kelgen nopuzluq siyasiyon we nopuzluq erbablar qatnashqan bir söhbet yighinda qilghan.

U, béyjing da'irilining öz-özige xoja bolup kéliwatqan teywenning hazirqi halitini özgertishke urunuwatqanliqini, emma amérikining bu aralning özini qoghdash iqtidarini kapaletke ige qilish eqidisining qet'iy ikenlikini bildürgen.

Bilinkén mundaq dégen: “Men xitay rehberlirining krizisini kücheytmeslik toghriliq estayidil oylinishini ümid qilimen. Méningche, bu krizis nurghun kishilerge dehshetlik aqiwet élip kélipla qalmastin, xitaydin tartip hemmeylenning menpe'etige ziyanliq.”

Eger teywen tajawuzchiliqqa uchrighanda amérika herbiy küch ewetishke wede bérelemdu-yoq dégen so'algha jawab bergen bilinkén “Bizning teywenning özini mudapi'e qilish iqtidarining bolushini kapaletlik qilidighanliqimiz mesilisidiki meydanimiz yillardin buyan nahayiti éniq we izchil roshen bolup keldi. Biz bu wedimizge izchil kapaletlik qilimiz.”

Yéqidin buyan xitayning teywenning hawa mudapi'e rayonigha köp qétim suqunup kirip, teywen boghuzi weziyitini jiddiyleshtürgenliki dunyawi diqqet nuqtisigha aylan'ghan.

Bu yil öktebir amérika prézidénti baydén eger xitay teywen'ge hujum qilsa amérikining teywenni qoghdaydighanliqini éytip zor ghulghula qozghighan idi.