Sh u a r jama'et xewpsizlik nazaritining mu'awin naziri kompartiyidin chékin'genlikini élan qildi

Yéngi ira gézitining 22 ‏- noyabir xewer qilishiche, Uyghur aptonom rayonluq j x nazaritining mu'awin naziri xitay kompartiyisidin chékin'gen we wezipisidin istipa bergen. Xewerde mu'awin nazirning ismi tilgha élinmighan.
Muxbirimiz shöhret hoshur
2008.11.24
BasturulghanUyghurlar-305 Sürette xitay saqchiliri Uyghur aptonom rayonining bir yézisida Uyghur déhqanlirini tutqun qiliwatqan körünüsh
news.boxun.com / Wang Lixiong

Emma istipanamidiki uchurlardin uning xitay millitidin ikenliki, nöwette en'giliyide ikenliki melum. Yéngi ira géziti, mu'awin nazirning istipanamisini toluq tékisti bilen élan qilghan. Istipaname mundaq bashlan'ghan: "men kommunizm idiyisige ishinip kelgen idim؛ partiye üchün xizmet qilishni xelq üchün xizmet qilish dep bilip kelgen idim. Emdi bildimki, xatalishiptimen, aldiniptimen. Xatalashqandimu bashtinla xatalishiptimen."

Istipanamide mu'awin nazir özining 1974 - yili partiyige kirgenlikini, 30 yildin béri partiye üchün xizmet qilip kelgenlikini, bu jeryanda nurghunlighan xata ijra'atlarda rol alghanliqini؛ shundaq turuqluq üziningmu kompartiyining tehditidin xaliy bolalmighanliqini bayan qilghan we mundaq dégen: " xelq üchün bash qaturush xatamu? döletning kelgüsi menpe'etini oylash xatamu? parixorluqqa qarshi turush xatamu ?"

Istipanamidiki bu tor bayanliridin, mezkur nazirning kompartiyining rehberlik istilidin narazi ikenliki, xitayning milliy siyasitinimu toghra dep qarimaydighanliqi bilinmekte.

Istipanamide yene mundaq déyilidu: "men tyen'enmén weqesini kompartiyining ghelibisi dep tentene qiptimen. Uyghurlarni öltürgende köp sanliqning menpe'etini qoghdawatimen dep chüshinip keptimen. Xataliqlirimni tonudum, xataliqlirimni dawamlashturmasliq üchün istipa bériwatimen."

Mu'awin nazir istipanamiside xitay kompartiyisining gheyri insaniy xaraktérini kéchikip bayqighanliqini bildürgendin kéyin, yene mundaq dégen: "xataliqlirimni tüzitish üchün jasaret kérek idi؛ shunga istipa qararini berdim؛ men ayal we balilirimni en'gliyige yolgha séliwetken chéghimdila, hemme aqiwetlerni köz aldimgha keltürgen idim؛ uqup turuwatimen: qol astimdikiler, mendin boshighan hoquqni qolgha keltürüsh üchün küreshni bashlaydu؛ atalmish dostlirim mendin özini qachuridu. Yene beziler méni axmaq dep mazaq qilidu. Shunga men hazir hem azap ichidimen hem rahetlik hés qiliwatimen. Rahet bolushum, xataliqlirimni étirap qilghinim üchün. Azaplinishim, xataliqini tonughan yalghuz men bolghinim üchün."

Xewerlerde hazirgha qeder Uyghur aptonom rayonluq j x nazaritide bir mu'awin nazirning istipa bergenlikige a'it resmiy menbelerning ispati körsitilmidi. Xewerning esli menbesi bolghan yéngi ira géziti falun'gungchilar teripidin neshr qilinidu, 20 din artuq tilda 30 nechche dölette tarqitilidu. Eger xewerning rastliqi ispatlan'ghan teqdirde, bu xewer Uyghur rayonidiki yuqiri derijilik emeldarlardin biri tunji bolup, xitay hakimiyitining, xitay millitining menpe'eti üchün Uyghurlarni basturuwatqanliqini ashkara étirap qilishi hésablinidu.

Bügün'ge qeder bir qisim Uyghur musteqilchiliri, Uyghur rayonidiki xitay emeldarlarni, ishchi, xizmetchilerni we xitay xelqini agahlandurup, xitay hakimiyitining Uyghurlarni basturushigha waste bolmasliqqa, Uyghurlar mesiliside hakimiyet terepte emes, heqiqet terepte turushqa chaqirip kelgen we shu chaghdila Uyghur rayonidiki xitay ahalisini bigunah insanlar dep tonuydighanliqini bildürüp kelmekte idi.

4 ‏- Awghust semenyoli weqesi yüz bergende chet'el muxbirliri qeshqerni ziyaret qilghan we qeshqerdiki xitay ahaliliridin Uyghurlarning ehwalini sorighan؛ bularning ichide beziliri hökümetning Uyghurlargha siyasiy we iqtisadiy sahede tengsiz mu'amile qiliwatqanliqini ashkarilighan idi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.