4 - Авғуст сәмән вәқәсидики икки уйғур қәшқәрдә сотланғандин кейинки инкаслар

Хәлқара қәләмкәшләр җәмийити уйғур мәркизиниң баш тәптиши һаҗи абдуришит керими 'төтинчи авғуст сәмән вәқәси' ни пәйда қилған абдурахман азат, қурбанҗан аблимит намлиқ ака - ука икки уйғур үстидин қәшқәрдә ечилған сот әһвалини вә җәмийәттики инкасларни тонуштурди.
Мухбиримиз вәли
2008.12.08
Qeshqer-xitay-saqchi-matem-305 4 - Авғуст күнидики һуҗумда өлтүрүлгән 16 хитай қораллиқ сақчи хадимлириниң матәм мурасимға қатнишиватқан уйғурларниң йиғилип турушқан вә бир хитай сақчисиниң кишиләр топини назарәт қилип турған көрүнүши. 2000 Ға йеқин уйғурларму матәм мурасимиға қатнашқан болуп, бир нәччә кишиләр AFP мухбириға өзлириниң матәмгә буйруқ билән қатнишиватқанлиқини ейтқан.
AFP Photo

Бу икки уйғурда қилчә әйминиш яки тәмтирәш болмиған

Абдуришит һаҗи керими бу һәқтә ениқлиған әһваллар тоғрисидики телефон хатирисини һазирчә ашкарилашни халимайду. Униң баян қилишичә, 11 ‏ - айниң 11 ‏ - күни'төтинчи авғуст сәмән вәқәси'ни пәйда қилған икки уйғур үстидин қәшқәрдә ечилған соттики сорақлар вә һөкүм елан қилиш наһайити сүрлүк елип берилған болсиму, әмма бу икки уйғурда қилчә әйминиш яки тәмтирәш болмиған.

 'Иккинчи пиланни орунлиялмиғанлиқимға әпсуслинимән'

Абдуришит һаҗи кериминиң баян қилишичә, көктат сатидиған қурбанҗан аблимит сотта өзиниң иккинчи пиланини орунлиялмиғанлиқиға әпсуслинидиғанлиқини билдүргән.

Соттики сорақ әһвали җәмийәткә тарқилип кәткән

Абдуришит һаҗи кериминиң баян қилишичә, хитай һөкүмити гәрчә қәшқәрдә елип барған бу йепиқ сотниң әһвали һәққидики учурларни интайин мәхпий тутқан болсиму, әмма буниң әһвали қәшқәргила әмәс, җәнубтин шималғичә кәң тарқалған.

Хитай һөкүмити буниң тәсирини тазилаш үчүн мәсчитләрдә тәнқидий тәшвиқат елип барған

Һазир шиветсийидә туруватқан абдуришит һаҗи кериминиң баян қилишичә, хитай һөкүмити буниң тәсирини тазилаш үчүн диний затларға тәнқид тизиси йезип берип, улар арқилиқ мәсчитләрдә тәнқидий тәшвиқат елип барған. Мәсчит әһли буниңғиму қарши турған.

Икки уйғурни рабийә ханимға четип әйибләш тоғрисида уқтуруш чүшүрүлгән

Абдуришит һаҗи кериминиң баян қилишичә, буниңдин башқа йәнә, хитай һөкүмити һазир қәшқәрдә маарипқа наһайити қопаллиқ билән арилишиватиду. Мәктәпләрдә уйғур тил - әдәбият дәрси өтүшни чәкләш үчүн, бир мунчә оқутқучини иштин бошатқан.

Шундақла йәнә, мәктәпләрниң қишлиқ тәтил вақтидин пайдилинип, сиясий курс ечип, 'төтинчи авғуст сәмән вәқәси'ни пәйда қилған икки уйғурни чәтәлләрдә уйғурларниң кишилик һоқуқи вә кәлгүси истиқбали үчүн көңүл бөлүватқан рабийә ханим башлиқ уйғур тәшкилатлириға четип әйибләш тоғрисида уқтуруш чүшүргән. Хәлқ ичидә буниңға қарши инкасларму наһайити күчлүк.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.