Adnan oktar: sherqiy türkistandiki zulum dunyaning eng muhim weqesi

Sürette, muxbirimiz erkin tarim wexp bashliqi adnan oktar bilen söhbet ziyaritida.

Bu programma samsun téliwéziyiside sün'i hemra arqiliq neq meydandin tarqitildi.

Ednan oktar ependi téléwiziye programmisidiki sözni mundaq bashlidi: "shinjang weqeside xitayning meydani bek qorqunchluq, Uyghur türklirini, sherqiy türkistanliq yolwaslirimizni shehid qildi, biz intiqam alayli démekchi emes, emma ularning yaqilirini qoyup bersun, xitaylar allahqa ishinemdu ishenmemdu bilmeymen. Sherqiy türkistan chong bir ölke, xitaylar ulardin néme telep qilidu ? ularni erkin qoyup bersun dini étiqadi bilen yashisun. Teng kéchide yash qizlarni öyidin élip kétidu, nege élip ketkenlikini héch kim bilmeydu, resimlerni kördüm yash qizlarni üstide somka ésilghan halda élip kétishiwatidu, teng kéchide 10 minglarche yash qizlarni élip kétiwatidu, nege élip kétiwatidu, néme üchün élip kétiwatidu? buning bilen héch kimning kari yoq. Xitayda qandaq bir adalet sistéma bar? qandaq dégen qanun sistéma bu?"

Ednan oktar ependi sözide yene mundaq dédi: "xitay elchilikke bir xet yézip, ular bilen körüshüshni telep qilduq, biz ulargha öchmenlik qilip jeng élan qilish weziyitide emes, emma ular bilen uchriship bu mesilini hel qilayli, dep xitay elchilikke xet yazdim. Kishilerde özini qoghdash hoquqi bolsun, tutup kétilgenlerning hemmisini oqqa tutup öltürüwatidu, bu qaysi xil qanun?! teng kéchide tutqun qilip, oqqa tutup öltüridighan bir qanun barmu? xitaylar zamaniwi bir dölet qurushni meqset qilidu, biz ularning zamaniwilishishini xalimaymiz, biz ulardin yémek ‏- ichmekmu telep qilmaymiz, bizge iman ‏- étiqad erkinlikimizni béringlar, rahet yashayli. Kichikimdin bashlap men xitaylardin bek bi'aram bolimen, dawamliq ichimde sherqiy türkistan dep ah chékimen, néme dégen qorqunch bir shey'i. Teng kéchide közliri yumuq, jin'gha oxshash süretlik insanlar öyning derwaza aldigha kélidu, we biz bilen mang deydu, néme üchün dep sorisa, melum emes deydu, jinayitim néme? dep sorisa melum emes dep jawab béridu, ularning özini qoghdash hoquqi barmu? yoq. Ularni apirip chongqur azgalning aldigha tizidu we oqqa tutup hemmini öltüridu, bu xildiki öltürüsh arqa arqidin dawam qildi, bu öltürüshlerge toymidimu, xitaylar insap qilip bu milletning yaqisini qoyup bersun."

Ednan oktar ependi sözide yene pütkül dunya ittipaqliship xitaygha bésim ishlitish kéreklikini tekitlep mundaq dédi: "bu sherqiy türkistan weqesi Uyghur türkliri weqesi dunyaning birinchi nomurluq weqesidur, bu heqte chongqur xizmet élip bérish lazim, dunyaning nurghun döletliri bu weqege nisbeten uxlawatidu, bu weqege néme üchün héch qandaq dölet köngül bölmeydu, sotqa tartilmastin öltürülüwatidu, yeni sot mehkimisige élip chiqish, özini aqlash pursiti yoq, ularning eslide jazalighudek jinayet yoq."

Ednan oktar ependi sözide yene, 5 ‏- iyul ürümchi weqeside xitaylar élan qilghandek 200 kishi emes belki 10 ming kishining ölgenlikini ilgiri sürüp mundaq dédi: "xitaylar u weqede 200 kishi öldi dédi, undaq bolsa u yerdiki 10 minglarche insan nege ketti? bular u yerdiki güzel yash qizlarni nege élip ketkenlikini bildürmeydu, sherqiy türkistanliq güzel kélishken, dindar, teqwadar yash qizlirimizni mejburi élip kétiwatidu, buni oylap sözlep qoyush bilen kupaye qilmaydu, bu ishqa alahide köngül bolup xizmet ishlesh kérek. Epsuslinarliq bilen ularning awazimu anche anglanmaydu, bir xanim bar Uyghurlarning anisi déyilgen ismi rabiye qadir, u xanimnimu héchkim qollimaywatidu, bu bek chong weqe, bu mesile üchün, pütkül dunyani zilzilge sélish kérek. Bu bek qorqunchluq, wehimilik weqe, men bu heqte bir kitab yéziwatimen, yéqinda neshirdin chiqidu, hemde biz bir sherqiy türkistan yighini achimiz emma bular kupaye qilmaydu, chünki xitaylar kitabtin, yighin - murasimlardin tesirlinidighan insanlar emes, pütkül dunya bu heqte bolupmu bizning hökümitimiz, türkiy jumhuriyetler, islam döletliri bu heqte bayanat élan qilish kérek. Ular qérindashlirimizni erkin yashighili qoysun, eger xitaylar pul telep qilsa telep qilghan pulini béreyli, eger ular pulni közlep shundaq qiliwatqan bolsa shunchilik pul lazim, dep bizge désun, u pulni berseng ularni erkin qoyup birimiz désun, biz telep qilghan pulni béreyli, ularni esir aldim, sümürimen deydighan bolsa ularni sümürgenning ornigha pul alsun, biz telep qilghan pulni béreyli qérindashlirimizni erkin qoyup bersun, ularning xitaylargha néme ziyini bar? ularni erkin yashighili qoysun!"

Yuqiridiki awaz ulinishidin, bu heqtiki melumatimizning tepsilatini anglaysiler.