Ш у а р җамаәт хәвпсизлик назаритиниң муавин назири компартийидин чекингәнликини елан қилди

Йеңи ира гезитиниң 22 ‏- ноябир хәвәр қилишичә, уйғур аптоном районлуқ җ х назаритиниң муавин назири хитай компартийисидин чекингән вә вәзиписидин истипа бәргән. Хәвәрдә муавин назирниң исми тилға елинмиған.
Мухбиримиз шөһрәт һошур
2008.11.24
BasturulghanUyghurlar-305 Сүрәттә хитай сақчилири уйғур аптоном райониниң бир йезисида уйғур деһқанлирини тутқун қиливатқан көрүнүш
news.boxun.com / Wang Lixiong

Әмма истипанамидики учурлардин униң хитай миллитидин икәнлики, нөвәттә әнгилийидә икәнлики мәлум. Йеңи ира гезити, муавин назирниң истипанамисини толуқ текисти билән елан қилған. Истипанамә мундақ башланған: "мән коммунизм идийисигә ишинип кәлгән идим; партийә үчүн хизмәт қилишни хәлқ үчүн хизмәт қилиш дәп билип кәлгән идим. Әмди билдимки, хаталишиптимән, алдиниптимән. Хаталашқандиму баштинла хаталишиптимән."

Истипанамидә муавин назир өзиниң 1974 - йили партийигә киргәнликини, 30 йилдин бери партийә үчүн хизмәт қилип кәлгәнликини, бу җәрянда нурғунлиған хата иҗраатларда рол алғанлиқини; шундақ туруқлуқ үзиниңму компартийиниң тәһдитидин халий болалмиғанлиқини баян қилған вә мундақ дегән: " хәлқ үчүн баш қатуруш хатаму? дөләтниң кәлгүси мәнпәәтини ойлаш хатаму? парихорлуққа қарши туруш хатаму ?"

Истипанамидики бу тор баянлиридин, мәзкур назирниң компартийиниң рәһбәрлик истилидин нарази икәнлики, хитайниң миллий сияситиниму тоғра дәп қаримайдиғанлиқи билинмәктә.

Истипанамидә йәнә мундақ дейилиду: "мән тйәнәнмен вәқәсини компартийиниң ғәлибиси дәп тәнтәнә қиптимән. Уйғурларни өлтүргәндә көп санлиқниң мәнпәәтини қоғдаватимән дәп чүшинип кәптимән. Хаталиқлиримни тонудум, хаталиқлиримни давамлаштурмаслиқ үчүн истипа бериватимән."

Муавин назир истипанамисидә хитай компартийисиниң ғәйри инсаний характерини кечикип байқиғанлиқини билдүргәндин кейин, йәнә мундақ дегән: "хаталиқлиримни түзитиш үчүн җасарәт керәк иди; шуңа истипа қарарини бәрдим; мән аял вә балилиримни әнглийигә йолға селивәткән чеғимдила, һәммә ақивәтләрни көз алдимға кәлтүргән идим; уқуп туруватимән: қол астимдикиләр, мәндин бошиған һоқуқни қолға кәлтүрүш үчүн күрәшни башлайду; аталмиш достлирим мәндин өзини қачуриду. Йәнә бәзиләр мени ахмақ дәп мазақ қилиду. Шуңа мән һазир һәм азап ичидимән һәм раһәтлик һес қиливатимән. Раһәт болушум, хаталиқлиримни етирап қилғиним үчүн. Азаплинишим, хаталиқини тонуған ялғуз мән болғиним үчүн."

Хәвәрләрдә һазирға қәдәр уйғур аптоном районлуқ җ х назаритидә бир муавин назирниң истипа бәргәнликигә аит рәсмий мәнбәләрниң испати көрситилмиди. Хәвәрниң әсли мәнбәси болған йеңи ира гезити фалунгуңчилар тәрипидин нәшр қилиниду, 20 дин артуқ тилда 30 нәччә дөләттә тарқитилиду. Әгәр хәвәрниң растлиқи испатланған тәқдирдә, бу хәвәр уйғур районидики юқири дәриҗилик әмәлдарлардин бири тунҗи болуп, хитай һакимийитиниң, хитай миллитиниң мәнпәәти үчүн уйғурларни бастуруватқанлиқини ашкара етирап қилиши һесаблиниду.

Бүгүнгә қәдәр бир қисим уйғур мустәқилчилири, уйғур районидики хитай әмәлдарларни, ишчи, хизмәтчиләрни вә хитай хәлқини агаһландуруп, хитай һакимийитиниң уйғурларни бастурушиға вастә болмаслиққа, уйғурлар мәсилисидә һакимийәт тәрәптә әмәс, һәқиқәт тәрәптә турушқа чақирип кәлгән вә шу чағдила уйғур районидики хитай аһалисини бигунаһ инсанлар дәп тонуйдиғанлиқини билдүрүп кәлмәктә иди.

4 ‏- Авғуст сәмәнйоли вәқәси йүз бәргәндә чәтәл мухбирлири қәшқәрни зиярәт қилған вә қәшқәрдики хитай аһалилиридин уйғурларниң әһвалини сориған; буларниң ичидә бәзилири һөкүмәтниң уйғурларға сиясий вә иқтисадий саһәдә тәңсиз муамилә қиливатқанлиқини ашкарилиған иди.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.