Istanbuldiki Uyghurlar 2009 ‏- yilliq qurban héyt bayrimini birlikte ötküzdi

Süret, 2009 ‏- yili 11 ‏- ayning 29 ‏- küni, sherqiy türkistan wexpi we sherqiy türkistan maarip we hemkarliq jemiyitining birlikte uyushturushi bilen ötküzülgen qurban héyt bayrimini tebriklesh murasimidin bir körünüsh.

2009 ‏- Yili 11 ‏- ayning 29 ‏- küni yeni qurban héytning 3 ‏- küni sherqiy türkistan wexpi we sherqiy türkistan ma'arip we hemkarliq jem'iyitining birlikte uyushturushi bilen sherqiy türkistan wexpining merkizide qurban héyt bayrimini tebriklesh murasimi ötküzüldi. Murasimgha istanbulda yashawatqan Uyghurlardin er ‏- ayal we kichik balilar bolup köp sanda kishi qatnashti.
 
Murasimda sherqiy türkistan ma'arip we hemkarliq jem'iyitining re'isi hidayetulla oghuzxan, bash katip doktor alimjan atawulla, sherqiy türkistan wexpining bash katipi hamut köktürk qatarliq shexsler söz qilip, yighin ishtirakchilirining we dunyadiki pütkül Uyghur musulmanlarning qurban héyt bayrimini tebriklidi.

Murasimgha dunya Uyghur qurultiyining bash katipi dolqun eysa ependining istanbuldiki Uyghurlarning qurban héytni tebriklep yollighan télégrafi oqup ötüldi. Uningdin bashqa yene milletchi heriket partiyisi we türkiye parlamént ezasi dewlet bahcheli we yawro'asiya bir wexpi qatarliq bir qanche ammiwi teshkilatlarning mes'ullirining istanbuldiki Uyghurlarning qurban héyt bayrimini tebriklep yollighan télégirafini hamut köktürk ependi oqup ötti.

Doktor alimjan sözide, qurban héyt bayrimining alahidiliki heqqide toxtalghandin kéyin Uyghurlarning bir yerge jem bolup qurban héytni birlikte ötküzüshning ehmiyiti heqqide toxtaldi.

Kéyin murasimgha qatnashqan Uyghurlar öz ara salamliship bir - birining qurban héyt bayrimini tebrikleshti we öz - ara söhbetliship hal ehwal sorashti. Murasim axirida tamaq ziyapiti bérildi. Ziyapettin kéyin murasim hayajanliq ichide axirlashti.

Yuqiridiki awaz ulinishidin, bu heqtiki melumatimizning tepsilatini anglaysiler.