Uyghur aptonum rayoni j x organliri "aktip" xizmet qilghanliqi üchün teqdirlendi


2005-10-12
Share

Xitay da'irilirining Uyghur élidiki partkom sékritari wang léchüen. AFP

Xitay jama'et xewpsizlik minsitirliqining charshenbe küni tor bétide élan qilghan xewiridin ashkarilinishiche, 9 - ayning 23 - künidin 1 - öktebirgiche, yeni xitay merkizi siyasiy byurosining da'imiy hey'et ezasi, merkizi siyasiy qanun komitétining sékritari logen Uyghur élini ziyaret qilghan mezgilde, Uyghur élidiki her derijilik jama'et xewpsizlik organliridiki saqchilar, qoralliq saqchi qisimliri, chégra mudapi'e xadimliri, ot öchürüsh xadimliri qatarliqlar birdek "amanliqni qoghdash" wezipisige seperwer qilindi.

"Chong, yoshurun xewp" ler bit-chit qilin'ghan

Xewerdin melum bolushiche, ular qattiq tedbir qollinip, Uyghur aptonum rayoni qurulghanliqining 50 - yilliqini xatirilesh pa'aliyetliri jeryanida weqe yüz bérishining aldini alalighanliqi üchün, xitay jama'et xewpsizlik ministiri juw yungkang alahide uqturush chiqirip ularni teqdirlidi.

Juwyungkang sözide "Uyghur élidiki her derijilik jama'et xewpsizlik organliri Uyghur aptonum rayoni qurulghanliqining 50 yilliqini xatirilesh jeryanida 'üch xil küch' ke zerbe bérip 'parlaq' netijilerni qolgha keltürdi. Bir yürüsh chong, yoshurun xewplerni bitchit qildi. Merkiziy wekiller ömikining bixeterlikige kapaletlik qilip, shinjang rayonining jem'iyet muqimliqini saqlidi" dep bildürdi.

Emma u, Uyghur aptonum rayonluq jama'et xewpsizlik da'irilirining bu mezgilde qandaq " yoshurun xewp" lerning aldini alghanliqini chüshendürmidi. Bu heqte melumat igilesh üchün Uyghur aptonum rayonluq jama'et xewpsizlik nazaritining bash qomandanliq shtabigha téléfon qilghan bolsaqmu, nöwetchi saqchi xadim, bu heqtiki uchurlarni ashkariliyalmaydighanliqini éytti.

"Bayram" din burunqi zerbe bérish

Ilgiri ziyaritimizni qobul qilghan Uyghur élining aqsu, qeshqer we xoten qatarliq jayliridiki jama'et xewpsizlik organliri yuqirining buyruqi boyiche, Uyghur aptonum rayonining 50 yilliqi munasiwiti bilen bixeterlik xizmitini ching tutiwatqanliqini étirap qilghan idi. Toqsu nahiyisidiki bir saqchixana xadimi bolsa özlirining yézilarda charlash xizmitini kücheytkenlikini bildürgen idi.

Xitay metbu'atlirining ötken ayda élan qilghan xewerliridin ashkarilinishiche, Uyghur aptonum rayonluq jama'et xewpsizlik da'iriliri yene öktebir mezgilidiki " bixeterlik" ke kapaletlik qilish üchün, Uyghur aptonum rayoni miqyasida 7 - aydin bashlap" 100 künlük qattiq zerbe bérish herikiti" élip barghan. Ular herikiti jeryanida her qandaq xildiki qanun'gha xilap jinayi heriketlerge qarita yuqiri bésim bilen qattiq zerbe bérish, térrorluq we zorawanliq jinayetlerge zerbe bérishni téximu kücheytishni otturigha qoyghan . Buningdin sirt, jem'iyetke tarqilip ketken qoral- yaraq we partlatquch boyumlarni barliq küch bilen kontrol qilish we musadire qilishmu bu herikettiki muhim wezipilerning biri qilin'ghan idi.

Arqidin bu heriketning netijisi süpitide xitay da'iriliri, aqsudiki Uyghur musteqilliqini yaqlaydighan teshkilatning bashliqi dep qarighan abdulla qurbanni étip öltürgenliki, Uyghur élining cherchen we chaqiliq nahiyiliride éziz barat we osman musa isimlik ikki Uyghur déhqanni" öyide qanunsiz partlash boyumlirini saqlighan" dep eyiblep qolgha alghanliqi heqqidiki xewerlerni élan qildi.

Xitay da'iriliri yene muqimliqni qoghdash namida ürümchi qatarliq jaylarda kimlik kinishkisi yoq kishilerni tekshürüp tazilash, türmidin qoyup bérilgen kishilerni nuqtiliq nazaret qilish, kishiler toplashqan sorunlarni nazaret qilish, ammiwiy erz sunush pa'aliyetlirining aldini élish qatarliq tedbirlerni qollandi.

"Toqmaq astidiki tentene"

Uyghur kishilik hoquq pa'aliyetchiliri xitay hökümitining Uyghur aptonum rayoni qurulghanliqining 50 yilliqi harpisida élip barghan bu xil yuqiri bésimliq basturush siyasetlirini tenqid qilip, bu qétimqi murasimlarning "toqmaq astidiki tentene" bolghanliqini bildürdi.

Dunya Uyghur qurultiyining bayanatchisi dilshat rishit ependi, Uyghur aptonum rayonluq j x organlirining bu xil qattiq basturush tedbirlirini élip barghanliqi üchün merkezning alahide mukapatigha érishkenlikige baha berdi.

Uning bildürüshiche, xitay hökümiti bir tereptin xitay hökümiti xitay jama'et xadimlirini Uyghurlarni basturushqa ilhamlandurghan. Yene bir tereptin, Uyghur aptonum rayonluq partkomning sékritari wang léchü'en 8 - ayda dunya jama'etchilikige , atalmish Uyghur térrorchilirining térrorluq heriketlerni pilanlawatqanliqini élan qilghan. Biraq, aptonum rayon qurulghanliqining 50 yilliqini tebriklesh mezgilide héchqandaq weqe yüz bermidi. Xitay jama'et xewpsizlik ministirliqi wang léchü'enning sözini rastqa chiqirish üchün, Uyghur élide weqe sadir bolmighanliqini j x xadimlirining töhpisi dep kötirip chiqqan. Emeliyette, Uyghur élide héchqandaq weqe yüz bermigenliki, xitay hökümitining Uyghur musteqilchilirini "térrorchi" dep eyiblishining sepsete ikenlikini körsitip, Uyghur siyasiy herikitining tinchliq we démokratik yosunda élip bériliwatqanliqini ispatlighan.

Güldüri bar, yamghuri yoq

Xitay hökümiti teshwiqatlirida Uyghur aptonum rayoni qurulghan 50 yildin buyan, Uyghur qatarliq her millet xelqining xitay kompartiyisining yétekchilikide "alemshumul netijilerni qolgha keltürdi, milletler ittipaq, jem'iyet tinch, muqim we parawan" dep bildürüp kelmekte.

Ataqliq Uyghur kishilik hoquq pa'aliyetchisi, xelq'ara Uyghur kishilik hoquq we démokratiye fondi jem'iyitining re'isi rabiye qadir xanim, xitay hökümitining Uyghur aptonum rayoni qurulghanliqining 50 yilliqi harpisida bixeterlikni shunche kücheytishining xitayning yuqiriqi teshwiqatining put tirep turalmaydighanliqini körsitidighanliqini, xitayning 50 yilliq tebriklishining Uyghurlargha héchqandaq xoshalliq élip kelmeydighanliqini bildürgen idi. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet