5 - Iyul mezgilide béyjingdiki Uyghur erzdarliri tutqun qilindi

Béyjingdiki erzdarlarning radi'omizgha bildürüshiche, 6 - ayning axiridin bashlap Uyghur erzdarlarni élip kétish üchün béyjinggha ewetilgen saqchi hem kadirlar, béyjingdiki saqchilar bilen birlikte, Uyghur erzdarlirini qoghlap tutush herikitini bashlighan. Saqchilar béyjingdiki memliketlik siyasi - qanun komitéti aldida erzini dawamlashturuwatqan Uyghurlarni shundaqla bashqa jaylardiki Uyghur erzdarliridin yigirme nechche kishini tutup, ularning bir qismini yurtlirigha élip ketken, qalghanlirini béyjingdiki shinjang ish béjirish orni, qeshqer ish béjirish orni qatarliq jaylargha nezerbend qilghan.

Ehwaldin xewerdar erzdarlarning bildürüshiche, bu yil 6 - ayning axiri béyjingdiki Uyghur erzdarlardin aqsu unsu nahiyisidin yer dewasi qilip kelgen on nechche déhqan, erzini yurtlirida hel qilishqa wede bérip, élip kétilip nezerbend qilin'ghan. Undin bashqa béyjingdiki Uyghur erzdarliridin yene yigirme nechche kishi 1 - iyuldin bashlap yurtliridin ewetilgen saqchi, kadirlargha béyjingdiki yerlik saqchilarning masilishishi bilen tutqun qilin'ghan.

Uyghur erzdarlirining bildürüshiche, bu xil tutqun qilish 4 - iyul küni eng qattiq bolghan. Ularning bildürüshiche, 4 - iyul küni erzdarlarning hemrahliridin shixenzidin kelgen ghazi hamut dem éliwatqan jayidin saqchilar teripidin tutqun qilinip, mejburiy élip kétilgen. Bu qétimqi tutqun qilinishtin saqlinip qalghan bir qisim Uyghur erzdarliri bolsa, yurtlirigha qayturulush xewpidin saqlinish üchün möküp yürüshke mejbur bolghan.

Uyghur élidin igiligen bashqa uchurlardin melum bolushiche, Uyghur aptonom rayon da'iriliri bulturdin buyan jaylargha buyruq chüshürüp, erzdarlarning mesilisini amal bar öz yurtlirida hel qilish, naraziliq bildürüp ürümchi hem béyjing qatarliq jaylargha ketken erzdarlarni herqaysi wilayet, nahiyiler özliri adem ewetip qayturup kélishni telep qilghan. Bolupmu, 5 - iyul ürümchi weqesining üch yilliq xatire küni yéqinlashqan mezgilde, da'iriler jem'iyet muqimliqini saqlash namida, ürümchi, béyjing qatarliq jaylardiki Uyghur erzdarlirigha qaritilghan nazaretni kücheytip, erzdarlargha her xil wedilerni bérip, ularni mejburiy halda yurtlirigha qayturup kétish usulini qollan'ghan.