5 - Iyul weqesining 3 yilliqi we iz - déreksiz ghayip bolghanlar mesilisi

5 - Iyul weqesining 3 yilliqi yétip kélish harpisida erkin asiya radi'osi Uyghur bölümi teripidin élan qiliniwatqan “5 - Iyuldin kéyin iz - déreksiz ghayip bolghanlar” toghrisidiki xewerlerning chet'eldiki Uyghurlar arisida zor tesir qozghighanliqi melum.

Uyghur ziyaliylirining qarishiche, 5 - iyul weqesidin kéyinki tutqun qilish heriketliri jeryanida köpligen Uyghurlarning iz - déreksiz ghayip bolup ketkenliki toghrisidiki uchurlar éghizdin - éghizgha köchüp yürgen bolsimu, bu heqte pakitliq bir matériyal ashkarilanmighan idi. 7 - Maydin buyan r f a da élan qilinip kéliwatqan 22 neper ghayip bolghan Uyghur toghrisidiki uchurlar yalghuz Uyghur teshkilatlirini muhim matériyal bilen teminlepla qalmay, Uyghur jama'itini mezkur weqeni téximu ilgirilep chüshinish pursiti bilen teminligen.

Gérmaniyide yashawatqan Uyghur ziyaliysi ablimit tursun ependi bu xususta ziyaritimizni qobul qilishtin ilgiri 5 - iyul weqeside ziyankeshlikke uchrighanlargha teselli hem salamlirini yollidi. U 5 - iyul weqesi munasiwiti bilen tutqun qilish heriketlirining hilihem dawam qiliwatqanliqini eskertti. Uning bildürüshiche, ghayip bolup ketkenlerning sani nahayiti köp bolup, nurghun ata - anilar xitay saqchi organlirining bésimi we tehditliri seweblik mezkur weqedin kéyin yoqap ketken perzentining iz - dérikini qilishqa pétinalmighan. U sözide, 5 - iyul weqesi jeryanida élip bérilghan qetli'amning bekla dehshetlik bolghanliqini, bu qirghinchiliqni merkizi asiya elliridin sayahet yaki tijaret bilen ürümchige kirgen kishilerning öz közliri bilen körgenlikini tilgha aldi. Ablimit tursun ependi yene, 5 - iyul weqesining 3 yilliqini xatirilesh pa'aliyitige pütün dunyadiki Uyghurlarning aktip ishtirak qilishini ümid qilidighanliqini tekitlidi.