Шветсийидә ечилған " 11 ‏-сентәбир вәқәсиниң зиянкәшликигә учриған милләтләр" намлиқ йиғинда уйғурлар мәсилиси асаслиқ темиға айланди

Бүгүн 11 ‏-сентәбир вәқәсиниң 11 йиллиқ хатирә күни. Бу мунасивәт билән шивитсийидики " карта 2008" намидики инсан һәқлири тәшкилати " 11 ‏-сентәбирдин кейинки хәлқара терроримға қарши һәрикәттә зиянкәшликкә учриған милләтләр" дегән темида йиғин өткүзди.

2012-09-11
Share
Guantanamo-turmisi-305.jpg Сүрәт, гуантанамо түрмисидин бир көрүнүш.
AFP Photo

Йиғинда уйғурлар мәсилиси асаслиқ темиға айлинип, нөвәттә гуантанамода йетиватқан 3 нәпәр уйғур мәһбусниң әһвали, гуантанамодин қуюветилгән уйғурларниң турмуш мәсилилири вә нөвәттики уйғур вәзийити һәққидә пикир вә мулаһизиләр, шундақла гуантанамодики 3 нәпәр уйғурни қутқузушниң йоллири һәққидә тәклипләр сунулди. Йиғинға гуантаномодин қоюветилгән сабиқ мәһбус адил абдулһекимму қатнашти

Бу йиғинға шивитсийидики уйғур маарип уюшмисиму тәклип билән қатнашқан. Йиғинда шивитсийидики инсан һәқлири паалийәтчилири билән бирликтә, бир қисим адвокатлар, ахбаратчилар вә бир нәпәр парламент әзасиму қатнашқан. Йиғинда шивитсийидики  уйғур маарип уюшмисиниң рәиси ниҗат турғун нөвәттики уйғур вәзийити һәққидә мәлумат бәргән.  Ниҗат турғунниң билдүрүшичә, йиғин қатнашқучилири, 11 ‏-сентәбир вәқәсидин кейинки хәлқара терроризмға қарши һәрикәттә, әң көп зиянкәшликкә учриған милләтниң уйғурлар икәнликини, хитайниң 11 ‏-сентәбирдин кейин хәлқара муһиттин пайдилинип, уйғурларға қарита бастуруш һәрикәтлирини һәссиләп күчләндүргәнликини оттуриға қойған. Йиғинда сабиқ мәһбус адил абдулһекимниң адвокатиму сөз қилип , адил абдулһекимниң һаятини, болупму униң гуантанамодин қоюветилгәндин кейинки  һаят хатирисини мисалға елип, гуантанамода йетиватқан 3 уйғурниңму, адил абдулһекимгә охшаш кишиләрдин икәнликини, уларниң пәқәт вәтән вә миллитиниң қайғусини йигән вә униң үчүн өзини атиған алиҗанап кишиләрдин болғанлиқи үчүнла бүгүнки күнгә муптила болғанлиқини чүшәндүргән. Йиғин қатнашчилири уйғурлар мәсилини, җүмлидин гуантанамодики уйғурлар мәсилилирини шивитсийә хәлқи вә хәлқара җамаәткә кәң көләмдә тонуштуруш, бу арқилиқ  гуантанамодики 3 уйғурниң қоюветилиши вә қобул қилиниши үчүн  күчлүк бир  хәлқара җамаәт пикри һасил қилишта пикир бирликигә кәлгән. Йиғин қатнашқучилиридин сабиқ мәһбус адил абдулһеким зияритимизни қобул қилип, өзиниң бүгүнки йиғин тәсирати һәққидә пикир баян қилди. Адил абдулһеким шветсийидики һаят тәсиратлири һәққидиму тохталди; униң билдүрүшичә, у  шветсийигә кәлгәндин кейин өзиниң кәчмиши сәвәблик һәрқандақ ғәйрий нормал муамилигә учримиған, әксичә шветсийиликләр уни тонуп қалған әһвалда қизғин саламлишип, униңға һөрмәт билдүргән.  Адил абдулһеким сөзиниң ахирида у гәрчә шветсийидә көп имканларға вә қоллашларға еришкән болсиму өзини  техи хатирҗәм һис қилип болалмиғанлиқини тилға елип мундақ деди:
"  мәнчә һәрқандақ бир адәм, ана вәтини ишғалийәттин , хәлқи зулумдин қутулмай туруп тәл-төкүс хатирҗәмликкә еришәлмәйду, мәнму шу."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт